Kapeela wa “Ca Kupeelwa Conse Icisuma”
“Pa kashita kamo natandalilwe na minista we calici lya Reformed. Afwaile ukwishiba ifyo naletungulula icalici lyandi. Natile kuli wene: . . . ‘Tatufolesha amalipilo; takwaba icingalenga abantu ukuumana. Tatucita ukulombelesha.’ ‘Ni shani fintu musanga indalama?’ e fyo aipwishe. Nayaswike nati, ‘Kwena, Dr.——, nga ca kuti namweba icili icine cayangukisha tamwabe na maka ya kucisumina nakalya. Lintu abantu basekelela muli iyi nshila, tabasanga imbale ukupishiwa pa ntanshi yabo. Lelo balamona ukuti kwalibako ifipooswa. Balayeba abene ukuti, “Ino ŋanda ya kulonganinamo ikabile ndalama. . . . Ni shani ningasangwilako kuli iyi mibombele?”’ Alindoleshe kwati aletontonkanyo kuti, ‘Ulemona kwati ndi cinshi—impelwa mano?’ Natile, ‘Kwena, Dr.——, ndemweba fye icine cituntulu. . . . Lintu umo apokelele paalo kabili akwata icuma, alafwaya ukucibomfya kuli Shikulu. Nga ca kuti takwete cuma, mulandu nshi twingalamucincishisha pa lwa cene?’”
—Charles T. Russell, presidenti wa kubalilapo uwa Watch Tower Society, “The Watch Tower,” July 15, 1915.
TULAPEELA pantu Yehova Lesa aali e wa kubalilapo ukupeela. Ukupeela kwakwe kwatendeke imyaka ishishi bantu mu kuba no bubumbo—ububumbo bwakwe ubwa kubalilapo fye, “Umwana wakwe uwafyalwa eka.” (Yohane 3:16) Mu kutemwa, apeele ica bupe ca bumi kuli bambi.
Umwana wa kwa Lesa, Yesu Kristu, e ca bupe cakulisha ica kwa Yehova kuli ifwe. Lelo Umwana wa kwa Lesa, mu mwine eka, taba e mpela ya kupeela kwa kwa Lesa. “Ukusenaminwa ukwacishamo kwa kuli Lesa” e fintu umutumwa Paulo aite “ca bupe [ca kwa Yehova] icishingalandwa!” (2 Abena Korinti 9:14, 15) Ici ca bupe cisanshamo ubusuma bonse apo bwapela ne cikuuku ca kutemwa fintu Lesa atambulwila pa bantu bakwe ukupitila muli Yesu. Icikuuku ca pa fye ica musango yo cabe ca kupapusha nga nshi ica kuti calicila pa maka ya buntunse aya kulondolola nelyo ukulumbulula. Nalyo line, kucili kwaliba ifyacilapo ku kupeela kwa kwa Lesa.
Kale sana, imfumu mu kubamo amano kabili mu kuicefya asumine ukuti ifintu fyonse ifisuma ifyo apeele nge fya bupe mu cituntulu fyali fya kwa Yehova. Atile: “Pantu conse icili mu muulu na pa nshi cenu; ubufumu bwenu, mwe Yehova, kabili mwalitumpuka mwabo mutwe kuli bonse! . . . Lelo nine ani, kabili ni bani abantu bandi, ukuti twingaba na maka aya kupeela ku kuitemenwa ifya bupe nge fi? pantu fifuma kuli imwe fyonse, kabili ifyafuma mu kuboko kwenu e fyo tupeelako kuli imwe.”—1 Imilandu 29:11-14.
Ica Kumwenako ca kwa Lesa
Yakobo, umusambi wa kwa Yesu Kristu, alishibe ukuti Yehova Lesa e ntulo ya cili conse icaba icisuma mu kukumanina mu mbali shonse. Fya kupeelwa fyafikapo fye e fifuma kuli wene. Yakobo alembele ukuti: “Ica kupeelwa conse icisuma ne ca bupe conse icafikapo cafuma mu muulu, ciika ukufuma kuli Shifwe wa fya lubuuto, uo takwabako ukwaluka kwa kutula no kuwa, nangu kupilibuka kwa kuloshe cinshingwa pa nshi.”—Yakobo 1:17.
Nangu fye ni mu mulandu wa kupeela ifya bupe, Yakobo alimwene ifyo Lesa apusanako na bantunse. Abantunse kuti bapeela ifya bupe fisuma lelo te lyonse bacite fyo. Ifi fya bupe kuti pambi fyafuma ku nkuntu ya kaso, nelyo pambi kuti fyabomfiwa ku kutunka umuntu ukucite cabipa. Kuli Yehova takwaba kwaluka; taaluka. Muli fyo, imibele ya fya bupe fyakwe tayaluka. Lyonse fyaba ifyasanguluka. Lyonse fisumbula ubusuma ne nsansa sha mutundu wa buntunse. Fiba lyonse ifya cikuuku ne fya kwaafwa, te fya konaula.
Inkuntu pa Kupeele fya Bupe
Mu nshiku sha kwa Yakobo, intungulushi shalumbuka isha butotelo shabeleshe ukupeela ifya bupe pa kuti fye bengamonwa ku bantu. Bapeele ne nkuntu shalubana. Pa kufwaisha ukusuminisha kwa bantu, balinenwineko ifipimo fyabo ifya bulungami. Abena Kristu, nangu cibe fyo, bali no kuba abapusanako. Yesu abafundile ukuti: “Ilyo ulecite fya nkumbu, wilisha ntandala ku ntanshi yobe, ificita aba bumbimunda mu masunagoge na mu misebo, ukuti bacindikwe ku bantu; ndemwebe cine cine, nati, nabapokelele cilambu cabo. Lelo iwe pa kucite ca nkumbu, wileka ukuboko kobe kwa kuso kwishibe ico ukuboko kobe kwa kulyo kulecita, ukuti ica nkumbu cobe cibe mu bumfisolo; kabili Wiso uumona mu bumfisolo akakulambula apabuuta.”—Mateo 6:2-4.
Umulandu wa Mwina Kristu uwa kupelele fya bupe waba kwaafwa bambi ukukumanisha ukukabila nelyo ukulenga bene ukuba aba nsansa nelyo ukusumbula ukupepa kwa cine. Taciba kuikatamika. Amenso ya kwa Yehova, na kuba, kuti yapeka mu cifulo cabesha pe samba ica mutima wesu. Kuti amona inkuntu yabesha mu kati iili ku numa ya fya bupe fyesu ifya nkumbu.
Inte sha kwa Yehova balatukuta ukukonka ica kumwenako ca kwa Yehova no Mwana wakwe mu kupeele fya bupe. Bapeela pa fintu bakwata. Balikwata imbila nsuma ya Bufumu, kabili bapeela yene ku kupaalwa kwa bambi. Balishiba ukuti Amapinda 3:9 yalondololo kuti: “Cindika Yehova ku fyuma fyobe, na ku fya ntanshi fya cibwesha cobe conse.” Pa mulandu wa kuti iofesi lya musambo ilili lyonse, icilonganino, no muntu umo umo mu kucincila bafwaya ukusangwila ku busuma bwa bonse, bumunyina apo bwapeela bulakoshiwa lwa ku mupashi no kuba no lubanda. Ulubanda lwa ku mubili talutungulula ku lubanda lwa ku mupashi, lelo ulubanda lwa ku mupashi lulaleta ulubanda lwa ku mubili ulwakumanina ku kukabila kwa mulimo wa kwa Yehova.
Inshila sha Kwakaninamo
Kwabako inshila ishingi mu shintu uuli onse engasangwilako pa lwakwe ku kwaafwilisha imbila nsuma. Inshila imo yaba ukukuma ku Mayanda ya Bufumu. Ifilundwa fyonse ifya cilonganino filabomfya Iŋanda ya Bufumu. Kwaliko uwapayenye indalama ku kukuulwa kwa iko nelyo ukusonkela, ukupayanyo lubuuto, ukukafya, no kuisungilila. Apantu ukwafwilisha kwa cilonganino ukwa uli onse kulafwaikwa, utubokoshi twa misangulo tulabikwa mu Ŋanda ya Bufumu, kabili ubupe bwa kuitemenwa ubupokelelwa bulabomfiwa ku kulipila ifipooswa fya cilonganino. Ukufuma pa shipulamo, imisangulo ku musambo wa Watch Tower kuti pambi yacitwa, ukulingana no kupingulapo kwa cilonganino.
Imisangulo kuti yacitwa ku musambo wa Sosaite kwine ku kukansha no kwafwilisha bamishonari na bapainiya baibela mu mbali sha calo umo imbila nsuma ishafika ku bwingi bwa bantu mu cinkumbawile. Ifipooswa fimbi mu kwananya imbila nsuma fyaba mu kulundana no mulimo wa bakangalila benda. Umutumwa Paulo, uwaimike ica kumwenako mu mulimo wa kwenda mu mwanda wa myaka uwa kubalilapo, atashishe icilonganino mu Filipi ukuti: “Mwatumine limo na libili ku fya kukabila kwandi.” (Abena Filipi 4:14-16) Pa mbali ya shipooswa kuli ishi mbali sha mulimo wa nshita yonse, shintu imisambo yonse yakwata, kwalibako ukusungilila kwa ŋanda ya Bethel imo na imo na abo abekalamo no kubombamo. Ukulemba no kupulinta ifitabo ifyabamo ubukombe bwawama ubwa mbila nsuma fyaba mu cituntulu mashuko ayapeelwa na Lesa, lelo ukwananya ifitabo na ko kulafwaikwa, kabili kusanshamo ifipooswa. Lyene kwabako ifipooswa fya kulongana kukalamba na mabungano, ukusanshako imilandu ya ku filye iimishiwa ku ‘kucingilila kabili mwi funde ukwikasha imbila nsuma.’—Abena Filipi 1:7, NW.
Inshita ipooswa mu kushimikila imbila nsuma kuli umo na umo uwa babomfi ba kwa Yehova yaba ya kuitemenwa, kabili e fyaba no kupeela kwakwe ifyuma fya ku mubili. Ukubika pa mbali ukwa lyonse indalama ku kubomfiwa mu kwafwilisha ukulundulula ukupepa kwa cine kwalipandwa amano ku mutumwa Paulo: “Awe ulwa musangulo uwa kupeela abashila: . . . ku bwa ntanshi bwa mulungu no mulungu, bonse mupaatulepo fimo no kubika, umo mwingakwatila.”—1 Abena Korinti 16:1, 2.
Lintu umuntu apeelo bupe, teshiba lyonse mu kukumanina fintu bukabomfiwa, lelo alamone fya kufumamo mu kutanunuka kwa kushimikilo Bufumu. Amalipoti muli 1993 Yearbook of Jehovah’s Witnesses yalelango kuti imbila nsuma ya Bufumu ileshimikilwa mu fyalo ukucila pali 200 ne fishi fya muli bemba ku batumikishi ba Bwina Kristu abacila pali 4,500,000. Aya malipoti yaba ya kukafyo mutima. Ica bupe icili conse lyene, te mulandu ne cipimo, cilafwilisha mu kwananya kwa mbila nsuma mu kusaalala kwa calo.
Uyu mulimo wafwilishiwa mu fya ndalama ku kupeela kwapuminkanishiwa ukwa bonse. Bamo balaba na maka ya kupeela ifyafulilako, icafwilisha umulimo wa kushimikila ku cipimo cakulilako. Bamo bapeela ifyacepako. Lelo abo bapeela ubupe bunono tabalekabila ukuyumfwa aba nsoni nelyo ukuyumfwa ukuti icakaniko cabo calicilamo kucepa. Yehova mu cine cine tayumfwa muli yo nshila. Yesu alengele ici ukumfwika nga nshi lintu alangile fintu Yehova atesekeshe akanyampuku ka kwa mukamfwilwa. “Kabili amwene mukamfwilwa mubusu alepoosamo utunyampuku tubili twa ndalama. E lyo atile, Ndemwebe cine cine, nati, uyu mukamfwilwa mubusu apooselemo icacilamo kuli bonse; pantu bonse bene ni ku fipakile fyabo bapooselemo ifya bupe, lelo wene ni ku kubulwa kwakwe apooselemo fyonse ifya maliila ifyo akwete.”—Luka 21:2-4.
Te mulandu na fintu imibele yesu iya mu fya ndalama ingaba, kuti twapeela mu nshile shisekesha Yehova. Kemba wa malumbo asupula bwino fintu twingapeela ubukata ku Mfumu yesu na Kapingula. Alondolola ukuti: “Tuutubwileni Yehova ubukata bwe shina lyakwe, leteni ica bupe, no kwingila mu mansa shakwe.” (Ilumbo 96:8) E ico, shi natupashanye ica kumwenako cabamo kutemwa ica kwa Shifwe wa mu muulu ku kupeele ca bupe cesu ukwa nsansa pantu wene e watupeele intanshi.
[Akabokoshi pe bula 30]
IFYO BAMO BACITA IMISANGULO KU MULIMO WA KUSHIMIKILA UBUFUMU
◻ IMISANGULO KU MULIMO WA MU KUSAALALA KWA CALO: Abengi balabika pa mbali atemwa ukutantika icipimo ico babika mu tubokoshi twa misangulo utwalembwapo: “Imisangulo ya Mulimo wa mu Kusaalala kwa Calo uwa Sosaite—Mateo 24:14.” Cila mweshi ifilonganino fituma ishi ndalama napamo ku cishinte ca calo mu Brooklyn, New York, nelyo kwi ofesi lya musambo ilyabela mupepi.
◻ IFYA BUPE: Imisangulo ya kuitemenwa iya ndalama kuti yatumwa mu kulungatika ku Watch Tower Bible and Tract Society of Pennsylvania, 25 Columbia Heights, Brooklyn, New York 11201, nelyo kwi ofesi lya musambo wa Sosaite ilya cikaya. Ifibekobeko nelyo ifikwatwa fimbi na fyo fine kuti fyasangwilwako. Kalata iipi iya kulondolola ukuti ica musango yo cili bupe bwa mu kulungatika ilingile ukwendela pamo ne yi misangulo.
◻ UKUTANTIKA KWA MUSANGULO WA CIPANGANO: Indalama kuti shapeelwa ku Watch Tower Society ukusungwa mu kuseekeshiwa ukufikila imfwa ya ulepeela, mu kuba no kupayanya kwa kuti nga kwabako ukukabila kwa pa lwakwe, shikabweshiwa ku wapeele.
◻ INSHUWALANSI: Watch Tower Society kuti yalumbulwa nga kapokelela wa ndalama sha mibombele yatantikwa iya inshuwalansi ya bumi nelyo mu mapange ya kuleka incito/penshoni. Sosaite ilingile ukwishibishiwa ulwa mitantikile iili yonse iya musango yo.
◻ AMAAKAUNTI YA KU BANKI: Amaakaunti ya ku banki, amasetifiketi ya ndalama shili ku banki, nelyo amaakaunti ya muntu umo umo aya kuleke ncito kuti pambi yabikwa mu kuseekeshiwa kuli nelyo ukulipilwa pa mfwa ku Watch Tower Society, mu kumfwana ne fifwaikwa fye banki lya cikaya. Sosaite ilingile ukwishibishiwa ulwa mitantikile iili yonse iya musango yo.
◻ AMA STOCK NA MA BOND (Indalama shashimishiwa ku buteko nelyo ku kampani mu kuba ne cibwesha.): Ama stock na ma bond kuti pambi fyasangulwa ku Watch Tower Society atemwa ngo bupe bwa mu kulungatika nelyo pe samba lya kusuminishanya uko indalama sha malipilo shatwalilila ukulipilwa ku ulepeela.
◻ ICIKWATWA CA MPANGA NE FIKUULWA: Icikwatwa ca mpanga ne fikuulwa ifingashitishiwa kuti pambi fyasangulwa ku Watch Tower Society atemwa ukupitila mu kucita ubupe bwa mu kulungatika nelyo pa kusungilila impanga ku ulepeela, uyo uwingatwalilila ukwikala mulya mu kati ka nshita ya bumi bwakwe. Umo alingile ukwipusha Sosaite pa ntanshi talalembesha ifipepala fya nsambu sha mwi funde isha kupeelelapo icikwatwa ca mpanga icili conse ku Sosaite.
◻ IFYA CISHALE NO KUSEEKESHA: Ifipe nelyo indalama kuti fyashiilwa Watch Tower Bible and Tract Society of Pennsylvania mu nshila ya fya cishale iyacitwa mwi funde, nelyo Sosaite kuti yalumbulwa nga kapokelela wa kusuminishanya kwa kuseekesha. Ukuseekesha ukunonsha ukuteyanya kwa butotelo kuti pambi kwapayanya ubusuma bumo ubwa misonko. Kope iya kulembapo ifya cishale nelyo ukuseekesha ilingile ukutumwa ku Sosaite.
Ku fyebo fyalundwako ukukuma ku milandu ya musango yo, lembeleni ku Treasurer’s Office, Watch Tower Bible and Tract Society of Pennsylvania, Akabokoshi 33459, Lusaka 10101, nelyo kwi ofesi lya musambo wa Sosaite ilya cikaya.
[Ifikope pe bula 31]
Ifyo imisangulo yenu ibomfiwa:
1. Aba kuitemenwa aba pa Bethel
2. Ukukuula amaofesi ya misambo
3. Ukukumbusuka kwa mu tuyofi
4. Amayanda ya Bufumu
5. Bamishonari