Ifya Kuteyanya Laibrare wa Teokratiki

SHEREZADE, umukashana munono uwasalapuka uwa ku Spain, aali ne myaka ya bukulu ine lintu kafundisha wakwe aebele ikalasi ukuti baali no kupenta ifikope fya kwa “Father Christmas.” Ilyo line fye, Sherezade alombele ulusa lwa kukanacitako. Alondolwele ukuti kampingu wakwe tali na kusuminisha wene ukucita ico.

Uwasunguka pa lwa uku kukaana, kafundisha amwebele ukuti cali fye kwati kupenta icikope ca kwangasha no kuti takwali icili conse icalubene muli ico. Sherezade ayaswike ukuti: “Nga ca kuti cili fye ca kwangasha, kuti nasalapo ukuilengela ica kwangasha ne mwine nga mwingansuminisha.”

Pa kashita na kambi ikalasi lyaebelwe ukupenta imendela ya luko. Na kabili Sherezade alombele nga engacitako fimbi. Mu nshila ya kulondolola, aebele kafundisha pa lwa lyashi lya kwa Shadraki, Meshaki, na Abednego.—Daniele 3:1-28.

Mu kwangufyanya pa numa kafundisha atumine nyina kwa Sherezade lamya ku kulumbulula ukusunguka kwakwe. “Umwana mwanakashi wenu pa tushita twafulilako alilanda kuli ine pa lwa kampingu wakwe,” e fyo asosele. “Bushe kuti mwacelenganya? Umukashana pali ulya mushinku ukulondolola kuli ine umulandu kampingu wakwe alemucushisha! Kwena, nshilesuminishanya na cintu mulemusambilisha, lelo ndemwebekesha ukuti muletunguluka. Kabili ndefwaya imwe ukwishiba ukuti ndakumbwa umwana mwanakashi wenu.”

Ni shani fintu umukashana wa myaka ya bukulu ine engakwata kampingu wakanshiwa na Baibolo? Nyina, Marina, alondolola ukuti Sherezade alikwata laibrare wakwe umwine uwa teokratiki mu muputule wakwe uwa kusendamamo. Laibrare asanshamo amakope ya pa lwakwe aya Ulupungu lwa kwa Kalinda, ayo ashilamo, ifitabo fyakwe ifya mu kushimikila, ne mpapulo shonse isha Watchtower Society isho shakakulwa ukufuma pantu afyalilwe. Ico atemwisha muli laibrare wakwe ni kaseti wa My Book of Bible Stories, uyo akutikako cila cungulo bushiku ilintu alekonkamo muli kope wakwe uwapulintwa. Cali ni ubu bulondoloshi bwalembwa mu Baibolo e bwapangeshe wene ukucito kupingulapo ukulumbwilwe pa muulu.

Bushe laibrare wateyanishiwa bwino uwa teokratiki kuti akwaafwa pamo na bana bobe? Mulandu nshi laibrare wa pa ŋanda abela uwakabilwa?

“Laibrare Tacili Cintu Icishikabilwa Sana”

“Laibrare tacili cintu icishikabilwa sana, lelo ni cimo ica fikabilwa fya bumi,” e fyabilishe Henry Ward Beecher. Ukwabulo kutwishika, mupepi na ifwe bonse twalikwata cimo ica ifi “fikabilwa fya bumi,” nangu ca kuti tatwaishiba cene. Mulandu nshi ifyo? Pa mulandu wa kuti nelyo fye nga ca kuti twakwata fye Baibolo, ninshi twalikwata icingetwa nga laibrare.

Baibolo mu cine cine ni laibrare wa teokratiki uwacilishapo pali yonse. Mu mwanda wa myaka walenga bune, Jerome apangileko ilongo lya mashiwi ilya ciLatin Bibliotheca Divina (Laibrare wa Bulesa) ku kulondolola amabuuku yapuutwamo ayalonganikwa ayakumanina ayo twita Baibolo. Yehova atupayanishishe uyu laibrare washila ku kutupeela ukwaafwa kubomba, amakambisho, no butungulushi. Yaba cintu cimo ico tushilingile kusendela mu kabepekesho. Ukukwata fye Baibolo wakumanina cipilibulo kuti natukwata laibrare wacilapo kutanununwa ukucila cintu ababomfi ba kwa Lesa abengi bakwete mu nshita shapita.

Lintu bamanyuskripiti balembwa ku minwe abalumo mutengo e baliko fye, mayanda yanono nga nshi, nga ca kuti kwali ayali yonse, e yakwete Baibolo wakumanina. Lintu Paulo afwaile ukusambilila Amalembo mu kati ka kupooswa kwakwe mu cifungo ukwa kupelako mu Roma, alombele Timote ukumuletela ifimfungwa fimo ukufuma ku Asia Minor—nakalimo ifiputulwa fya Amalembo ya ciHebere. (2 Timote 4:13) Amasunagoge, nangu cibe fyo, yalikwetemo ifimfungwa fyalonganikwa, kabili bonse babili Yesu Kristu no mutumwa Paulo balishukile aya malaibrare mu mulimo wabo uwa kushimikila. (Luka 4:15-17; Imilimo 17:1-3) Mu nsansa, Amalembo nomba yalicilapo kusangwa ukucila fintu yali mu mwanda wa myaka uwa kubalilapo.

Ukupitila mu kuletako bamashini bapulinta, ilelo mupepi na babomfi ba kwa Lesa bonse—te mulandu na fintu ululimi lwabo lwingaba—kuti bakwatako Baibolo wakumanina pa musangulo walinga. Na kabili twalikwata ishuko lya mu nshita ilyaibela ilya kulunda kuli uyu “laibrare” washila. Ukucila pa mwanda wa myaka umo, “umusha wa cishinka kabili uwashilimuka” aliba uwapamfiwa ukupayanya ifya kulya pa nshita iiyene.—Mateo 24:45-47.

Lelo tacili icapalishako ukuti tukashukila ifi ifyebo fyaumo mutengo nga ca kuti tatuteyenye laibrare wa pa lwesu uwa teokratiki. Ni shani fintu ico cingacitwa? Ulutampulo lwa kubalilapo, kwena, kukwata ifitabo ifyo laibrare wa musango yo akabila. Caliwamina ukubombesha, apantu cikatulenga ukukwata mupepi ifyebo fya kulungatika ifyo tukabila ku kubomba ne mpika no kwasuka ifipusho fya Baibolo.

Fitabo Nshi Ndekabila?

Bushe walibala aulanguluka pa fintu wingapikulula impika ya kumfwana mu cupo cobe nelyo fintu wingaafwa abana bobe ukukaana imiti ikola? Ni shani fintu wingaafwa cibusa uulecula ku kupopomenwa? Bushe kuti walondolola mu kumfwika ubushininkisho twakwata ukuti Lesa e ko aba no mulandu asuminishisha ububifi? Cinshi cintu iciswango cakashika ica mu Ukusokolola icipandwa 17 cimininako?

Ifi fipusho ne fipusho fimbi ifingi kuti fyayasukwa nga ca kuti walikwata laibrare walinga uwa teokratiki. Watchtower Society yalisabankanya ifitabo, amabroshuwa, ne fipande fya muli bamagazini ifilanda pa mitwe ya malyashi iyalekanalekana iya mu Malembo. Mu kulundapo, ishi mpapulo shibomba ne milandu ya lupwa, shikuulilila icitetekelo cesu muli Lesa na Baibolo, shitulenga ukuwamyako mu kulamuka kwesu ukwa kushimikila, kabili shitwaafwa ukumfwikisha amasesemo ya Baibolo.

Ubwingi bwa mpapulo shapulintwa na Sosaite mu kati ka myaka yapitapo 20 e ko shicili. Nga ca kuti e lyo fye wishile mu cine, kuti caba icisuma kuli iwe ukukwatako ifyo fitabo fyonse ifyabako mu lulimi lobe. Kuti pambi caba ukuti amabaundi volyumu aya myaka yapita aya The Watchtower e ko yali mu lulimi lobe. Ifitabo fya kuloshako ifyapulamo, pamo nga Insight on the Scriptures na Comprehensive Concordance, na fyo fyalisabankanishiwa mu ndimi shalekanalekana. Ukukwatako ifi fitabo, nangu cibe fyo, caba fye lutampulo lumo.

Ifya Kuteyanya Laibrare Obe!

Ukwishiba ukuti naukwata icitabo pa cifulo cimo cintu cayanguka, lelo ukusanga cintu ulekabila cintu cayafya. Nga ca kuti tuleonaula inshita ikalamba ku kufwaya icitabo tulekabila, mu kupalishako tukalufya ubuseko muli cene. Pa lubali lumbi, nga ca kuti natukwata ifitabo fyesu ifyatantikwa bwino, mu cifulo calinga, tukaba abacilapo kukongamina ku kucita ukusapika.

Nga cingacitika, caliba ica kwaafwa ukukwata ubwingi bonse ubwa fitabo fya teokratiki mu ncende imo. Amashelufu ya fitabo kuti yapangwa, kabili ilingi line pa mutengo unono nga nshi, nga ca kuti te kuti tukumanishe ukushita ayapangilwa libela, kabili tayakabila kusenda incende ikalamba. Ukusanga bwangu ifitabo mu laibrare na ko kwalicindama. Ifitabo ifyasungilwa mu ncende yafisama ilingi line tafibomfiwa kano fye ukukungwako ulukungu.

Ulutampulo lwakonkapo luli kuteyanya ifitabo. Inshita fye inono iyapooswapo ukutantika ifitabo mu mutande fyakonkaninamo ilaletako ifilambu.

Ni shani nga ca kuti abengi mu lupwa lobe te Nte sha kwa Yehova? Nangu ca kuti te kuti pambi ube na maka ya kuteyanya laibrare nga fintu wingatemwa, mu muputule obe wine kuti pambi wakwatamo shelufu wa fitabo uyo akwetemo impapulo shimo isha mu Malembo.

Laibrare wa Teokratiki Kuti Aafwa Ukukuulilila Bumupashi

Lintu twatantika ifitabo fyesu, tukabila inshila imo iya kusangilamo ifyebo. Kuti pambi twaliba aba cilafi, kabili pambi te kuti pa lwesu tube ababeleshanya ne fyaba mu citabo icili conse muli laibrare wesu uwa teokratiki. Nangu ni fyo, ifyebo fyonse muli laibrare kuti fyasangwa mu kwanguka. Watch Tower Publications Index kuti yatulenga ukusanga ifyebo fya kulungatika mupepi na pa mutwe we lyashi uuli onse mu nshita iipi nga nshi.

Julián, uwabomba pa myaka iingi pamo nga painiya waibela kabili eluda, alondolola ukuti Index yalikatama mu kusambilisha umwana mwaume wakwe kasuli ukucita isambililo lya pa lwakwe. “Jairo, uuli ne myaka ya bukulu cinelubali, abwelele ukufuma ku sukulu bulya bushiku no kunjipusha ati, ‘Tata, cinshi cintu Sosaite yalandapo pa lwa madainoso?’ Ilyo line twaile kuli Index no kufwaya ishiwi ‘dinosaurs’ (amadainoso). Mu kwangufyanya nga nshi twasangile ukukonkana kwa fipande fya muli Loleni! pali uyo mutwe we lyashi. [February 8, 1990] Bulya bwine bushiku, Jairo atendeke ukubelenga wene. Kale kale alishiba ukuti laibrare wesu uwa teokratiki alikwata ifyebo fyakatama mupepi na pa mutwe we lyashi uuli onse. Pa lwandi, ndi uwashininwa ukuti lintu abana besu basambilila ukubomfya bwino laibrare wa teokratiki, cilabaafwa ukukula lwa ku mupashi. Balasambilila ukupelulula, kabili ne cacilapo, balasanga ukuti isambililo lya pa lwabo kuti lyaba lya kuipakisha.”

Fausto, wishi kwa Sherezade uulumbwilwe pa kutendeka, asumino kuti ulingile ukutampa mu kubangilila nga nshi ukukansha abana ukubomfya laibrare wa teokratiki. “Kale kale tulelanga Sherezade, uyo nomba ali ne myaka ya bukulu mutanda, ifya kubomfya Index,” e fyo alondolola. “Apantu alacebushiwa ne cilolelo ce sonde lya Paradise, twatendeke pa kumulanga ishiwi ‘paradise’ muli Index kabili lyene ukufwaya ifipande fya mu Ulupungu lwa kwa Kalinda ifyalumbwilwe. Ilingi line twalemulanga fye ifikope. Nangu ni fyo, ukupitila muli iyi nshila alisambilile ukuti Index e lufungulo ku kusanga ifyebo muli laibrare wesu uwa mu ŋanda. Twaishileishiba ukuti alyumfwile cintu twalelandapo lintu abwelele ukufuma ku sukulu bushiku bumo mu kuba ne cipusho pa lwa kusefya Isita. ‘Mulandu nshi tushingamwena muli Index?’ e fyo aipwishe nyina.”

Te mulandu no mushinku wesu, Baibolo itukoselesha ‘ukulingulula fyonse; ukwikatisha icawama.’ (1 Abena Tesalonika 5:21) Ici cifwaya ukuti tubebete cintu Amalembo yasosa. (Imilimo 17:11) Nga ca kuti natukwata laibrare wa teokratiki uwateyanishiwa bwino, ukusapika kwa musango yo kuti kwaba ukwa buseko. Inshita imo na imo twabomfya laibrare wesu mu kutunguluka ku kupekanya ilyashi, ku kusanga ukufunda kubomba pa fya kubomba ne mpika, nelyo ukusangako ifyebo fya kulengo buseko, cikalimba pali ifwe ubucindami bubomba ubwa laibrare wesu.

Abafyashi ba kwa Sherezade balondolola ukuti: “Mu cinshingwa-ŋanda ca Bwina Kristu, laibrare wa teokratiki mu cine cine taba cintu cishikabilwa sana!”

[Akabokoshi pe bula 30]

NI SHANI FINTU WINGATANTIKA IFITABO FYOBE?

Takwabako amafunde yapampamikwa pa fya kuteyanya ifitabo fyobe. Nangu ni fyo, imyakanishishe yakonkapo iyakonkana ilelangilila inshila imo wingatantikilamo ifitabo fyobe ukulingana ne fyabamo.

1. Ifitabo ifyo fyakwata ukubebeta kwa cikomo ne cikomo ukwa mbali shimo isha Baibolo

(Ifya kumwenako: Umuntu Wakulisha Uwabalile Abako Uwa Mweo, Ukusokolola—Akalume ka Kuko Kakalamba Nakapalama!)

2. Ifitabo fyaampana ku bumi bwa lupwa

(Ifya kumwenako: Ukulenga Ubumi bwa Lupwa Lobe ubwa Nsansa, Ifipusho Abacaice Bepusha—Ifyasuko Fibomba, Icitabo Candi ca Malyashi ya mu Baibolo)

3. AmaBaibolo ne fitabo fya kuloshako

(Ifya kumwenako: New World Translation of the Holy Scriptures—With References, amaBaibolo yambi, Watch Tower Publications Index, dikishonari musuma)

4. Ifitabo ifyo pali ndakai filebomfiwa kwi Sambililo lya Citabo pa Cilonganino na Isukulu lya Butumikishi bwa Teokratiki

5. Amakaseti ya mu cilimba na matepu ya video

6. Amabaundi volyumu aya The Watchtower na Awake!

7. Ilyashi lya kale ilya Nte sha kwa Yehova

(Ifya kumwenako: Ifitabo fya Yearbook of Jehovah’s Witnesses, Jehovah’s Witnesses—Proclaimers of God’s Kingdom)

8. Ifitabo na mabroshuwa ifyo tubomfya lyonse mu butumikishi bwesu

(Ifya kumwenako: Kuti Waikala Kuli Pe na pe muli Paradise Pe Sonde, Ukupelulula Ukufuma Mu Malembo, Ukusapika Lesa Ukwa Mutundu wa Muntu, Baibolo—Cebo ca kwa Lesa Nelyo ca Muntu? Abaikatana mu Kupepa Lesa Umo Eka Uwa Cine)

[Icikope pe bula 31]

Sherezade kale kale alisanguka umusambi wa Baibolo uwasalapuka

[Icikope pe bula 31]

Nangu cingati munono, uyu kalume alebomfya laibrare wa teokratiki

Ukulundwako kwi Bumba Litungulula

MU KUBA ne cilolwa ca kwingilishako ababomba mwi Bumba Litungulula ilya Nte sha kwa Yehova, ukutendeka pa July 1, 1994, icilundwa calundwako nacisanshiwako kuli baeluda 11 abo balebombamo pali nomba. Icilundwa cipya ni Gerrit Lösch.

Munyina Lösch aingile mu mulimo wa nshita yonse pa November 1, 1961, kabili apwishishe isukulu mwi kalasi lyalenga 41 ilya Watchtower Bible School of Gilead. Abombele mu mulimo wa muputule no wa citungu mu Austria ukufuma mu 1963 ukufika mu 1976. Aupile mu 1967, kabili wene no mukashi wakwe, Merete, pa numa babombele pa myaka 14 nge filundwa fya lupwa lwa Bethel ya Austria mu Vienna. Imyaka ine iyapitapo baliseshiwe ukuya ku cishinte cikalamba ica Sosaite mu Brooklyn, New York, uko Munyina Lösch abomba mu maOfesi ya Bwangalishi kabili ngo wa kwafwilisha kuli Komiti wa Mulimo. Mu kuba no kubelesha kwakwe ukwa mbali shalekanalekana mwi bala lya ku Europe no bwishibilo bwakwe ubwa ciGerman, iciNgeleshi, iciRomanian, ne ciItalian, akacito kusangwilako kwakatama ku mulimo we Bumba Litungulula.