Abacaice ‘Abatetekela Yehova’

TE MISEPELA yeka fye iyayemba, kabili te bakalamba beka fye abakwata amano. (Linganyako Amapinda 11:22; Lukala Milandu 10:1.) Ukucila, abo bakwata ukuyemba kushipwa na mano yene yene ni abo abatetekela Yehova kabili abasosa no mutima onse pa lwa wene abati: “Lesa wandi ni mwe.”—Ilumbo 31:14; Amapinda 9:10; 16:31.

Ukushinguluka icalo conse kuliko icinabwingi icilekulilako ica bantu bayemba, bonse abaice na bakalamba, abo balangisha amano yabo pa kubombela Lesa no kushimikila imbila nsuma ya Bufumu bwa kwa Lesa. Ku ca kumwenako, languluka Sabrina wa myaka ya bukulu cinekonsekonse.

Sabrina ekala mu Germany kabili ali mwi gredi lyalenga bubili. E Nte ya kwa Yehova uwa kubalilapo ukusambilila pe sukulu ayako. Ku ca bulanda, aali ca kutontapo ca musaalula ukufuma ku banankwe ba pa sukulu ukufikila ubushiku kafundisha aipwishe abasambi ukwisa ne citabo cabo ico batemwisha ku sukulu. Sabrina apingwilepo ukwisa ne Icitabo Candi ca Malyashi ya mu Baibolo. Icungulo bushiku pa ntanshi ya kusenda cene, nangu ca kuti aali no mwenso, alipekenye isambililo bwino. Apantu kwaliko abasambi 26 mu kalasi lyakwe, aishibe ukuti pambi taali na kukwate nshita ikalamba. Lelo aali uwapampamina ukukanaleka uuli onse ukucilima imipeelele yakwe kabili aali uwashininkisha ukuti Yehova aali no kumwaafwa. Pa bushiku bwasontelwe, kafundisha aipwishe uwasendele icitabo kabili uwingatemwa ukuba umutanshi ukulangisha cene. Ku ca kupapusha, ni Sabrina eka fye wasendele cene. Aiminine pa ntanshi ye kalasi no kutendeka ukulanda, ukubelenga no kutambisha ifikope ukufuma mu citabo no kulondolola ukuti fyonse fye fyashimpwa pali Baibolo. Mu kwisalila aipwishe ukuti: “Nani engatemwa ukukwatako ici citabo?” Apeele kope umo kuli kafundisha, kabili mu nshiku shinono ishakonkelepo, apeele ifitabo fyalundwapo ikumi ku banankwe ba mu kalasi bamo. Ukulandapo kwa kwa kafundisha wakwe pa mipeelele yakwe kwali fye kwa kuti: “Nshabala monapo.” Apeele Sabrina amatoni yasumbukisha pa mulimo wakwe.

Na kuba, Inte shacaice ishingi ni bakasabankanya ba nsansa aba mbila nsuma pa sukulu. Ica kumwenako na cimbi ni Erika, kasabankanya wa myaka ya bukulu 11 mu Mexico. Alisambilishiwa ukutula ku bunya ukutemwa Yehova. Umulimo wakwe uwa ku sukulu wabo wapulamo. Pa milimo bamupeele pali umulimo wa kupekanya ifyebo pa lwa bulwele bwa AIDS no kukunkuma kuli fwaka ne fya kunwa fikola. Alipekenye bwino, ukubomfya magazini wa Loleni!, kabili apokelele amatoni yasumbukisha. Kafundisha wakwe aipwishe uko afumishe ifyebo kabili alipeelwe bamagazini abakwetemo ifipande pali iyo mitwe ye lyashi. Pa numa, kafundisha abomfeshe aba bamagazini ukulanshanya imitwe ya malyashi ne kalasi lyonse. Pa mulandu wa myendele ya kwa Erika, umucinshi kuli bakafundisha bakwe, na matoni yakwe ayasumbuka, alifikapo ukupokelela ifya bupe, amadiploma, no kwaafwa kunono ukwa mu fya ndalama ku masambililo yalundwapo. Nangu ni fyo, ayumfwa ukuti ukunonkelamo kwakwe ukwakulisha kwaba kwa kuti aliishibisha umwine pamo nga umo uwa Nte sha kwa Yehova, aliba na maka ya kushalika impapulo sha Baibolo, kabili alikusha ishina lya kwa Lesa.

Lyene kuliko Shannon, kalume wa myaka ya bukulu ikumi uwikala mu New Zealand. Akwata fye ilinso limo; limbi lyatulike pa mulandu wa kansa lintu aali akanya. Lintu Shannon aali ne myaka cinelubali, nyina atendeke ukusambilila Baibolo ne Nte sha kwa Yehova. Nangu cibe fyo, mu kwangufyanya pa numa atampile amasambililo yakwe aya Baibolo, atendeke ukwikala no mwaume ukwabula ukuupana kabili apingwilepo ukuleka ukusambilila. Shannon apaapeete ukuti isambililo lyakwe ilya Baibolo lingatwalilila. Ukufwaya kwakwe kwalipeelwe. Inte shatwalilile ukutandala, kabili mu kupelako ifilundwa fyonse fitatu ifya mu ŋanda basambilile Baibolo no kucito kulunduluka kwa ku mupashi. Pa numa ya kuupana mwi funde, nyina kwa Shannon na wishi wa kusangamo balibatishiwe.

Bushiku bumo Shannon na muka kangalila wa muputule baali mu mulimo wa mwi bala capamo. Mwine ŋanda aipwishe Shannon ukuti: “Cinshi cacitike ku linso lyobe?” “Lyaliketwe na kansa, kabili lyalilobwelwemo,” e fyo ayaswike. “Mu kwangufyanya Yehova ali no kumpeela ilipya mu Paradise, kabili ico e co twishile ku kumweba.”

Bakabilisha Ba Bufumu Bacita Lipoti

Ukushangila Kulaletako Ifilambu Fyafumba

YESU asobele ukuti abakonshi bakwe bakapakaswa, kabili e fyasobele no mutumwa Paulo, nga fintu calondololwa pali 2 Timote 3:12 ukuti: “Awe na bonse abalefwayo kwikala umwabela bukapepa muli Kristu Yesu bakapakaswa.” Lelo ukushangila mu kubombela Yehova Lesa kulaletako ifilambu fyafumba.

◻ Ici e fyo cali mwi tauni lyabela ku lulamba lwa pa kati ka kapinda ka ku kuso na kabanga ulwa Malaysia. Nangu ca kuti aali muBuddha wakosa uwasambilishe abana bakwe apakalamba, wishi tali na maka ya kucilikila abana banakashi bakwe batatu na bana baume batatu ukufuma ku kusambilila Baibolo ne Nte sha kwa Yehova. Nelyo fye mukashi wakwe alangishe ubuseko mu cine. Lyene bushiku bumo umwina mupalamano alimupumishe ati: “Ni shani fintu wingafilwa ukulama abana bobe no kubaleka ukusanguka Inte sha kwa Yehova? Abana bandi bonse balambatila kuli ine no butotelo bwesu ubwa fikolwe ubwa ciBuddha. We bulanda we!”

Wishi abutukile ku ŋanda ukutiinya ukuuma nkashi uwaletungulula isambililo ku bana bakwe. Nangu cibe fyo, abana bakwe balimutalalike no kutwalilila ukusambilila Baibolo ne Nte sha kwa Yehova no kusangwa ku kulongana mu kuba no kwaafwa kwa kwa nyinabo.

Mu kupelako, nangu cibe fyo, wishi aitile ulupwa lonse pa ntanshi yakwe. “Salenipo,” e fyo apindile, “pali ine kabili ukwikala pa ŋanda na pa kusanguka Abena Kristu kabili lyene ukufuma pa ŋanda.” Umukalamba pa bana baume, kalume we shiwi lyanakilila nga nshi, mu kwangufyanya atendeke ukulonga pa kuti engaya. “Iyo!” e fyapundile wishi. “Apantu bonse muli bana ba bucipondoka, cawamapo ine ukufwa.” Lyene alilompweke ukufuma mu ŋanda, ukukonkwapo no lupwa lwakwe, abamupaapeete ukukanaipaya. Uwaebekeshiwa ku kupaapaata kwabo, alibwelelemo ku ŋanda.

Inshita yalipitilepo. Wishi atendeke ukumona ukusonga kusuma ukwa cine ca Baibolo pa mibele ya bana bakwe. Bushiku bumo akumenye cibusa wakwe uwalemupumya, pali nomba uwa bulanda, uwatile: “Ninengwe nsoni nga nshi ku bana bandi. Balemfinsha no kunjibila.” Lelo wishi uyo abana bakwe balesambilila ne Nte sha kwa Yehova atile: “Iye, abana bandi balipusanako! Baliba aba cikuuku nga nshi kuli ine kabili balingafwile fye no kulipila inkongole shandi isha motoka ilintu nshalebomba.”

Ilelo, abana banakashi batatu na nyina balibatishiwa. Umwana mwaume umo ni painiya waibela. Kabili ni shani pa wali kale wishi wakosa kabili umukali? Nomba aliba uwa bucibusa kabili alisangwa na ku Cibukisho.

Yehova alambwile umwana mwaume ne nkashi shakwe shitatu capamo na nyinabo pa kushangila kwabo kuli Wene. Nomba baba ni bakashimikila ba Bufumu abapimpa, ukulenga umutima wa kwa Yehova ukusamwa.—Amapinda 27:11.