Ibukisha Kalenga Obe Mu Bwaice Bobe

“IMISEPELA Ishaikushiwa: Icishinka ca Bumi bwa pa Kati ka Nko.” E fyabelengelwe umutwe wa lyashi uwa cipande muli The Star iya ku Johannesburg, South Africa. Umutwe wa lyashi ku cipande wabelengelwe ukuti: “Mu kuba no bwingi bwa bantu ubwafulisha ubwa misepela nomba abalolenkene na mashuko ya mu nshita ayapelela ayo mu kulundapo yalecefiwa ku kubwela pa nshi ukwa bunonshi ukwa mu kusalala kwa calo, ukukanaikushiwa kwa misepela mu misumba iletanunuka kwaba cishinka camonekesha ica bumi bwa pa kati ka nko. Mu fimfulunganya fya mu Miami, mu San Salvador, mu Managua, mu Teheran na mu Cape Town mwalimo ulubali lumo lwa mu cinkumbawile—mu mulandu uuli onse aba kubalilapo ukwipaya nelyo ukwipaiwa baali misepela.”

Ico casabankanishiwe imyaka imo ikumi iyapitapo, kabili imibele yalibipilako ukutula ilyo. Mulandu nshi uwa kukanaikushiwa kwa musango yo pa kati ka bacaice mu kusalala kwa calo? Ukukanashikatala kulekulilako ukwa iyi micitile ya fintu kwaba mu cine cine ca kusangwilako. Ukubulwe ncito kwafika pa cipimo cikalamba. Kabili mu kuba no kubotelela kwayangufyanya ukwa bumi bwa lupwa, mutelelwe nshi uliko ku bacaice? Te ca kupapa ukuti bamo balabwekeshapo ukusansa icalo cacila pa kulama kwabo. Bushe ici tacili ni pa mulandu wa kuti balabulisha isubilo lyashininkishiwa ilya kushimpapo ubumi bwabo?

Umo kuti aenekela amabutotelo ya calo ukuletako isubilo lya musango yo. Nalyo line, umusepela umo alembele ukuti: “Nimfulunganishiwa nga nshi. . . . Nalikwata ifibusa ifingi, ababa ku mabutotelo ayengi ayapusanapusana, kabili baba fye cimo cine nga ine. Mu cituntulu naliba uwafulunganishiwa apakalamba nshaishiba ica kusuminamo na kabili. Napapata, bushe kuti mwampelako ukupanda amano kumo?” Kupanda amano nshi wingapeela uwacaice wa musango yo?

Imisepela ikakatila mu kupalamisha ku Cebo ca kwa Lesa ne cilonganino ca cine ica Bwina Kristu balipusuka ukufuma ku kufulunganishiwa kwa musango yo ku kukalipa kwa mutima. Ilintu abacaice abengi tabakwata isubilo lyashininkishiwa ilya ku nshita ya ku ntanshi, imisepela ya Bwina Kristu icetekela muli Yehova ne Cebo cakwe icashininkishiwa ica cine. E ico, balikwata icilolelo ca kupusunsuka impela ya iyi micitile ya fintu mu kuba no bumi bwa ciyayaya mu cilolwa. Pa numa ya ico, pe sonde lyasangululwa ukufuma ku lufyengo no bubifi, bakapanga ulubali lwa ntendekelako ulwa “calo cipya” umo “mwaikala ubulungami.” (2 Petro 3:13; Yohane 17:3) Ku kufikwapo kwa filolelo fyakatama ifya musango yo, abacaice balekonkomeshiwa ‘ukwibukisha Kalenga wabo.’ (Lukala milandu 12:1) Kabili ukupanda amano kwawamisha uko ukwingapeelwa ni uko ukwa ukuti baba kabili batwalilila ukuba ulubali lukalamba ulwa cilonganino ca Bwina Kristu. Mulandu nshi uwa ici?

Ubwingi ubwa imwe mwe bacaice mu cilonganino ca Bwina Kristu mwakwata abafyashi abasumina abamutemwa kabili abamusakamana. Icilonganino cimo cimo calikwata baeluda basontwa, abasekelela apakalamba mu busuma bwenu ubwa ku mupashi. Ukwaafwa kwa musango uyo no kusakamana takulingile ukucefiwa. Icine ukufuma mu Cebo ca kwa Lesa, pamo pene no butungulushi bwa teokratiki, fikamupeela umutelelwe, ubuntungwa ukufuma ku kufulunganishiwa, ne subilo lyashininkishiwa ilya ku nshita ya ku ntanshi. Ici conse cikamwaafwa ‘ukukwate citetekelo na kampingu musuma’ no kulambatila kwi subilo ilyo ilyapala inanga iicingilila ingalaba ukufuma ku busanso bwa kubunda muli bemba wa mabimbi.—1 Timote 1:18, 19; linganyeniko AbaHebere 6:19.

Taluka ku Kubeleleka kwa Calo

Te mulandu no kufula kwa mapaalo ya ku mupashi ayo yantu imwe mwe bacaice mwingaipakisha mu cilonganino ca Bwina Kristu, icibelesho ca bambi ca kukonkelela inshila sha ku calo. Cili kwati baleyumfwa ukubulisha icintu cimo icalinga ico icingasangwa fye mu calo ku nse ya cilonganino ca Bwina Kristu. Lelo bushe icalo calikwata icili conse icalinga ica kutambika?

Pa numa ya kupoosa ukucila pa myaka 40 mu butumikishi bwa nshita yonse, umo uwa babomfi ba kwa Lesa abikile imilandu muli iyi nshila: “Ulubali lweka fye ulwa bumi ulo nayumfwililepo ubulanda lubali ulo naikele pa ntanshi nshilaisa mu cine. Pali iyo nshita nali ulubali lwa calo. Naikaliile fye icalo. Ilyo nafikile pa myaka ya bukulu 18 naloleshe mu numa mu bumi bwandi, namwene ifyo bwali ubwabulwamo akantu. Takwaliko ubuyo, takwali imifwaile, ku bumi bwandi. Umusamwe wa ku calo uyo natontonkenye ukuti naliipakishe mu cituntulu waletele fye ukufulunganishiwa no bulanda. Natendeke ukusapika icine. Nalicisangile kabili umwaka umo pa numa natendeke ukuibimba mu mulimo wa nshita yonse. Nshakwete indalama, ukubelesha fye kwa pa mwaka umo mu cine ne citetekelo ukuti Yehova ali no kuntungilila. Nomba ilyo ndolesha ku numa mu bumi bwandi, ifiputulwa fibili muli fitatu ifyo napoosa mu mulimo wa nshita yonse, naliba uwa nsansa apakalamba nga nshi. Nshakatale mfwaya ukukabushanya ico nanonka ukufuma ku kubombela Yehova ne cili conse ico icalo cili no kutambika.” Mu cine cine, ici cibwekeshapo ukuyumfwa kwa makana ya Nte sha kwa Yehova.

E co mulandu nshi ukufuluka ifintu ifyo Abena Kristu bambi basha ku numa? Mulandu nshi ukufulukila ifintu ifyo ifileya ku bonaushi? (1 Yohane 2:15-17) Pamo ngo wacaice, nakalimo uleyumfwa ukuti ukubombela Yehova kuli ukwa kucilikila nga nshi kabili kuti kwakulenga ukuipusula ubuseko buntu icalo citambika. Lelo bushe cilimo amano ukumona abafyashi bobe na baeluda nga bacilikila nga nshi ilyo balefwaya ukukwaafwa ukusekesha Yehova no kunonka ubumi bwa muyayaya?

Nga ca kuti nyina uuletuma umwana wakwe kwi tuuka lya cikaya amucinkulako ukwiminina no kulolesha ku ntunga shonse pa ntanshi talaciluka musebo, bushe kuti wamulanguluka ukuba uwacishamo kucilikila? Ukucila, bushe mu kubamo ukutemwa taleesha ukucingilila umwana wakwe? Tutile umwana asuula ukusoka kabili apunkwa kuli motoka no kwipaiwa? Bushe na kabili kuti wayumfwa ukuti nyina ali uwa kucilikila kwacishamo? Kwena, kuti pambi watontonkanya ukuti alingile nga alibuulile ukusokela libela ukwingi ku kucingilila ubumi bwa mwana wakwe! Mu kupalako, ifishimiko ukufuma mu Cebo ca kwa Lesa no kuteyanya kwakwe filapeelwa mu kubamo ukutemwa, te pamo nge fya kucilikila lelo ku kucingililwa kwesu.

Ukukulila mu ŋanda ya Bwina Kristu takwakumanina ku kukulenga ukushipikisha ukucimfya kwa ici calo. Ulekabila na kabili ukuba uwashininwa pa lobe ulwa cine ca Cebo ca kwa Lesa. Ukushininwa kwa musango uyo ukwa pa lobe no kutemwa kuli Kabumba kupanga icitendekelo ca kupeela ubumi bobe kuli Lesa. Uku kushininwa kwa pa lobe kwaliba ukwakabilwa na kabili pa kuti wingaba na maka ya kupokolola icitetekelo cobe pa ntanshi ya bambi. (1 Petro 3:15) Ukutungululwa ne Cebo ca kwa Lesa e citendekelo ca bumi bwatunguluka. (Yoshua 1:8; Ilumbo 119:9) Lelo pa kutunguluka mu bumi, ulekabila na kabili ukukanshiwa kusuma.

Ukupeela Ukukansha kwa Kulungatika

Mu kushininkisha, mwe bafyashi ba Bwina Kristu kuti mwaba abasekelela ukumona abana benu ukubuula ukwiminina kwashangila ku cine no kutwalilila abaikatana na imwe mu kupepa kwa cine. Mu kutendekelako caba cishingamo ca kwa wishi ukukusha abana mu “kufunda no kukonkomesha kwa kwa [Yehova, NW].” (Abena Efese 6:4) Bushe kuti mwamona incende umo mulekabila ukuwamya mu kukansha bene? Bushe mulepoosa inshita yakumanina na bana benu? Bushe mucite fintu pamo ngo lupwa? Kabili bushe mulaipakisha ukukokoloka kusuma capamo?

Mwilaba ukuti ukwimika kwenu ica kumwenako calungama calikwata ukwambukila kwa maka pa bana benu. Nga ca kuti mulefwaya bene ukubuule icine mu kukatama, lyene iyo e nshila mufwile ukucimwenamo. (3 Yohane 2-4) Kabili nga ca kuti mulefwaya bene ukulundulula umucinshi washika ku kuteyanya kwa kwa Yehova na kuli baeluda, lyene mulingile lyonse ukukwata imibele isuma iya musango uyo mwe bene.

Nangu cingati ukukansha kwa bana mu kutendekelako mulimo wa bafyashi, baeluda na bo bene balikwata icishingamo ukulola ku bacaice mu cilonganino. Mu kusakamana umukuni wa kwa Lesa, bakangalila na bo bene bakabila ukucema abana ba mpaanga. (1 Petro 5:1-3) We ca kumwenako cisuma cintu Yehova aimika kusakamana mu cikuku nelyo fye abanono! (Esaya 40:11) Ukwankula ku ca kumwenako cakwe, bakacema banono aba Bwina Kristu na bo bakafwaya ukulangilila ubuseko bwa cikabilila, no bwa kutemwa mu bacaice no kubalenga ukuyumfwa ukuba ulubali lwa cilonganino. Imisepela bamo balilumbulula ukufwaisha kwa kuti baeluda balelanda kuli bene libili libili nga nshi no kubafwilisha mu butumikishi bwa mwi bala.

Ukukansha uwacaice cipilibula ifyafulilako ukucila pa kumupeela ukwishiba kwa ku mutwe ukwa Malembo. Ukufuma pa mutima wakwe, afwile ukupata ico Lesa apata no kutemwa ico Lesa atemwa. (Amose 5:14, 15) Nga ca kuti ali no kwibukisha Kalenga wakwe mu bwaice, alekabilwa ukusalapulwa kwa mu Malembo pa kwenda mu nshila ya kwa Yehova iya bulungami. (Amapinda 22:6; 2 Timote 3:16) Abafyashi tabalingile ukuleka ukusalapula kukabilwa. Abafyashi bamo abafwaya ukusungilila bucibusa bwa mwana te mulandu ne ca kufumamo bakongamina ku kusuula incitilo yalubana, ukusuulako ukubipisha kwa iko. Balasongwa no mulekelesha wa ku calo. Lelo caba mufyashi wakwato kutemwa e upeelako ukusakamana ku malipoti ya kuti umwana wakwe ali ne mibele yabipa no kupeela ukusalapula kwalinga nga fintu kulekabilwa. (Amapinda 13:24) Mu cituntulu, mufyashi nshi uwa Bwina Kristu ufwaya ukusungilila bucibusa bwashimpwa pa mulekelesha lelo ukulufya umwana wakwe pa mulandu wa kubulisha ukusalapula kwalinga?—Amapinda 22:15.

Kwata Imifwaile mu Bumi

Yehova Lesa atupangile ica kuti tunonke ubuseko bwesu ubukalamba no kwikushiwa ukufuma ku kubombela wene. Tontonkanya pa lwe bala lyakulisha lintu imwe mwe misepela mwingalundulula. Mupepi na citika wa bwingi bwa bantu mu calo baba ba myaka 20 iya bukulu nelyo abacepako. Aba bacaice baleendaenda muli bemba wa buntunse. Ilintu bashikwete isubilo, imwe mwe misepela ya Bwina Kristu mwalikwata isubilo lyashininkishiwa ne cintu cimo icawamina ukwakana na bene. Ukupitila mu myendele yenu isuma iya Bwina Kristu no kupimpa kwenu ku mulimo wa kwa Yehova, kuti mwacebusha abengi ukwisa ku cine. Muli fyo kuti mwabaafwa ukuba pa nshila ya bumi.

Buyo nshi ubwacilapo kulinga buntu wingakwata ukucila pa kupeelesha ubumi bobe ku mulimo wa kwa Yehova Lesa? Bushe walibala autontonkanyapo ulwa kubuula umulimo wa kushimikila uwa kupususha ubumi uwa nshita yonse? Napamo kuti wayakana mu kwananya imbila nsuma pamo nga painiya, nelyo kuti wabomba pali limo ilye ofesi lya musambo ilya Watch Tower Society uko ifitabo fya Baibolo fipayanishiwa. Nangu nga te kuti ucite fyo, bushe taulingile ukupanga ukupepa kwa kwa Yehova imibombele ikalamba mu bumi bobe, muli fyo ukwibukisha Kalenga obe? Naukwata umulimo wawamisha uwa kucita. Ukufikila ukupwa kwa ii micitile ya fintu, kanshi, ba uwa mupampamina ku ‘kupikintika pe mu mulimo wa kwa Shikulu’—1 Abena Korinti 15:58.

E ico twalilileni imwe mwe misepela ya Bwina Kristu. Ibukisheni Kalenga wenu nomba, kabili akamubaka lintu aleta ici calo cabula bukapepa ku mpela. Ee, Yehova akamucingilila pali iyo nshita no kumupaala mu kuba ne nshita ya ku ntanshi iyabule mpela, iyakatama.