Mulandu Nshi Ukulengulwa na Yehova Kwabela Ukwa Kunonsha?

¹ Uuli onse alafwayo butuntulu bwa bumi ubusuma. Bulenga ukuti tucilepo kuipakisha ubumi. Nalyo line, abengi abaipakisha ubutuntulu bwa bumi ubusuma balaya mu kubebetwa mu nshita mu nshita. Mulandu nshi? Bafwayo kwishiba ubwafya ubuli bonse pa lwa butuntulu bwa bumi ubwingemako pa kuti bengabombelapo ku kundapa bwene. Calicilanapo kucindama ukubakililo butuntulu bwesu ubwa bumi ubwa ku mupashi. Ukusenaminwa kuli Yehova kwashintilila pa kutwalilila kwesu ukuba “abatuntulu mu citetekelo.”—Tito 1:13.

² Nomba e nshita yalingisha iya kubebetwa kuli Yehova. Mulandu nshi cibelele fyo? Pantu Yehova ali mwi tempele lyakwe ilya mushilo, kabili alelengule mitima ya bantu bonse. (Ilu. 11:4, 5; Amapi. 17:3) Ukupala Davidi, tulomba Yehova ukutulengula mu kukumanina atuti: “Nenguleni, mwe Yehova, no kunjesha; lenguleni imfyo shandi no mutima wandi.”—Ilu. 26:2.

³ Tufwile ukuba abapempwila pa lwa fingonaula ubutuntulu bwesu ubwa ku mupashi ifingafuma muli ifwe bene pa mulandu wa mubili wesu uushapwililika. Amapinda 4:23 yafunda ati: “Ukucishamo ku kubaka konse, lindo mutima obe, pantu muli wene e mwaba amatuntuko ya mweo.”

⁴ Ubutuntulu bwesu ubwa ku mupashi kuti na kabili bwaonaulwa ne ci calo catushinguluka icabotelela, kabili ica bupulumushi. Nga ca kuti twaisuminisha fwe bene ukupalamina kuli iyi micitile ibifi, kuti twatendeka ukutontonkanya nge fyo citontonkanya kabili kuti twalundulule mibele ya mutima iya ku calo. Nelyo kuti pambi twapokelela umusango wa bumi uwa ku calo no kucimfiwa no mupashi wa calo.—Efes. 2:2, 3.

⁵ Satana kuti pambi abomfya ukupakasa nelyo ukukaanya kwa kulungatika mu kubombesha kwa kutonaula lwa ku mupashi. Ilingi line nga nshi, nangu cibe fyo, mu mucenjelo abomfya ifya kucebusha fya ku calo ku kutubeleleka. Petro atucincisha ‘ukutekanya no kulola,’ apantu Satana aba nge “nkalamo iilelila, ukufwaya untu engalya.” Twacincishiwa ‘ukumukaanya; ukwiminina abakosa ndi mu citetekelo.’—1 Pet. 5:8, 9.

⁶ Kuliko ukukabila kwa kucingilila ubutuntulu bwesu ubwa ku mupashi, ukusungilila icitetekelo cesu icakosa ukupitila mu kukosha cene cila bushiku. Umutumwa Paulo atwebo ukuti tuleesha icitetekelo cesu lyonse fye. Pamo fye nga fintu mano mano tumfwila ukupanda amano ukufuma kuli dokota wafikapo, e fyo na kabili tukutika kuli Yehova lintu ukulengula Kwakwe ukwa ku mupashi kwasokolola impika iilekabila ukulungikwa. Ici cilenga ukuti “tuteululwe.”—2 Kor. 13:5, 11, NW.

⁷ Yehova mu cine cine ni Kalengula mukalamba. Ukupima kwakwe lyonse kuntu kwalungikwa. Alishiba mu kulungatika cintu tukabila. Ukupitila mu Cebo cakwe no “musha wa cishinka,” alatupeela ica kulya pa kuti tube abatuntulu lwa ku mupashi. (Mat. 24:45; 1 Tim. 4:6) Ukulya lyonse ici ca kulya ca ku mupashi icabamo mulyo pa ŋanda na pa kulongana kwa cilonganino kutulenga ukutwalilila ukuba abatuntulu lwa ku mupashi. Ukutukusha bumupashi bwesu lyonse mu butumikishi na mu mibombele imbi iya Bwina Kristu na ko kwa kunonsha. E ico, tulasengela ukulalengulwa na Yehova lyonse, abacetekela ukuti akatusungilila mu butuntulu bwa ku mupashi ubwawamisha.