Tulakabila Icilonganino
1 Abana ba kwa Kora inshita imo balumbulwile fintu batesekeshe icilonganino ca kwa Yehova muli iyi nshila: “Ubushiku bumo mu mansa shenu bwawama ukucile nshiku ikana limo pa nse.” (Ilu. 84:10) Kuli bene, takwaliko cintu icalo cali no kubatambika icali no kucila pa cilonganino. Nga ca kuti e fyo na iwe uyumfwa, ufwile ukulenga icilonganino ukuba icintu cacindama mu bumi bobe.
2 Ukutula pa kutendeka kwa ciko, icilonganino ca Bwina Kristu calilangisha ukuti calikwata ipaalo lya kwa Yehova. (Imil. 16:4, 5) Takufwile ukubako uuli onse uwa ifwe uulingile ukumona icilonganino mu kabepekesho nelyo ukuyumfwa ukuti yaba fye ni nshila ya kutuletelamo capamo lwa ku mubili. Icilonganino cifulo ca kukoseleshiwilwapo ica Nte sha kwa Yehova mu bwikashi ubuli bonse. Cipayanya ukubishanya kwaikatana pa kuti twingasambilishiwa na Yehova no kuteyanishiwa ku mulimo wa Bufumu.—Esa. 2:2.
3 Icilonganino ca Bwina Kristu e pitilo likalamba ilye sambilisho lya cine. (1 Tim. 3:15) Abakonshi ba kwa Yesu bafwile ‘bonse ukuba bamo’—ukwikatana na Lesa, na Kristu, na umo no munankwe. (Yoh. 17:20, 21; linganyako Esaya 54:13.) Te mulandu na kuntu pambi twingaya mu calo, bamunyinefwe basumina ifisambilisho ne fishinte ifya mu Baibolo, kabili bendela umwabela fyene.
4 Tulakanshiwa no kupangashiwa ku kufikilisha umulimo wesu uwa kupanga abasambi. Umweshi umo na umo, Ulupungu lwa kwa Kalinda, Loleni!, no Ubutumikishi Bwesu Ubwa Bufumu filapeela ifyebo fishaiwamina ku kutwafwilisha ukutendeka ukulanshanya kwa mu Malembo. Ukulongana kupekanishiwa ku kutulanga ifya kusanga no kulundulula ubuseko. Ukwingilishiwako tulemona mu kusaalala kwa calo kuleshininkisha ukuti twalikwata ukutungilila kwa ku muulu muli uyu mulimo.—Mat. 28:18-20.
5 Ukupitila mu cilonganino, tulapokelela ukukoselesha lyonse ‘ukutucincimusha ku kutemwa kabili ku kubombe milimo isuma.’ (Heb. 10:24, 25) Tulakoshiwa ku kushipikisha ifya kwesha mu busumino. Bakangalila bakwato kutemwa balatwaafwa ukubomba no kutitikisha na masakamika mu kutunguluka. (Luk. Mil. 4:9-12) Tulafundwa lintu tuli mu busanso bwa kupumbulwa. Kuteyanya nshi kumbi ukupayanya ukusakamana kwa kutemwa ukwa musango yo?—1 Tes. 5:14.
6 Cili kufwaya kwa kwa Yehova ukuti tutwalilile ukupalamisha ku kuteyanya kwakwe pa kusungilila ukwikatana kwesu. (Yoh. 10:16) Inshila imo iyo icilonganino citwafwilamo ukutwalilila ukumfwana ne bumba lya musha wa cishinka kupitila mu kutuma bakangalila benda ku kutukoselesha. Lintu twayankula ku butungulushi bwabamo kutemwa tulapalamana capamo icitwaafwa ukusungililwa abakosa lwa ku mupashi.
7 Icilonganino calikatama pa kusungilila bumupashi bwesu. Te kuti cicitikeko ukubombela Yehova mu nshila yapokelelwa ukwabula cene. Lekeni, kanshi, tutwalilile ukupalamisha ku cintu Yehova apayanya. Shi natubombe mu kumfwana na mabuyo ya ciko kabili mu kufumaluka ukubomfya ukufunda tupokelela kulya. Kupitila fye muli iyi nshila mweka e mo twingalangila ifyo icilonganino cakatama kuli ifwe.—Ilu. 27:4.