Twalilila Ukuba Uwapamfiwa

NI NSHILA nshi imo iyasuminishiwa na Lesa iya kutwalilila ukubombelamo Yehova no mweo onse? Yaba kuba ne pamfya lya cine cine pa nshi ya mutima. Ukubombela Lesa mu nshila ya mweo onse kupilibula ukumubombela no mutima onse, kabili cifwaya icumfwila ca mukoosha, icapwililila ku cili conse ico atweba ukucita.

Kasesema Mose aebekeshe uku kukabila lintu akambishe uluko lwa kwa Israele ati: “Muletemwa Yehova Lesa wenu imitima yenu yonse, ne myeo yenu yonse, na ku maka yenu yonse.” (Amalango 6:5) Imyanda ya myaka iingi pa numa ilyo ikambisho limo line lyalibwekeshiwepo na Kristu Yesu uwatile: “Uletemwa sokulu Lesa ku mutima obe onse, na ku mweo obe onse, na ku kutontonkanya kobe konse.” (Mateo 22:37) Umutumwa Paulo aloseshe kuli ici cifwaikwa cimo cine lintu aebele abena Efese ukucito “kufwaya kwa kwa Lesa ku mutima,” na lintu acincishe abena Kolose ati: “Conse ico mulecita, bombeni no mutima onse, nga kuli Shikulu, te ku bantu iyo.”—Abena Efese 6:6; Abena Kolose 3:23.

Cintu cakosa, nangu cibe fyo, ukubombesha mu mulimo wa kwa Lesa nga ca kuti tatukwete ukuyumfwa kwe pamfya mu kati kesu nelyo nga ca kuti ipamfya ilyo twakwete pa nshita imo nomba nalishibantukila—napamo ukulubilila fye. Ilelo, tuleikala mu nshita ye pamfya iishingalinganishiwako ku ciputulwa ca nshita icili conse cimbi mu lyashi lya kale ilya muntu.

Ifiputulwa fya Nshita Ifya Kulungatika Ifye Pamfya

Mu nshita sha pa ntanshi ya buKristu kwaliko ifiputulwa fya nshita ifye pamfya ifyafulilako. Akasuba ka kwa Noa ne ciputulwa ca nshita icatungulwile ku bonaushi bwa Sodomu na Gomora mu cine cine fyali ni nshita she pamfya lya cine cine. (2 Petro 2:5, 6; Yuda 7) Imyaka ya pa ntanshi ya Lyeshi ukwabulo kutwishika yaiswilemo imibombele ye pamfya. Nangu cingati Noa no lupwa lwakwe tabaishibe mu kulungatika lintu Mulamba aali no kutendeka, “akatiina ka kuli Lesa” ako bakwete kalengele ukuti belatantalisha.—AbaHebere 11:7.

Mu kupalako, ilyo Sodomu na Gomora fishilaonaulwa, bamalaika “balelulunkanya Lote” no kumwebo kuti: “Butusho mweo obe.” (Ukutendeka 19:15, 17) Ee, pali kalya kashita na po, ipamfya lyalipuswishe imyeo yalungama. Imyanda ya myaka iingi pa numa bankole ba ciYuda mu Babele bakonkomeshiwe ukuti: “Kabiyeni, kabiyeni, fumeniko; icakowela mwiikatako. Fumeni mu kati ka uko.” (Esaya 52:11) Mu 537 B.C.E., mupepi na bankole 200,000 balishile Babele pa kumfwila kulya kukambisha kwa mu busesemo ukwabamo ipamfya.

Ipamfya muli imo na imo iya iyo mibele lyalengele abashininwe mu kushangila ukuti baleikala mu nshita she pamfya ukuba aba mweo onse.

Ipamfya mu Nshita sha Bwina Kristu

Libili libili tulomfwa ulwa kukabila kwa kuba abapamfiwa ukupulinkana Amalembo ya Bwina Kristu aya ciGreek. “Cenjeleni,” “loleni,” “mube abaiteyanya”—ishi shonse inumbwilo shabomfiwe na Kristu Yesu ku kulimba ukuyumfwa kwe pamfya ukwalinga mu bakonshi bakwe. (Mateo 24:42-44; Marko 13:32-37) Mu kulundapo, ifilangililo fyakwe ukukuma kuli bana cisungu 10, umusha mubi, amatalanti, no kupaatukanye mpaanga ku mbushi fyonse ficincisha ukwenekela no kubalamuna ukuyumfwa kwe pamfya.—Mateo 25:1, 14, 15, 32, 33.

Yesu talandile fye pa lwe pamfya lelo na kabili aebekeshe amashiwi yakwe pa kubomba mu kupamfiwa. Pa kashita kamo aebele amabumba lintu baeseshe ukumulindika ukuti: “Ndi no kubile mbila nsuma ya bufumu bwa kwa Lesa na mu mishi imbi, pa kuti e co natuminwa.” (Luka 4:42, 43) Mu kulundapo, akoseleshe abasambi bakwe ukulomba Umwine wa kulobolola ukutuma ababomfi bafulilako ku kulobolola Kwakwe pa mulandu wa kuti “ukulobolola kwena kukalamba, lelo ababomfi nabacepa.” (Mateo 9:37, 38) Ukulomba kwa musango yo ukwabamo ipepo kuli Lesa mu cine cine kulumbulula umupashi we pamfya.

Bushe Ipamfya lya Musango yo Talyalingile?

Bamo kuti baimya icipusho cabamo kupelulula ica kuti, Mulandu nshi ipamfya lyakabilwe ku numa kulya nga ca kuti “ubucushi bukalamba” ubwasobelwe bwali no kucitikako imyanda ya myaka iingi pa numa?—Mateo 24:21.

Kuti twaba abashininkisha ukuti tawali fye mucenjelo wa kwa Yesu uwa kusungilila abakonshi bakwe ukuba abapamfiwa mu mulimo wa kushimikila no kusambilisha. Iyo, cali kutemwa kwa kwa Kristu ukulola ku basambi bakwe, pamo pene no kumfwikisha kwakwe ukwapwililika ukwa mimwene ya kwa Yehova iya nshita, e cali intendekelo ya kufunda kwakwe pa lwe pamfya. Ee, Kristu Yesu alishibe ukuti umupashi we pamfya walekabilwa ku kupwishishisha ukufwaya kwa kwa Yehova ukulingana ne mifwaile ya kwa Lesa. Mu kulundapo, alishibe ukuti abasambi bakwe abene bene baali no kumwenamo lwa ku mupashi pa kutwalilila ukuba abapamfiwa ukufikila ilyo aali no kubwela.

Yesu Kristu aali nalangilila mu kulengama ukuti kwaliko umulimo wa kucitilo bunte uwa mu kusaalala kwa calo uwali no kucitwa kabili mu nshita iyapimwa. (Mateo 24:14; Marko 13:10) Ifiputulwa fya uyu mulimo fyalesokololwa panono panono lyeka fye ilyo umulimo walecitwa. Lelo ipamfya lyalekabilwa pa kufikilisha imibombele imo na imo. Yesu alangilile ukulunduluka kwa uyu mulimo lintu atile: “Mukabe nte shandi mu Yerusalemu, na monse mu Yudea na Samaria, no kufika ku mpela ya pano nse.” (Imilimo 1:8) Kabili iyo e nshila umulimo wasokolwelwamo ukufika na kuli kano kasuba. Waisabimbamo imbali shimo isha kuti shapesha fye na babomfi ba kwa Lesa amano, ukulenga ukuti cibe icakabilwa ukuteulula ukumfwikisha pa nshita shimo.

Ukuyumfwa kwe pamfya ukwa Bwina Kristu kwalifikilisha imifwaile ya kwa Yehova. Kwalyafwa abasambi ba kwa Kristu ukufikilisha ukulundulula umulimo wabo ukulingana ne mitantikile ya kwa Yehova iishiluba. E ico ilelo, ukulolesha ku numa mupepi ne myaka icilile pali 2,000, tulomfwikisha ilya mitantikile ya bulesa mu kucilanapo.

Ipamfya lya Bwina Kristu lyaafwile abasambi ukupeelo bunte bwakumanina mu Yerusalemu, Yudea, Samaria, na ku baYuda basalangana ilyo 36 C.E. tailafika lintu ukusenamina kwaibela kuli Israele kwaishile ku mpela. (Daniele 9:27; Imilimo 2:46, 47) Mu kupalako, ipamfya lya Bwina Kristu lyaafwile icilonganino ca mu kubangilila ukusoka mu kumonekesha abaYuda bonse ukuti mu kwipipa imicitile yabo yali no kupwa. (Luka 19:43, 44; Abena Kolose 1:5, 6, 23) Kabili pa numa yapwile mu kupumikisha mu 70 C.E., ipamfya lyaafwile inte sha kwa Kristu isha mu mwanda wa myaka uwa kubalilapo ukubilisha isubilo lya ku muulu ku bengi pa ntanshi ubusangu bwasobelwe bushilasalanganya ubusungu bwa buko. (2 Abena Tesalonika 2:3; 2 Timote 4:2) Lyene, ukupulinkana imyanda ya myaka iya Nkulo sha pa Kati, Abena Kristu banono abapala ingano basungilile isubilo lya Bufumu ilyumi, nga fintu Kristu Yesu aali nasobela. (Mateo 13:28-30) Mu kupelako, pa nshita yakwe iyasontwa, Yehova aimishe icilonganino capambana, ica muno nshiku, icaisulamo ubukombe bwakwe ubwe pamfya ubwa bupingushi ku baleikala muli ino nkulo ya kupelako.—Mateo 24:34.

Ukupala Daniele wa ku kale, Inte sha busumino isha kwa Lesa isha muno nshiku tashipama ukwipusha Yehova, ashiti: “Cinshi ico ulecita?” (Daniele 4:35) Balicetekela ukuti Yehova alishiba bwino bwino icikabilwa pa kupwilikisha umulimo wakwe ukulingana fye no kutantika. E co mu cifulo ca kutwishika inshila ya kwa Yehova iya kutantikilamo ifintu, baliba aba nsansa ukuti Lesa alibapeela ishuko lya mu nshita ukubomba na wene muli ishi nshita shacilishapo kube sha buseko.—1 Abena Korinti 3:9.

Ukukoselesha Kwalundwapo Ukwa Kutwalilila Ukuba Abapamfiwa

Umulandu na umbi twakwata uwa kubela abapamfiwa wa kuti tatwingasonta mu kulungatika ubushiku ne nshita lintu ubucushi bukalamba bukatendeka mu kupumikisha. Kristu Yesu aali uwashininkisha ukuti takuli nangu umo pe sonde uwaishiba ubushiku bwasontwa ne nshita ubwa kutampa kwa cilya ca kuponako cakakala. (Mateo 24:36) Pa kashita kambi aebele abatumwa bakwe abaswatuka ati: “Te cenu ukwishibe nshita nangu myaka ifyo Tata abikile mu maka yakwe.” (Imilimo 1:7) Ee, icikafumamo caliba icamonekesha, lelo ifyebo fyonse te fyesu ukwishiba.

Umutumwa Paulo alikwete imibele ye pamfya iyalinga. Napamo akwete amashiwi ya kwa Yesu mu muntontonkanya lintu alembele ku bena Tesalonika pa lwa kubapo kwa kwa Kristu ati: “Lelo ifya nshita ne myaka, mwe bamunyinefwe, tamwakabilo kulembelwapo icintu.” (1 Abena Tesalonika 5:1) Alembele uyu kalata imyaka mupepi na 17 pa numa Yesu abe nasosa ati: “Mukabe nte shandi . . . kufika ku mpela ya pano nse.” (Imilimo 1:8) Pali ilya nshita takwali ifyali no kulembwapo pantu takwali ifyasokolwelwe. Nangu ni fyo baali abacetekela ukuti ubushiku bwa kwa Yehova mu cine cine bwali no kwisa “ngo mupupu ubushiku” lintu Abena Kristu baali bacili abapamfiwa no kushimikila.—1 Abena Tesalonika 5:2.

Tacali na kumoneka ukuti mu kuba na aya mashiwi mu muntontonkanya, Abena Kristu ba mu mwanda wa myaka uwa kubalilapo batontonkenye ukuti ubushiku bwa kwa Yehova bwali no kwisa pa numa ya myanda ya myaka iingi. Ca cine, balishibe pa lwa milumbe ya kwa Yesu pa lwa mfumu iyaile ku calo ca kutali na pa lwa muntu uwaile ukushailepela. Balishibe, na kabili, ukuti imilumbe yalangilile ukuti imfumu yali no kubwela “mu kupelako” no muyendo aali no kubwelako “apo papite nshite ntali.” Lelo ukwabulo kutwishika bafwile baleipusha ifipusho pamo nga, Ni lilali lintu “mu kupelako” ikabako? Kabili bushe amashiwi ya kuti “apo papite nshite ntali” yalola mwi? Bushe myaka 10? Imyaka 20? Imyaka 50? Nelyo bushe kucilapo? (Luka 19:12, 15, NW; Mateo 25:14, 19) Amashiwi ya kwa Yesu yali no kutwalilila ukulaibukishiwa aya kuti: “Na imwe mube abaiteyanya; ico Umwana wa muntu akesa mu nshita mushikashile.”—Luka 12:40.

Ifya Kufumamo Fishaiwamina Ifya Kuba Abapamfiwa

Ee, ukuyumfwa kwa kuba abapamfiwa ukufuma kuli Lesa kwalikwete ica kufumamo cisuma kabili ica kukoselesha pa Bena Kristu ba mu mwanda wa myaka uwa kubalilapo, ukubaafwa ukutwalilila ukuba abapamfiwa mu mulimo wacindamisha uwa kushimikila no kusambilisha. Kwalitwalilila ukutukoselesha na ifwe ilelo mu nshile shingi. Kwatwalilila ukutusungilila ukufuma ku muleketela nelyo ‘ukufunshika ku kucite cisuma.’ (Abena Galatia 6:9, King James Version) Kulatucingilila ku kuyobekamo sana mu calo no kutemwa ifya ku mubili kwa ciko ukwa kukopeka. Kusungilila imintontonkanya yesu pa “mweo uwabo mweo wine wine.” (1 Timote 6:19) Shikulu Yesu atile abasambi bakwe baali no kuba nge “mpaanga mu kati ka mimbulu,” kabili alishibe ukukabila pa lubali lwesu ukwa kutwalilila ukuba abapampamina, abatontomesha pa kuti twingacincintila icalo. Ee, twalibakililwa, ukucingililwa kwi pamfya lyesu ilya Bwina Kristu.—Mateo 10:16.

Yehova Lesa mu mano yakwe ayashapelela lyonse alipeela ababomfi bakwe ifyebo fyakumanina pa kuti bengasungilila ipamfya lyabo ilyumi. Mu cikuuku alitwebekesha ukuti tuli mu “nshiku sha kulekelesha” isha ino micitile ya fintu iyabola. (2 Timote 3:1) Tutwalilila ukucinkulwako ukuti tufwile ukulabeka nge fyengelo ukufikila inkulo intu twikalamo yapita mu bucushi bukalamba, ubukafika pa kalume ka buko pa Armagedone.—Abena Filipi 2:15; Ukusokolola 7:14; 16:14, 16.

Ee, ipamfya lya bukapepa lyaba lubali lwacindama ulwa mulimo wa mweo onse kuli Yehova. Lilatamya no kwaafwa ukufumyapo ukwesha kwa kwa Kaseebanya ukwa kulenga ababomfi ba kwa Lesa ‘ukunaka no kuba abatompoke mitima.’ (AbaHebere 12:3) Ku ciyayaya conse, ukuipeelesha kwa bukapepa kukalenga ababomfi ba kwa Yehova ukumumfwila, lelo pali nomba, muli shino nshiku sha pa ntanshi ya Armagedone, ipamfya lyashika, ilya cine cine lyaba lubali lwacindama ulwa kuipeelesha kwa mweo onse.

Shi Yehova Lesa wesu natwaafwe bonse ukutwalilila ukuba abapamfiwa ilintu tuletwalilila ukubwekeshapo amashiwi ya mutumwa Yohane ayatila: “Amene: iseni, mwe Shikulu Yesu.”—Ukusokolola 22:20.