Kano katabo te ka kushitisha. Kakulabomfiwa mu mulimo wa kusambilisha abantu Baibolo uubombwa mwi sonde lyonse. Uyu mulimo wafwilishiwa ne ndalama sha bupe.

Nga mulefwaya ukupeela ubupe, kabiyeni pa www.pr418.com/bem.

Amalembo ayali muli kano katabo yafumine muli Baibolo​—Amalembo ya Calo Cipya.

May 2019 Printing

Cibemba (ed-CW)

UWA mano ya buntunse umwina Netherlands, Spinoza alembele ati: “Nalitukuta ukukanaseka incitilo sha bantunse, ukukanakalifiwa na shene, nelyo ukushipata, kano ukushumfwikisha.” Pamo nga kasambilisha, mwalilolenkana no mulimo wakakata uwa kumfwikisha imimwene, ifikulilo, na fintu abasambi bantu musakamana bashininwako, ukusanshako na basambi ababa bana ba Nte sha kwa Yehova. Pa nshita shimo, abasambi ba musango yo kuti pambi bamoneka ukukwata imibele yaibela pa milandu imo imo. Lelo lintu incitilo sha musango yo mu kumonekesha shaisako pa mulandu wa kushininwa kwa musambi ukwa mipepele ne mibele, isho ncitilo shaliwanina ukuti mwashisakamana. Uno broshuwa apangilwe na Watch Tower Bible and Tract Society (akabungwe ka kusabankanishishamo ifyebo aka Nte sha kwa Yehova) kabili apekanishiwe ku kumwaafwa ukumfwikisha bwino abasambi Inte. Tulesubila muli no kukwatako inshita ya kumubelenga mu kusakamana.

Ukumfwikisha ifisumino fya muntu umbi tacipilibulo kuti ufipokelele nelyo ukufikonka, kabili ukweba takwaba kupanga insangu. Uno broshuwa talefwaya ukukakatisha imimwene ya mipepele iya Nte pali imwe nelyo pa basambi benu. Ukufwaisha kwesu kuli fye kumwebako ulwa fishinte ne fisumino fintu bamo aba mu basambi benu balesambilishiwa ku bafyashi babo pa kuti mwingacisanga ukuba icacilapo kwanguka ukumfwikisha abana ba baNte no kubomba na bene. Kwena, cintu abana balesambilishiwa na cintu bacita te kuti pambi lyonse fibe cimo cine, apantu umwana umo na umo alesambilila ukulundulula kampingu wakwe umwine.

Ukupala icinabwingi ca bafyashi, Inte sha kwa Yehova bafwaya abana babo ukumwenamo apakalamba mu kusambilila kwabo. E mulandu wine basambilishisha abana babo ukubombela pamo na bakafundisha babo. Mu kukonkapo, abafyashi baNte na bana babo balatasha lintu bakasambilisha babasunga mu kulangulukilako na mu mucinshi.

Inte sha kwa Yehova baba Bena Kristu abaishibikwa icalo conse. Nangu cibe fyo, inshita shimo tababomfwikisha bwino. Tulesubila kanshi, ukuti uno broshuwa akamwaafwa ukumfwikisha bwino abana ba baNte abo musakamana. Ukucilisha, tulesubila ifyo mukamona umulandu untu, mu milandu imo iya kulungatika, bengafwaila insambu sha kubela abapusanako.

NGA FINTU uku kwambula ukufuma muli The World Book Encyclopedia kutubulula, bumo ubwa mabuyo ya kusambilila mu sukulu bwaba kukansha abana ku mikalile ya cila bushiku, icilesanshako ukubalenga ukusakamana ukukabila kwa lupwa kasuba kamo. Inte sha kwa Yehova shalisumina ukuti uku kwaba kushingamwa kwashila. Baibolo iine itila: “Lelo umuntu nga tasunga abantu bakwe, pali bufi aba mu ŋanda yakwe, ninshi nakaana icitetekelo, kabili abo mubi ukucisha uushatetekela.” (1 Timote 5:8) Imyaka iipooswa ku sukulu ipekanishisha abana ku fishingamo fintu bakasunsa mu bumi. Muli fyo, Inte bayumfwa ukuti amasomo yalingile ukumonwa mu kukatama nga nshi.

Inte balatukuta ukwikalila kwi kambisho lya mu Baibolo ilya kuti: “Conse ico mulecita, bombeni pali cene no mutima wenu onse, nga mwe balebombela Shikulu, kabili te ku bantu.” (Abena Kolose 3:​23, Today’s English Version) Ici cishinte cibomba ku mbali shonse isha bumi bwa cila bushiku, ukusanshako isukulu. Inte muli fyo bakoselesha abacaice babo ukubombesha no kukatamika imilimo bapeelwa pa sukulu.

Baibolo na kabili isambilisha ukunakila amafunde ya calo cintu umuntu ekalamo. E co lintu ukusambilila mu sukulu kuba lifunde ukufika pa mushinku umo, Inte sha kwa Yehova balomfwila ili funde.​—Abena Roma 13:​1-7.

Ilintu taicefyako ubucindami bwa kukansha ku mikalile ya cila bushiku, Baibolo ilanga ukuti uku kukansha takwaba atemwa e buyo fye bweka nelyo ukuti e buyo bukalamba ubwa masomo. Amasomo yatunguluka yalingile na kabili ukutuninkisha mu bana banono ubuseko bwa kwikala abomi no kubaafwa ukulinga mu bwikashi nga abantu bashikatala. E ico, Inte sha kwa Yehova bayumfwa ukuti ukusala kwa mibombele ya pa numa ye sukulu kwalicindama nga nshi. Balisumina ukuti ukukokoloka kwalinga, inyimbo, ifya kuleseshamo icitendwe, ukutukusho mubili, ukutandalila amalaibrare ne fiyanda fya babenye, na fimbipo, filabomba ulubali lwacindama mu masomo yashikatala. Mu kulundapo, balasambilisha abana babo ukucindika abakalamba no kufwaya amashuko ya mu nshita ku kubabombela.

Ni Shani pa lwa Masomo ya Kongeshapo?

Pa mulandu wa fya kupangapanga ifipya, incito shabako shilealuka lyonse. Pamo nge ca kufumamo, abacaice abengi bakapatikishiwa ukubombela mu ncende nelyo mu butukushi buntu bashapokelelemo ukukanshiwa kwa kulungatika. Apo cili fyo, ifibelesho fyabo ifya mibombele no kukanshiwa kwa pa lwabo, ukucilisha amaka yabo aya