Umupashi wa Calo

Ubulondoloshi: Amaka yakunta ayasonga sosaite wa bantunse uwapangwa na abo abashili babomfi ba kwa Yehova Lesa‚ ukulenga abantu ba musango yo ukusosa no kucite fintu ukulingana ne cipasho cimo ica kwishibikilwako. Nelyo cingatila abantu babomba pa kusobolapo kwa muntu umo umo‚ abo balangisha umupashi wa calo bapeela ubushininkisho bwa mibele imo iya kutendekelako‚ inshila sha kucitilamo ifintu‚ no buyo mu bumi ifyaseeka ku micitile ilipo iya fintu iyo Satana abako kateka wa iko kabili lesa.

Mulandu nshi ukukantaikwa ku mupashi wa calo kwabela mulandu wa kwangwako kwakakala?

1 Yoh. 5:19: “Pano isonde ponse palaala mu maka ya Mubifi.” (Satana aluminisha umupashi uulama ukutontonkanya ne ncitilo sha abo aba mutundu wa muntu abashaba ababomfi basuminishiwa aba kwa Yehova. Mupashi wa kaso ne cilumba uwaanana nga nshi ica kuti wapala umwela uo abantunse bapema. Tulekabila ukubelesha ukusakamana kukalamba ukukananakila ku maka ya kwa Satana pa kuleka uyo mupashi ukumumunga ubumi bwesu.)

Ukus. 12:9: “Iciŋwena cikalamba capooselwe pa nshi‚ icisoka cikote iciitwa [Ciwa] kabili Satana‚ icilufya bonse abaikala mu calo conse; capooselwe pe sonde‚ na bamalaika wa ciko bapooselwe pamo na co.” (Ukutula apo ici cacitikile‚ pa numa ya kufyalwa kwa Bufumu mu 1914‚ ukusonga kwa kwa Satana ne fibanda fyakwe kwalingilishiwako apakalamba pa kati ka mutundu wa muntu. Umupashi wakwe walisonga abantu ku ncitilo sha kaso kaingilishiwako no lukakala. Ukucilisha abo bafwaya ukubombela Yehova besa pe samba lya kutitikisha kukalamba ku kuba ulubali lwa calo‚ ukucita cintu bambi bacita‚ no kuleka ukupepa kwa cine.)

Misango nshi imo iya mupashi wa calo iyo tulekabila ukubako abapempwila?

1 Kor. 2:12: “Awe ifwe te mupashi wa pano isonde twapokelele‚ lelo umupashi uwafuma kuli Lesa‚ ukuti twishibe ifyo tupeelwo bupe kuli Lesa.” (nga ca kuti umupashi wa calo walimbe mishila mu kutontonkanya kwa muntu no kufwaisha‚ ifisabo fya uko mu kwangufyanya filamoneka mu ncitilo isho shilangisha uyo mupashi. E co‚ ukuputukako ukufuma ku mupashi wa calo cifwaya te kusengauka fye incitilo shishili sha bwina Kristu no kucishamo lelo na kabili ukufika pa mushila wa mulandu pa kulundulula imibele iyo ibelebesha umupashi wa kwa Lesa no kutemwa kwa cine cine ku nshila shakwe. Ulingile ukusunga ici mu muntontonkanya ilintu ulelanguluka ukumoneka kwakonkapo ukwa mupashi wa calo.)

Ukucita ico umuntu alefwaya ukucita‚ ukwabulo kusakamana ukufwaya kwa kwa Lesa

Satana acincishe Efa ukuipingwila umwine icali icisuma ne cali icabipa. (Ukute. 3:3-5; mu kucilanako mona Amapinda 3:5‚ 6.) Abengi abakonka inshila ya kwa Efa tabaishiba ico ukufwaya kwa kwa Lesa ku mutundu wa muntu kwaba‚ kabili tababa abasekelela ukwishiba. Bacita fye “icintu cabo‚” nga fintu basosa. Abo baishiba ififwaikwa fya kwa Lesa kabili abesha ukwalukila kuli fyene balekabila ukuba abasakamana ukuti umupashi wa calo taubalengele ku mufulo ukusuula ukufunda kwa Cebo ca kwa Lesa mu cintu bengamona ngo “tuntu utunono.”—Luka 16:10; mona na kabili “Bucaibela.”

Ukwankula ku mibele pa cishinte ca cilumba

Caali ni Satana mu kubalilapo uwasuminishe ukuipima kwacishamo ukubosha umutima wakwe. (Linganyako Esekiele 28:17; Amapinda 16:5.) Icilumba maka yakanikanya mu calo ico abako kateka‚ ukulenga abantu ukuimona abene ukuba abacilapo pali abo aba mishobo imbi‚ inko‚ amabumba ya ndimi‚ nelyo ififulo fya bunonshi. Nelyo fye ni abo balebombela Lesa kuti bakabila ukunukula ifyashala ku kuyumfwa kwa musango yo. Na kabili balekabila ukuba abapempwila ukuti icilumba tacibalengele ukupanga ifikansa fikalamba pa milandu inono‚ nelyo ukusanguka icipindami ku kwishiba ifilubo fyabo no kupokelela ukufunda na muli ifyo ukumwenamo mu kwaafwa kukalamba ukwabamo kutemwa uko Yehova apayanya ukupitila mu kuteyanya kwakwe.—Rom. 12:3; 1 Pet. 5:5.

Ukulangisha imibele ya bucipondoka ukulola ku bulashi

Ukupondoka kwatendeke na Satana‚ uo ishina lyakwe lipilibula “Kakaanya.” Ku kusuusha kwakwe Yehova‚ Nimrode‚ uo ishina lyakwe lingapilibula ukuti “Lekeni Tupondoke‚” alangishe ukuti aali mwana wa kwa Satana. Ukusengauka uyo mupashi kukacilikila abantu batiina Lesa ukufuma ku kuba aba misuula kuli bakateka ba mu calo (Rom. 13:1); kukafwilisha abanono ukunakila ku bulashi bwapeelwa na Lesa ubwa bafyashi babo (Kol. 3:20); kukaba ica kucingilila ku kusuminishanya na basangu‚ abasuula abo Yehova apeela icishingamo mu kuteyanya kwakwe ukumoneka.—Yuda 11; Heb. 13:17.

Ukusuminisha ukusonga kwakakuka ukwa lunkumbwa lwa mubili wawa

Ukusonga kwa ici kuti kwamonwa no kumfwikwa ukuli konse. Kuliko ukukabila lyonse ukwa kuba abapempwila kuli cene. (1 Yoh. 2:16; Efes. 4:17‚ 19; Gal. 5:19-21) Ukutontonkanya no kufwaisha ifingatungulula ku bushininkisho bwacilapo kukakala ubwa cene kuti fyamoneka mu kulanshanya kwa muntu‚ imilangwe alanda‚ inshintu sha nyimbo akutikako‚ umusango acindilamo nelyo mu kutamba kwakwe ubulangisho ubulanga bucisenene. Ulu lubali lwa mupashi wa calo lulailangisha ulwine mu kubomfya bubi bubi imiti ikola‚ bucakolwa‚ ubucende‚ ubulalelale no kulalana kwa ba bwamba bumo bwine. Na kabili lulamoneka lintu umuntu ukukanalingana na malembo‚ lelo nakalimo mwi funde‚ alekana no munankwe wa mu cupo no kubuula umbi.—Mal. 2:16.

Ukusuminisha ubumi bwa umo ukulamwa ku kufwaisha kwa kukwata ico umo amona

Kufwaisha kwa musango yo e ko Satana alundulwile muli Efa‚ ukumubeleleka ukucite cintu cimo icaonawile ukwampana kwakwe na Lesa. (Ukute. 3:6; 1 Yoh. 2:16) Yesu akene mu kushangila itunko lya musango yo. (Mat. 4:8-10) Abo bafwaya ukutemuna Yehova balekabila ukuba abapempwila pa kuti tabasuminishe icalo ca makwebo ukulundulula umupashi wa musango uyo muli bene. Ubulanda bukalamba no konaulwa lwa ku mupashi filafumamo kuli abo ababikwa mu citeyo kuli cene.—Mat. 13:22; 1 Tim. 6:7-10.

Ukulangisha ifikwatwa fya umo no kufikapo kwatunganishiwa

Ici cibelesho‚ na co‚ “ca pano isonde” kabili cilekabilwa ukulekwa kuli abo abasanguka ababomfi ba kwa Lesa. (1 Yoh. 2:16) Calimbe mishila mu cilumba‚ kabili mu cifulo ca kukuula bambi lwa ku mupashi‚ cilangisha ukubeleleka kwa fimoneka ne fimonwa fya kupwishishisha kwa mu calo pa ntanshi yabo.—Rom. 15:2.

Ukulekelako inkuntu sha umo mu milandile ya musaalula ne ncitilo sha lukakala

Iyi “milimo ya bumubili” iyo abantu abengi bafwile ukulwisha na maka. Mu kuba ne citetekelo ca cine cine no kwaafwa kwa mupashi wa kwa Lesa kuti bacimfya icalo mu cifulo ca kuleka umupashi wa ciko ukubalama.—Gal. 5:19‚ 20‚ 22, 23; Efes. 4:31; 1 Kor. 13:4-8; 1 Yoh. 5:4.

Ukushimpa amasubilo ya umo no mwenso pa cintu abantunse bali na maka ya kucita

Umuntu wa bumubili alanguluka cintu amona no kukumya ukuba icipendelwako mu cine cine. Amasubilo yakwe no mwenso fishinguluka amalayo ne fintiinya fya bantu bambi. Alolesha kuli bakateka ba buntunse ku kwaafwa kabili alakutulukwa mu kubipilwa lintu bafilwa. (Amalu. 146:3‚ 4; Esa. 8:12‚ 13) Kuli wene‚ ubu bumi e bonse bwabako. Icintiinya ca mfwa cilamubika mu kwanguka mu busha. (Mu kucilanako‚ mona Mateo 10:28; AbaHebere 2:14‚ 15.) Lelo amaka yapya yasesha imintontonkanya ya bantu abeshiba Yehova‚ abo abesusha imintontonkanya yabo ne mitima mu kuba na malayo yakwe kabili abasambilila ukwalukila kuli wene ku kwaafwiwa mu nshita yonse iya kukabila.—Efes. 4:23‚ 24; Amalu. 46:1; 68:19.

Ukupeela abantunse ne fintu umucinshi wabamo ukupepa uwaba uwa kwa Lesa

“Lesa wa ino micitile ya fintu‚” Satana Ciwa‚ akoselesha imisango yonse iya fibelesho ifyo filufya ukukongama kwa muntu ukwapeelwa na Lesa ku kupepa. (2 Kor. 4:4‚ NW) Bakateka bamo basungwa nga balesa. (Imil. 12:21-23) Amamilioni bakontama pa ntanshi ya tulubi. Amamilioni na yambi yasangula bakangala ukuba utulubi pamo nga ba fyangalo abapulamo. Ukusefya libili libili kupeela umucinshi ushalinga ku bantunse. Uyu mupashi waliseeka nga nshi ica kuti abo mu cine cine batemwa Yehova kabili abafwaya ukumupeela ukuipeelesha kwapaatulwa balekabila ukuba abapempwila ku kusonga kwa uko cila bushiku.