Bakangalila Abatungulula—Kangalila wa Kutangilila

¹ Ukubomba nga kangalila mu cilonganino waba mulimo ukalamba. (Imil. 20:28; 1 Tim. 3:1) Ici e cipande ca kubalilapo ica fipande fikakonkana ifikalondolola imilimo yalekanalekana iya baeluda ba Bwina Kristu ku kuleka ifwe bonse tuletasha pa mulimo wacindama uo batucitila.

² Sosaite isonta kangalila wa kutangilila ku kubomba pa nshita iishapimwa. Umulimo wa kwa kangalila wa kutangilila uwa kwampanya imibombele ulenga baeluda ukusakamana bwino imilimo yabo. (Ubutumikishi Bwesu, ibu. 42) Finshi fyabimbwamo muli uyu mulimo?

³ Kangalila wa kutangilila apokelela bakalata ba cilonganino kabili mu kwangufyanya apeela kalemba ukuti abombelepo. Mu kupekanishisha ukukumana kwa baeluda, kangalila wa kutangilila apoka imitubululo kuli baeluda pa lwa filekabilwa ukulandwapo no kutantika programu wa fya kulanshanyapo. Na kabili abomba nga ceyamani pa kukumana kwa baeluda. Nga ca kuti kwabako ifipingwilwe, ashininkisha ukuti fyabombelwapo mu nshila yalinga. E wangalila ukupekanya kwa Kulongana kwa Mulimo no kutantika kwa malyashi ya cintubwingi. Asuminisha fyonse ifibilishiwa ku cilonganino, apeela insambu sha fyo icilonganino cifwile ukulipila, ashininkisha no kuti ukupenda indalama sha cilonganino kwacitwa lyonse pa numa ya myeshi itatu.

⁴ Pamo nga ceyamani, kangalila wa kutangilila ampanya umulimo wa Komiti wa Mulimo uwa Cilonganino. Lintu umusambi wa Baibolo aipusha ukuti alefwaya ukuba kasabankanya ushabatishiwa, nelyo lintu kasabankanya ushabatishiwa alefwaya ukubatishiwa, kangalila wa kutangilila alapekanya ukuti baeluda bakumanye uyu kasabankanya. Na kabili kangalila wa kutangilila alatungulula mu kupekanishisha ukutandala kwa kwa kangalila wa muputule ku kuleka icilonganino cinonkelemo apakalamba mu mulungu waibela uwa milimo.

⁵ Imilimo ya kwa kangalila wa kutangilila ingi kabili yaliba iyalekanalekana. Ilyo alesakamana imilimo yakwe mu kuicefya “no kucincila” ifwe bonse kuti twacita apo twingapesha ukupitila mu kubombela capamo na baeluda. (Rom. 12:8) Nga ‘tuleumfwila’ no ‘kunakila’ abaletutungulula, kuti babomba umulimo wabo no buseko bukalamba.—Heb. 13:17.