Cenjeleni ku Kutunganya Bambi Imilandu iyo Bashacita

KAPEPESHA wa pa televishoni uwalumbuka alishimawile mu kukosa kapepesha munankwe uwacitile ubucende. Nangu cibe fyo, muli ulya wine mwaka, kapepesha wapeele umunankwe umulandu aliketwe na cilende.

Inshita imbi, icalo cakwatisha amaka mu fyanso catumine inkombe ku kuwikisha amabumba yalelwa. Pali iyi ine nshita, ici calo cimo cine catumine bashimakwebo ba ciko aba fyanso ukuya ku fyalo fimbi ku kushitisha ifyanso pa mabilioni ya badola ayashaifulila.

Apantu ubumbimunda bwapama nabuseeka nga nshi, bushe kuti twapapa umulandu kubeleleko ukutwishika ukwingi mu cifulo ca kucetekela? Ku bengi, ukutunganya bambi imilandu iyo bashacita kwasanguka cibelesho.

Pamo nga Abena Kristu, tufwile ukuba abasakamanishisha ukukanaleka imibele ya mutima iya musango yo ukwambukila ukwampana kwesu na basumina banensu aba citetekelo. Nangu cingati Yesu Kristu atucincishe ukuba “abacenjela nge nsoka” lintu tuli pa kati ka balwani besu, tatile tufwile ukulatunganya abakonshi bakwe aba cine. (Mateo 10:16) E co kanshi, busanso nshi bwaba mu kutunganya bambi imilandu iyo bashacita? Ni mu mbali nshi tufwile ukuba abasakamanishisha nga nshi pa kusengauka ukukongama kwa musango yo? Kabili ni shani fintu twingabakilila ukwampana kwaumo mutengo uko tuipakisha na Bena Kristu banensu?

Ukusambililako ku ba Kale

Ukutunganya bambi imilandu iyo bashacita cimo fye no kubapingula. Cili kwati twalipingula kale ukuti ifyo balelanda nelyo ukucita fya kufimba fye pa cintu cimo ica kufutika kabili icishaibipila. Ilingi line ubwafya bwine bwine bubako pa mulandu wa kumona ifintu mu nshila yalubana, nga fintu cingamonwa mu bulondoloshi bwa mu Baibolo ubusangwa muli Yoshua icipandwa 22.

E lyo fye abena Israele bapwishishe ukucimfya Icalo Calaiwe kabili e lyo bapokelele impanga shabo ukulingana ne mikowa yabo. Umukowa wa kwa Rubene no wa kwa Gadi na hafu wa mukowa wa kwa Manase bakuulile iciipailo “icikalamba ku kumona” mu mbali ya mumana wa Yordani. Imikowa imbi mu kuluba yatungenye ukuti ubu bwali busangu. Batile iyi mikowa itatu yali no kubomfya ici ciipailo cishaikulila ku kuninika amalambo mu cifulo ca kuya kwi hema lya kulaishanya ku Shilo, icifulo casontelwe ica kupepelako. Ilyo line fye, imikowa imbi yatendeke amapekanyo ya kulwisha bene.—Yoshua 22:10-12.

Icawemeko ca kuti balilanshenye na bamunyinabo abena Israele pa kutuma inkombe shaletungululwa na Finehasi. Bashumfwa fye ukuti nabapeelwa umulandu wa kubulwa ubusumino, bucipondoka, no kusangukila Yehova, imikowa yatunganishiwe yalilondolwele umulandu bakuulile ici ciipailo cishaikulila. Mu cifulo ca kuti cibe ciipailo ca kuninikapo amalambo, cali no kuba “inte” ya kwikatana kwa mikowa ya kwa Israele mu kupepa Yehova. (Yoshua 22:26, 27) Inkombe shabwelelemo ninshi nashitemwa ukuti takwali icili conse icalubene kuli bamunyinabo. Muli fyo inkondo ya bana calo no kusumyo mulopa ukwabipisha fyalisengawikwe.

Mwandi lisambililo kuli ifwe ukukanasuswa ukutunganya bambi imilandu iyo bashacita! Ilingi line icimoneka ukuba ica cine akatalamukila cisangwa ukuba icapusanininako fye pa numa ya kucibebeta bwino bwino. E fintu caba mu mbali ishingi isha bumi bwa Bwina Kristu.

Ifyo Tufwile Ukumona Baeluda

Ilyo balebomba umulimo wabo uwa ‘kucema ulukuta lwa kwa Shikulu,’ inshita shimo baeluda balasanga ukuti cilekabilwa ukufundako abantu bamo mu cilonganino. (Imilimo 20:28) Ku ca kumwenako, ni shani fintu twankulako lintu eluda alanda kuli ifwe pa lwa bana besu ukukuma ku kubishanya kubi nelyo imyendele yabipa na ba bwamba bwapusana? Bushe tutontonkanya ukuti aletunganyapo fimo no kuisosha fwe bene atuti, ‘Tatemwa fye ulupwa lwesu’? Nga ca kuti twasuminisha ukutontonkanya kwa musango yu ukutusonga, kuti twaisaba no bulanda pa numa. Ubutuntulu bwa ku mupashi ubwa bana besu kuti bwaba mu busanso, kabili tulingile ukutasha ukufunda kwa mu Malembo ukwa kwaafwa.—Amapinda 12:15.

Lintu eluda wa mu cilonganino atufunda, twilamutunganyapo fimo. Mu cifulo ca ico, tuipushe fwe bene nga ca kuti kuliko inshila twinganonkelamo mu kufunda kwakwe ukwashimpwa pali Baibolo. Umutumwa Paulo alembele ukuti: “Ukufunda konse ilyo kubapo kwena takumoneko kwa kusekelela, kuba fye ukwa bucushi: lelo abafundwako, apo inshita yapita, kutwalako icisabo ca mutende, ica bulungami.” (AbaHebere 12:11) E co natuletasha no kutontonkanyapo bwino. Ibukisheni ukuti cilaba icakosa kuli baeluda ukufunda nga fintu fye citukosela ukupokelela kwene.

Ifyo Tuyumfwa pa lwa Bafyashi

Lintu abafyashi bababindako fimo, abacaice bamo balabatunganyako fimo. Imisepela imo kuti yasosa fye no kuti: ‘Mulandu nshi abafyashi bandi bafushisha ifi amafunde? Bafwile tabafwaya ine ukuipakisha ubumi.’ Nangu cibe fyo, mu cifulo ca kusondwelela muli iyo nshila, abacaice balekabila ukupimununa bwino imibele.

Abafyashi balipoosa imyaka iingi ukusakamana abana babo. Pa kucite ci paliya ifintu ifingi lwa ku mubili na mu nshila shimbi. Bushe kuliko umulandu uuli onse uwa kusondwelela ukuti nomba bapampamine fye pa kulenga ubumi bwa bana babo abapungwe ukuba ubwa bulanda? Bushe te kuti cicilepo kuwama ukutontonkanya ukuti ukutemwa e kukunta aba bafyashi ukucingilila abana babo no kubasakamana? Bushe uku kutemwa kumo kwine te kulebalenga ukubinda bana muli fimo fimo, abo nomba balelolenkana na mafya yapya mu bumi? Fintu cingaba icabulamo icikuuku no kutasha ukutunganya abafyashi ba kutemwa ifintu ifyo bashacita!—Abena Efese 6:1-3.

Imibele Yesu iya Mutima pa lwa Bena Kristu Banensu

Abengi balesha ukupingula bambi ukwabula ukuti babomfwikishe bwino bwino. Ni shani nga ca kuti ni fwe bene twaba ne mibele ya mutima iya musango yo kabili tulatunganyako abantu bamo? Bushe kuti twasongwa ne calo muli ici?

Ku ca kumwenako, tutile munyinefwe wa ku mupashi umo alikwata ing’anda iisuma na motoka wa mutengo nga nshi. Bushe tufwile ukusondwelela ukuti alitemwa ifya ku mubili kabili tatangishako amabuseko ya Bufumu mu bumi bwakwe? Abena Kristu bamo kuti baba na maka ya kukumanisha ukushita ifintu fisuma fimo, lelo ico tacilepilibula ukuti bali ne nkuntu shalubana nelyo ukuti ‘tabalebala ukufwaya ubufumu.’ Kuti pambi balebombesha nga nshi lwa ku mupashi, ukubomfya ifikwatwa fyabo ifya ku mubili muli bukapekape ku kulundulula amabuseko ya Bufumu, napamo mu nshila yabulo kumoneka.—Mateo 6:1-4, 33.

Icilonganino ca Bwina Kristu ica mu mwanda wa myaka uwa kubalilapo capangilwe na bantu aba misango na misango—aba fyuma na bapiina. (Imilimo 17:34; 1 Timote 2:3, 4; 6:17; Yakobo 2:5) Lesa tapimina muntu ku fyuma fintu akwata, e co na ifwe tatufwile ukucite fyo. Tulingile ukutemwa abasumina banensu abaeshiwa kabili aba busumino, ‘ukukanacita nangu cimo ku kapaatulula.’—1 Timote 5:21.

Muli cino calo icalaala mu maka ya kwa Satana, ukutunganya kumonekela mu nshila shalekanalekana. Ku ca kumwenako, umuntu kuti amonwa ngo wa lubuli nelyo uwatemwa ifya ku mubili pa mulandu fye wa cikulilo cakwe. Nangu cibe fyo, pamo nga Abena Kristu tatufwile ukutontonkanya muli iyo nshila. Ukuteyanya kwa kwa Yehova takufwile ukubamo bumano kuikwatila no mutunganya. Abena Kristu ba cine bonse balekabila ukupashanya Yehova Lesa, apantu kuli wene “takwaba bupondamishi nangu kapaatulula.”—2 Imilandu 19:7; Imilimo 10:34, 35.

Kuntweni no Kutemwa

Amalembo yalasosa ukwabula ukulamba ukuti ‘bonse balibembuka, kabili balipelebela ku bukata bwa kwa Lesa.’ (Abena Roma 3:23) E co tulekabila ukumona bakapepa banensu nga baikatana na ifwe mu kufwaisha ukubombela Yehova umulimo washila. Nga ca kuti twalileka umutunganya nelyo amatontonkanyo yambi ayalubana ukwambukila ukwampana kwesu na munyinefwe wa ku mupashi nelyo nkashi, lekeni tupepele ukwaafwa kwa kwa Lesa ukulwisha imibele ya mutima iya musango yo pa kuti tatubele icinakabupalu ca kwa Satana. (Mateo 6:13) Ashinine Efa ukuti Yehova aali ne nkuntu shalubana, tali uwayangwako pa lwa butuntulu bwakwe, kabili aalemukaanya ubuntungwa ubwali no kumulenga uwa nsansa mu cine cine. (Ukutendeka 3:1-5) Ukutunganya bamunyinefwe ifintu ifyo bashacita kufikilisha fye ififwaya Satana.—2 Abena Korinti 2:11; 1 Petro 5:8.

Nga ca kuti mwasanga ukuti mwalikongamina ku kutunganya bambi ifintu ifyo bashacita, langulukeni ica kumwenako ca kwa Yesu Kristu. Nangu cingati aali Umwana wa kwa Lesa uwapwililika, taletunganya abasambi bakwe. Mu cifulo ca ico, Yesu alemona pa busuma ubo balecita. Lintu abasambi bakwe balelwila icifulo ca pa muulu, tatile baali ne nkuntu shalubana na muli fyo ukupyanikishapo abatumwa bambi 12. (Marko 9:34, 35) Apantu baali abashapwililika, bafwile balisongelweko ku lutambi lwa buYuda bwa busangu, ulwakomaile sana pa cilumba no muncishanya. Yesu alishibe ukuti icikalamba icalekunta abakonshi bakwe cali kutemwa uko batemenwe Yehova. Pa kuba no kutemwa kwa musango yo na pa kulambatila kuli Yesu, balilambwilwe apakalamba.—Luka 22:28-30.

Nga ca kuti tuletunganya abasumina banensu aba busumino, kuti capala ukumona ifintu ukubomfya amaglasi yalubana. Takuli icingamoneka fintu caba mu cine cine. E co kanshi natuloleseshe mu maglasi ya kutemwa. Kwalibako ubushininkisho ubwingi ubwa kuti Abena Kristu banensu aba bucishinka balitutemwa e co bakabila ukuti tubalangulukileko mu cikuuku. (1 Abena Korinti 13:4-8) E co, shi natubatemwe no kuba abacenjela ku kutunganya bambi ifyo bashacita.

[Icikope pe bula 26]

Ni shani fintu mumona bambi abapepa Lesa mu busumino?

[Icikope pe bula 27]

Ukucetekelana no mucinshi filenga Inte sha kwa Yehova ukuba ulupwa lumo ulwa nsansa

‘Bakakatila ku fyo Imipepele Yabo Ibasambilisha’

UMWANAKASHI uwikala ku Miami, Florida, U.S.A., atumine kalata wakonkapo ku balemba inyunshipepala ya cikaya: “Pa Dec. 10 umwana wandi umwaume alibiilwe icikwama pa mushiika wa salaula. Mwali laisenshi wakwe uwa bunamutekenya, kardi wa ku ncito, na fimbipo ukusanshako fye na badola 260.

“Pa numa ya kweba maneja wakwe ifyo alufishe, alibwelele ku ng’anda. Icungulo bushiku alipokelele lamya ukufuma kuli namayo uwalelanda iciSpanish, ukupitila mu uupokelela [balamya] uwalemupilibwilako, uyu mwanakashi amwebele ukuti alitolele icikwama cakwe.

“Alimwebele akeyala kakwe. . . . Kabili amupeele icikwama, umwali ifipe fyakwe fyonse, ukusanshako badola 260.

“Alimweneko uko umupupu aaleibila umwana wandi icikwama na muli fyo alipundile. Umupupu ashile apoosa icikwama no kubutuka. Ilyo ici calecitika ninshi umwana wandi naya te wa kumona, e co namayo asendele icikwama ku ng’anda no kutuma lamya.

“Uyu namayo no lupwa lwakwe ni Nte sha kwa Yehova. Ukwabulo kutwishika balakakatila ku fyo imipepele yabo ibasambilisha.”

Inte sha kwa Yehova tababa abafumacumi pa kuti abantu babatashe. (Abena Efese 6:7) Mu cifulo ca ico, mu kufumaluka bafwaisha ukuti ilumbo liye kuli Shibo wa ku muulu, Yehova. (1 Abena Korinti 10:31) Ukutemwa uko batemwa Lesa na bantu banabo kulabakunta ukubilisha “imbila nsuma” pa lwa Bufumu bwa kwa Lesa. (Mateo 24:14) Ukupitila muli ubu Bufumu, Lesa alaya ukwalula isonde ukuba paradise wayemba. Lyene pa mbali ya kuba ilyayemba mu kumoneka isonde likesulamo ubulumba umukaba ubufumacumi ku nshita pe.—AbaHebere 13:18; 2 Petro 3:13.