Ni Kwi Kuntu Insansa sha Cine Cine Shingasangwa?

ABANTU abengi batontonkanya ukuti insansa kuti shasangwa ukupitila mu kunonka ifyuma fya ku mubili. Ni shani pa lwa imwe? Ilintu ifintu fya ku mubili kwena kuti fyaba ni cimo ica fintu ifilenga insansa, tafyebekesha shene; kabili ubusambashi bwa ku mubili tabukuula icitetekelo nelyo ukwisushisha ukukabila kwa ku mupashi.

Mu lyashi Lyakwe ilya pa Lupili, Yesu Kristu atile: “Ba nsansa abaibukila ulwa kukabila kwabo ukwa ku mupashi, apantu ubufumu bwa mu myulu bwabo.” (Mateo 5:3, NW) Yesu na kabili atile: “Muibake ku lunkumbwa lonse; ico umweo wa muntu tawaba mu kufula kwa fintu ifyo akwata.”—Luka 12:15.

Abengi bafwaya insansa ukupitila mu kuibimba mu kwampana kwa bwamba ukushili kwa mwi funde ne “milimo ya bumubili” imbi. (Abena Galatia 5:19-21) Nangu cibe fyo, ukunakila ku musamwe wa ku mubili takuleta insansa sha cine cine kabili ishibelelela. Na kuba, abacite fintu fya musango yo tabakapyane Ubufumu bwa kwa Lesa.—1 Abena Korinti 6:9, 10.

Bambi mu kufwailisha kwabo ukusange nsansa balukila ku kuipaatulako ukupitila mu kufwayo kuicindamika abene. Balaibrare na matuuka ya fitabo fyaisulamo ifitabo fya kuisambilishishamo, lelo impapulo sha musango yo tashaletela abantu insansa shibelelela. E co, lyene, ni kwi kuntu twingasanga insansa sha cine cine?

Pa kuba aba nsansa mu cine cine, tulekabila ukwishiba ukukabila kwesu ukwa fya ku mupashi uko twafyalwa na ko. Yesu atile: “Ba nsansa abaibukila ulwa kukabila kwabo ukwa ku mupashi.” Kwena, te kuti citwaafwe nangu panono ukwishiba uku kukabila kabili lyene ukukanacitapo nangu cimo. Ku kulangilila: Cinshi cingacitika kuli kabutuka wa nakatango uyo pa numa ya kubutuka ulubilo afilwa ukumfwila ukufwaisha kwa mubili wakwe ukwa kunwa menshi? Bushe tali na kucepelwa amenshi mu mubili mu kwangufyanya no kulolenkana na mafya yambi ayabipisha? Mu kupalako, nga ca kuti twafilwa ukumfwila ukukabila kwesu ukwa kuliishiwa lwa ku mupashi, mu kuya kwa nshita tuli no kuuma lwa ku mupashi. Ici cili no kutungulula ku kubulwa ubuseko ne nsansa.

Yesu alishibe bwino ukukabila kwakwe ukwa ku mupashi, alesambilila Icebo ca kwa Lesa lyonse no kwetetulapo. Alesanga ifiputulwa fya Malembo ya Mushilo no kufibelenga ukwabula ubwafya, kabili asambilishe bambi ukucita cimo cine. (Luka 4:16-21; linganyeniko Abena Efese 4:20, 21.) Yesu na kabili apashenye ukucita ukufwaya kwa kwa Wishi wa ku muulu ku ca kulya. Ukucito kufwaya kwa kwa Lesa kwamuletele insansa ishingi.—Yohane 4:34.

Ee, insansa sha cine cine te kuti shisangwe ukupitila mu kunonka ifyuma fya ku mubili; kabili insansa tashifuma ku kusakamana umubili wawa. Insansa sha cine cine shaba mibele ya mutima, ukushimpwa pa citetekelo ca cine cine no kwampana kusuma na Yehova Lesa. Mu kulinga, lyene, kemba wa malumbo Davidi aimbile ukuti: “[Ba nsansa, NW] abantu abo Yehova e Lesa wabo.”—Ilumbo 144:15b.

[Icikope pe bula 23]

Icitetekelo no kwampana kusuma na Lesa fili no kumuletela insansa sha cine cine