(2 Abena Tesalonika 2:3, 4; Imilimo 20:29, 30; 2 Petro 2:12) Ukufika mu mwanda wa myaka walenga ine, ifibelesho fya busangu kale kale fyali mpanga yonse. Abena Kristu bafulilako abaitunga bali filundwa fya mulalo wa ciRoma. Bushe takwaliko Abena Kristu ku numa kulya lyene abali aba cishinka ku “cipasho ca fyebo fituntulu” fyapokelelwe ukufuma ku batumwa?—2 Timote 1:13.

Eusebius alumbula bamo ifinakabupalu fya kupakaswa, nelyo fye mu fyalengwa ukulondolola ukulunguluka kwabo, ukucula, no kufwile icisumino mu kupelako. Nampo nga bonse aba ba kufwile icisumino bafwilile muli bumpomfu ku cine casokololwa icaliko pali ilya nshita, te kuti twishibe pali ino nshita. Ukwabulo kutwishika bamo baumfwilile ukusoka kwa kwa Yesu ukusengauka ifyakaniko, bucisenene, no kusuusuka ukwa musango uuli onse. (Ukusokolola 2:15, 16, 20-23; 3:1-3) Mu kumonekesha, aba cishinka bamo abapusunswike batwalilile ukufisama ukufuma ku mulola wa lyashi lya kale. (Mateo 13:24-30) Mu cituntulu, ifipimo fya kushimaisha ukupepa kwa Bwina Kristu ukwa pa cintubwingi fyalitungulwike nga nshi ica kuti icaimikwa ca cibukisho ica ciSpanish ica pali cilya ciputulwa ca nshita cawila Diocletian pa kuba ‘nashimaisha ukutiina imipashi ya kwa Kristu.’ Nangula ni fyo, ukubombesha ku kupoka no konaula amakope ya Malembo, ulubali lukalamba ulwa kusansa kwa kwa Diocletian pa buKristu, kwalifililwe ukupyangapo Icebo ca kwa Lesa umupwilapo.—1 Petro 1:25.

Ukukanatunguluka mu kupyanga ubuKristu umupwilapo, Satana Ciwa, kateka wa calo, alitwalilile imilimo yakwe iya mucenjelo ukupitila muli Kateka Konstantino, uwatekele ukufuma mu 306 ukufika mu 337 C.E. (Yohane 12:31; 16:11; Abena Efese 6:11, NW, utulembo twa pe samba) Konstantino wa cisenshi talwishishe Abena Kristu. Ukucila, acisangile ukuba icayanguka ukutobenkanya ifisumino fya cisenshi ne fya Bwina Kristu mu butotelo bupya ubwa Buteko.

Mwandi cili kusoka kuli ifwe bonse! Lintu twalolenkana no kupakaswa kwakaluka, ukutemwa kwesu ukwa kuli Yehova kukatwafwa ukusengauka ukusuusukako pa mulandu fye wa kwiluluka kwa ku mubili ukwa pa kashita kanono. (1 Petro 5:9) Mu kupalako, tatwakasuminishe iciputulwa ca nshita ica mutende ukutompola amaka yesu aya Bwina Kristu. (AbaHebere 2:1; 3:12, 13) Ukukakatila kwakosa ku fishinte fya Baibolo kukatusungilila ukuba aba bucishinka kuli Yehova, Lesa uwingalubula abantu bakwe.—Ilumbo 18:25, 48.

Ifipusho Ukufuma ku Babelenga

Ni shani fintu Inte sha kwa Yehova bamona ukushita ifipe fya kwiba?

Abena Kristu balasengauka ukukwata ulubali ululi lonse ku mufulo mu kushita ifipe fya bukwebo nelyo fisolobelo ifya kwiba.

Ukwiba mu kushininkisha kwalilubana. Ifunde lya kwa Lesa ku bena Israele lyalondolwele mu kumfwika ukuti: “Wilaiba.” (Ukufuma 20:15; Ubwina Lebi 19:11) Nga ca kuti umupupu aliiketwe, aali no kubweseshapo imiku ibili, imiku ine, imiku isano, ukushintilila pa mibele.

Ukufuma ku nshita sha pa kale, abapupu balyesha ukushitisha fipe fibilwe pa kupanga ubukumu bwa mu kwangufyanya kabili ukwabulo kwikatwa mu kuba no bushinino ku kukwata umulandu. Pali uyu mulandu ilingi line balashitisha ifipe fya kwiba pa mutengo wanaka untu aba kushita abengi basanga ukuba uwayafya ukukaana. Icibelesho ca musango uyo kuti pambi calibimbilwemo mu cintu tubelenga pa Ukufuma 22:1 ukuti: “Ngo muntu aibe ŋombe napamo impaanga, no kuiipaya napamo ukuishisha, akabweseshepo iŋombe shisano isha kupyanisha pa ŋombe imo, ne mpaanga shine isha kupyanisha pa mpaanga imo.”

Ukwiluka imitubululo mu mafunde ya musango uyo, Rabbi Abraham Chill alembo kuti: “Calibindwa ukushita nelyo ukupokelela icipe ca kwiba, nelyo fye nga ca kuti