“Yehova Alyaswike Amapepo Yandi!”

MU KUSAALALA kwa calo, Inte sha kwa Yehova shiletungulula amasambililo ya Baibolo aya mu ŋanda mupepi na mamilioni yasano ku balefwaya ukunonka ukwishiba kwalungikwa pa lwa kwa Lesa ne mifwaile yakwe iyawamisha iyo akwatila umutundu wa muntu. Nelyo fye bana banono pa kati ka Nte sha kwa Yehova balebombako uyu mulimo. Ku ca kumwenako, langulukeni kalume we shina lya Joel. Alangishe ukuipeela kwakwe kuli Yehova no kubatishiwa ilyo ali ne myaka 9. Pa numa ya mwaka umo akwete ici ca kukumanya:

“Ilintu nali mu butumikishi, nakumenye umwanakashi ishina lyakwe Candy. Namutambike broshuwa wa ‘Moneni! Ifintu Fyonse Nafilenge Fipya.’ Alikwete uyu broshuwa kale, e co namutambike icitabo ca Kuti Waikala Kuli Pe na pe muli Paradise Pe Sonde. Na co cine alicikwete kale. E lyo natile, ‘nalamweba tukalesambilila Baibolo.’ Alisumine!

“Nkashi inankwe kwa Candy, uwalwele kansa, alishile mu kwikala nankwe. Ukulundapo, Candy alesambilila ifya bunasi. E co pa ciputulwa cimo, isambililo lya Baibolo lyalishimine. Lelo ine na bafyashi bandi twatwalilile ukulapitako no kumushila bamagazini nelyo ukushila umulume wakwe, Dick. Umulume atwebele ukuti alebika bamagazini lwa mupepi no busanshi kabili alebabelenga ubushiku.

“Mu kupita kwa nshita, nkashi nankwe kwa Candy alifwile. Ine na Tata na Mayo twalandile na Candy pa lwa mibele ya bafwa. Apingwilepo ukubukulula isambililo lya Baibolo. Ubushiku bumbi, twaipwishe Dick nga kuti atemwa ukusambilila capamo na Candy no kulenga isambililo ukuba ilya lupwa. Atile cili fye bwino. E co nomba, ndatungulula isambililo kuli Dick na Candy kabili Tata alaya na ine. Balelunduluka bwino kabili balatasha pe sambililo lya Baibolo.

“Nalepepa ukuti nkwate isambililo lya Baibolo, kabili Yehova alyaswike amapepo yandi!”

Bushe Kuti Mwapokelela Ukutandala?

Nelyo fye ni muli ici calo ca macushi, kuti mwanonka insansa ukufuma ku kwishiba kwalungikwa ukwa Baibolo ukwa kwa Lesa, Ubufumu bwakwe, ne mifwaile yakwe iya kusungusha ku mutundu wa muntu. Nga mwingatemwa ukupokelela ifyebo fyalundwapo nelyo umuntu umo ukumutandalila ku kutungulula isambililo lya Baibolo ilya pa fye ilya mu ŋanda kuli imwe, twapaapaata lembeleni ku Watch Tower, Box 33459, Lusaka 10101, nelyo ku keyala kalinga ukufuma pe bula 2.