Sungilileni Ubusaka pe Bungano Lyesu
1 Amabungano yesu yasenda ishina lya kwa Kalenga, Yehova. Yehova asambilisha abantu bakwe ukupusanako. “Bakalenge abantu beshibe ukupaatulanya pa kati ka fya mushilo ne fyayanguka, no kubalenga beshibe ukupaatulanya pa kati ka fyakowela ne fyasanguluka.” (Esek. 44:23) Apantu ishina lyakwe lyalibimbwamo, Yehova atila: “Onse uwainikwe shina lyandi, uo nalengeele ubukata bwandi, uo nabumbile, cene, nalimucitile. . . . abantu abo naibumbiile ku kuleka balondolole ukuntasha.” (Esa. 43:7, 21) Umulandu wine twabela Inte sha kwa Yehova wa kulumbanya Yehova no kumuletela ubukata. Tulacite fi pa mabungano yesu ukupitila mu myendele, imilandile, imifwalile, no kusunga icifulo ca kupepelapo ica busaka.
2 Icifulo ce bungano tacifwile kubamo ifiko. Ilyo tatulatendeka ibungano kulaba ukubombesha nga nshi pa kupekanya ififulo fye bungano no kufiwamya. Twalimona ukuti amabungano yamo nayawaminako nga nshi ukucila fintu yali iyi myaka yapita. Nangu ni fyo, abapya baletwalilila ukuilunda kuli ifwe, e co ukukansha kulingile ukutwalilila. Icili conse twaleta mu cifulo ce bungano cilingile ukufumishiwamo, ukusanshako ifya kusendelamo ifya kulya fyabulamo akantu, amabotolo, na fimbipo. Nga kuti twafileta mu cifulo ce bungano lintu filimo ifya kulya, lyene ukwabulo kutwishika kuti twafisenda lintu mushili akantu nangu kamo. Kuti pambi natufwala ifya kufwala ifisuma, insapato ishisuma ne finso fyayemba, lelo nga ca kuti twikele mu fiko, bushe cine cine tuli aba busaka?
3 Pa mabungano yamo indupwa shiliila ifya kulya mu cifulo ce bungano. Ici cili fye bwino, lelo tatulingile ukupoosaika ifyashalapo insansalila ukufikila programu apwa. Pa numa ya ca kulya ca kasuba waba mulimo wa lupwa lumo lumo ukupoosa ifisooso ifili fyonse ifyo bashile. Lintu programu wa cungulo atendeka, amabotolo, inciliko sha pa mabotolo, ubufungau bwa fya kulya, bapulasitiki, amapepala ya ku cimbusu, amapepala ya kulembapo nangu fye amaprogramu ya kulongana tafifwile ukuba mu lubansa. Pa numa ya ca kulya ca kasuba, natutole ifili fyonse ifili mupepi na ifwe no kufipoosa. Nakalimo kuti mwatemwa ukusenda pulasitiki uyo ulupwa lwenu lwingapoosamo ubufungau bwa fya kulya, inciliko sha pa mabotolo ne fisooso fimbi pa kuti fingapooswa mu ng’ungulu nelyo icilindi cipayanishiwe pe bungano. Twapaapaata mwipoosaika amabotolo mupepi apo mwikele, kuti yalenga ubusanso kabili tayamoneka bwino.
4 Nga ca kuti namukwata ing’anda nelyo umwa kwikala pe bungano, shininkisheni ukuti ulubansa lwa cifulo cesu luli ulwapempenkana. Abana kuti bakanshiwa ukupyanga no kupoosa ifisooso ku cifulo ico batupekanishishe ukupoosa ifisooso.
5 Ni shani pa lwa fimbusu? Pa fifulo fimo ifya kulongana kukalamba nelyo ifye bungano, ukwa kupoosela ubusali e bwafya bukalamba bubako. Ifimbusu filalamba sana ica kuti te kuti fibomfiwe. Icitabo ca Insansa sha Lupwa cilondolola ukuti: ‘Mupepi ne myaka 3,500 iyapitapo, Lesa apeele uluko lwa Israele Ifunde lyakwe pa kuti bengateyanya ukupepa kwabo kabili, lyakumishe na ku mikalile yabo ya cila bushiku. Ifunde lilya lyayafwilishe ukucingilila lulya luko ku malwele pantu lyabikileko amafunde yamo ayaanguka aya busaka bwa ku mubili. Ifunde limo ilya musango yo lyakumine ku kupoosa ubusali bwalefuma mu bantunse, ubwali no kushikwa bwino ukutaluka ku nkambi pa kuti incende ukwaleikala abantu taisafiwe. (Belengeni Amalango 23: 12, 13.) Lilye funde lya kale na nomba line lyaliba kufunda ukusuma. Nangu fye ni lelo abantu balalwala no kufwa pa mulandu wa kuti tabalikonka.’ Ifimbusu nakalimo fya kwimba nelyo ifya kukumpa, filapayanishiwa pa fifulo fye bungano. Takuli nangu umo ufwile ukusunsumana ku nse, no kusha ubusali ubwabula ukushikwapo. E fyo inama shicita lelo Lesa alitukambisha ukukanaba nga shene. Ubusali bwa busanso ku bumi kabili bulanunka lelo icacilapo ca kuti bulakankamika Yehova na bantu. Yehova atila akatutaluka nga ca kuti amona ica makankamike muli ifwe. (Linganyeniko Amalango 23:14.) E ico, cili ice pamfya ukuti twatwalilila ukuba aba busaka pa kuti inshila yesu iya bumi yalingana ne fipimo fyakwe. Shi ifwe bonse natutukushe ukuba aba busaka lwa ku mubili no kusungilila icifulo tuleikalamo icishakowela, pa kuti Yehova ‘ekamona muli ifwe ica nsoni.’
6 Ukutemwa bamunyinefwe kukatulenga ukubalangulukilako. “[Ukutemwa] takucita cishiyene, takuifwaila ifya kuko.” (1 Kor. 13:4, 5) Tacayana ukusha ifisoso apo twacikala pantu kuli na bambi abatupalamine. Tacayana ukulamfya ifimbusu pantu bambi bali no kufibomfyako. Kanshi, natulangishe ukutemwa abanensu kabili, “Muli ici e mo bonse bakeshibilo kuti muli basambi bandi, nga mwaba no kutemwana.”—Yoh. 13:35.
7 Tulomfwilapo icilumba pa fifulo fyesu ifya kulonganinapo kabili tuletashiwa pa kubomba bwino muli uyu mulandu. Shi ifwe bonse natubombeshe ukuti “tuisangulule ku kukantana konse kwa mubili no mutima, tube abafishisho mushilo mu kutiina Lesa.” (2 Kor. 7:1) Belesheni ubusaka pa ng’anda pa mwenu, ukukansha abana benu ukubombako umulimo wa kusungilila ing’anda iya busaka. Belesheni ubusaka pa Mayanda yesu aya Bufumu kabili lintu twalongana pamo pa mabungano yakalamba nelyo pa kulongana kukalamba, shi ukulongana kwesu nakuletungilila ifipimo fyasumbuka ifya kwa Lesa wesu uwa Mushilo, Yehova. “Pantu, mona, imfifi ikafimba pano isonde, ne kumbi ilyafitula pa bantu na bantu, lelo Yehova akesa pali iwe, ubukata bwakwe bukamonekela pali iwe.”—Esa. 60:2.