Ifya Kusanga Isubilo Ilyo Kushilemoneka Ukuba Nangu Limo
ELENGANYENI ukuti mwaponenwa ne fintu fya musango yu: Ifikwatwa fyenu fyonse fyaonaulwa, ukumusha fye nakalya nakalya. Abana benu—abamuletela ubuseko mu bumi—baipaiwa. Umwina mwenu talemukoselesha nangu panono. Pakonka ubulwele ubwa kuti ne mfwa yawama. Ubushiku ubuli bonse buli ca kukumanya ca kulengo kumanama.
Nga ca kuti ifi fintu fyalimuponene, bushe kuti mwakwata umulandu wa kutwalilila ukuba aba mweo? Nelyo bushe kuti mwafilwa ukusubila?
Iyi mibele ya bulanda iyalondololwa fye nomba line e yaponene Yobo, umwaume uwalembwa mu Baibolo. (Yobo, ifipandwa 1, 2) Ilyo apelelwe nga nshi, Yobo alilishike ukuti: “Ine ninkankamana ku mweo wandi.” Aalefwaya ukufwa pa kuti engatuusha. (Yobo 10:1; 14:13) Nangu cibe fyo, te mulandu na fintu aculile apakalamba, Yobo asungilile bumpomfu bwakwe kuli Lesa. E ico Yehova “apaalile Yobo pa numa ukucila pa kutendeka.” Muli fyo afwile mu mutende, “umukote, kabili uwamona ku nshiku.”—Yobo 42:12, 17.
Yobo aimike ica kumwenako ca kushipikisha icilandwapo ukufika na kuli buno bushiku. Ifya kwesha fyakwe fyalilopolwele ubuntu bwakwe no kukunta bambi ukubombe milimo isuma. (Yakobo 5:10, 11) Icacindamisha, bumpomfu bwatambalala ubwa kwa Yobo bwalengele umutima wa kwa Yehova ukusamwa. (Amapinda 27:11) Muli fyo ica kukumanya ca kutiinya pa mulandu wa kushikitika mu kupelako caishileba ukucimfya kukalamba ukwa bukapepa, ubusumino, na bumpomfu uko kwaletele amapaalo kuli Yobo na kuli bonse abo ici ca kumwenako cakosha.
Ukusubila Te Mulandu ne fya Kwesha Fyalekanalekana
Kuti pambi mwaponenwa ne fya kwesha ifyaponeneko Yobo. Imfwa ya mutemwikwa kuti pambi yamusha abapelelwa lwa mu nkuntu. Ubumi bwenu kuti bwabipilwa pa mulandu wa bulwele bwatapata. Lintu icupo cenu capwa kuti camoneka kwati ubumi bwenu bonse nabupwa. Ukukanaenda bwino kwa fya bunonshi kuti pambi kwamulenga ukuba abapiina. Kuti pambi mwapakaswa mu bukalushi ku balwani ba lupato aba kupepa kwa cine. Ukubombesha kwenu ku kucimfya ifya kwesha kuti kwamulenga ukuyumfwa ukuti ku ntanshi takuliko isubilo ilili lyonse.—1 Petro 1:6.
Mu cifulo ca kutila fye isubilo lyonse nalipwa, ipusheni mwe bene amuti, ‘Mulandu nshi ndeculila?’ Mulecula pantu mwikala pano isonde “apalaala mu maka ya Mubifi,” Satana Kaseebanya. (1 Yohane 5:19) Pali uyu wine mulandu, abantu bonse balacula. Mu nshila imo ifwe bonse tulambukilwako no lupato ulo Kaseebanya asongelekanya ukukuma ku bukombe bwa Bufumu, amashiwi yabulamo ukutemwa ayo bambi balanda, nelyo incitilo shabamo ishiku isha myendele yabula bukapepa isho shabe shaseeka nga nshi muli shino “nshiku sha kulekelesha.”—2 Timote 3:1-5.
Nga ca kuti mwaliponenwapo na masanso yabipisha, napamo mwali icinakabupalu ca “nshita ne ca mankumanya.” (Lukala Milandu 9:11) Lubali lumbi, inshita shimo shimo ifintu tafyenda bwino iyo pa mulandu wa lubembu lwesu ulwapyanwa. (Abena Roma 5:12) Nangu cingati mwalilufyanya icabipisha lelo mwalilapila no kulomba ukwafwiwa lwa ku mupashi, mwiyumfwa ukuti mwalilekeleshiwa kuli Lesa. (Ilumbo 103:10-14; Yakobo 5:13-15) Takuli uutusakamana nga fintu Lesa atusakamana. (1 Petro 5:6, 7) Kuti mwashininkisha ukuti “Yehova aba mupepi na ku baputuke misana, kabili abafunshike mitima alabapususha.” (Ilumbo 34:18) Te mulandu na fintu ica kwesha cenu cingaba icabipa nelyo icatapata, Yehova kuti amupeela amano ya kubombelamo cene. (Yakobo 1:5-8) Lyonse muleibukisha ukuti Yehova kuti aundapa ifilaso fyonse. Nga mwaba no kusenamina kwakwe, takuli icingamucilikila ku kunonka icilambu ca mweo.—Abena Roma 8:38, 39.
Bushe mu fya Kwesha Kuti Mwafuma Icisuma Icili Conse?
Kwalibako insoselo ya kale iya kuti, “Te mulandu na fintu ikumbi lili ilyafitula kulabako uko libuutile.” Iyo ni nshila yayanguka iya kulandilamo kuti te mulandu ne nshila ifintu fibipilemo, lyonse kuti mwasangako isubilo. Imifwaile ya fintu fyonse ifyalembwa mu Cebo ca kwa Lesa ya kuti “tube no kucetekela.” (Abena Roma 15:4) Te mulandu na fintu imibele yenu ingamoneka ukuba iya bulanda, amalayo ne fishinte fisangwa muli Baibolo kuti fyamupa ubuseko ne subilo cipya cipya.
Amalembo yalondolola ukuti “ubucushi [bwaba] ubwayanguka ubwa kashita akanononono” lintu twabulinganya ku mapaalo ya ciyayaya ayakapeelwa kuli bonse abatemwa Lesa. (2 Abena Korinti 4:16-18) Baibolo na kabili ilasosa ukuti imibele ya bukapepa iyo tukwata pa numa ya fya kwesha yalicilapo kukatama pa lulumbi nelyo icuma. (1 Yohane 2:15-17) E co kanshi, nangu fye ni mu kucula kuti mwafuma icintu cimo icisuma. (AbaHebere 5:8) Na kuba, ukubomfya ico mwasambilila mu fya kwesha kuti kwamuletela amapaalo yashaiwamina.
Ica kwesha cayafya kuti camulenga ukucilapo kuba aba cikuuku. Kuti pambi mwasuminisha ukuti kale mwali ne mibele iyalekalifya bambi no kumucilikila fye ukuti mulunduluke lwa ku mupashi. Napamo mwalicishishemo ukuicetekela. Pa numa ya kulolenkana na kayofi, ukwabulo kwishiba kuti mwasango kuti mwaliba abanaka kabili mulakabila bambi apakalamba. Nga ca kuti ica kwesha calimusambilisha ilyo sambililo kabili mwaliteuluka bwino bwino, ninshi mwalinonkelamo.
Ni shani nga ca kuti kale, bambi bacisangile ukuba icayafya ukubomba na imwe pa mulandu wa kuti mwalefulwa bwangu? Ici pambi calelenga no bumi bwenu ukubipilako. (Amapinda 14:29, 30) Nangu cibe fyo, pali nomba ifintu kuti pambi fyacilapo kuwama pantu mwalishintilila pa mupashi wa kwa Lesa ku kumwaafwa ukuteko mutima.—Abena Galatia 5:22, 23.
Nga fintu caba kuli bambi, napamo inshita imo tamwali ne cililishi ca kwikatila abalufyenye inkumbu. Lelo nga ca kuti imwe bene mwaisangile mu mibele iyo mwayumfwile ukuti mwalekabila ukwikatilwe nkumbu apakalamba, ukwabulo kutwishika nomba mulangufyanya ukwikatila bambi inkumbu. Icililishi ca kusansamusha umutima, ukwangwako, ne nkumbu ifyo mwalangilwe fyalimulenga ukwiluko kuti mulingile ukulangisha imibele yapalako ku bacitile icalubana abalapila. Nga ca kuti ubucushi mwakumanya bwalimulenga ukulungika ubu bunake mu buntu bwenu, ici cili cintu cimo icisuma ico mwanonkelamo mu co mwapitamo. Mwalisambililo kuti “uluse lwanga pa bupingushi.”—Yakobo 2:13; Mateo 5:7.
Ni shani nga ca kuti ukusalapula kwa mu cilonganino ca Bwina Kristu kwamulenga ukulufya amashuko yenu ayo mwatemwisha no mucinshi uo bambi bamukwatila? Mwiyumfwa abapelelwa. Ukusalapula kulaafwa ukusungilila icilonganino ica busaka, lelo imifwaile ya kuko isanshamo ukupuupuutula kacita wa fibi lwa ku mupashi. Ca cine, “ukufunda konse ilyo kubapo . . . takumoneko kwa kusekelela, kuba fye ukwa bucushi: lelo abafundwako, apo inshita yapita, kutwalako icisabo ca mutende, ica bulungami.” (AbaHebere 12:11) Nangu cingati ukusalapula kulalenga ukuyumfwa uwapelelwa, takufumyapo isubilo mu muntu uulapile mu kuicefya. Imfumu Davidi iya Israele wa pa kale alisalapwilwe mu kukosa nga nshi pa mulandu wa kulufyanya, lelo alilapile kabili mu kuya kwa nshita balimutashishe ukuti aali muntu uwali ne citetekelo capulamo.—2 Samwele 12:7-12; Ilumbo 32:5; AbaHebere 11:32-34.
Ica kwesha kuti cayambukila nga nshi imimwene yenu. Kale, pambi mwapooseshe sana amano pa mabuyo ya ku mubili ne fya kucita ifyamulengele ukuba abalumbuka no kucindikwa muli cino calo. Napamo ica kwesha icikumine ukuwa mu fya bunonshi nelyo ukulufya ifya ku mubili kwalilenga ukuti mutontomeshe pa fyacilapo kucindama. (Linganyeniko Abena Filipi 1:10.) Nomba mwalishiba ukuti imibele ya ku mupashi na mabuyo ya kufwaya ukubomba umulimo washila e fileta fye ubuseko bwa cine no kwikushiwa kubelelela.
Cetekeleni Yehova
Ukubombela Yehova umulimo washila kuti kwafumamo ukupakaswa no kucula ukufuma kuli abo bakaanya ifisumino fyenu ifya Bwina Kristu. Kuti pambi mwayumfwa abanyanyantilwa pa mulandu wa ca kwesha ca musango yu, lelo kuti mwafuma icintu icisuma. Ubu bwesho kuti bwakosha icitetekelo cenu. Ukulundapo, bambi abalepakaswa kuti bakoseleshiwa no kukoshiwa pa kumona ifyo muleshipikisha. Abalemonako imyendele yenu iishaiwamina kuti bakuntwa ukucindika Lesa. Nangu fye bantu balemukaanya kuti baseebana pa kuloleshe milimo yenu iisuma!—1 Petro 2:12; 3:16.
Pa kusengauka ukupelelwa lintu mwapakaswa, mulekabila ukucetekela Yehova. Icebo cakwe cilondolola ukuti kuli no kubako ukutauluka ku fya kwesha, lelo te kuti pambi kwiseko bwangu nga fintu mwingatemwa. Pali ino nshita, “mwinenuka mu kucite cisuma.” (2 Abena Tesalonika 3:13) Twalilileni ukufwayafwaya inshila sha kushipikishishamo ifya kwesha. Nangu fye lintu kushilemoneka ukubako isubilo, ‘pooseni pali Yehova icisendo cenu icafina, wene alemulama; pe fye takasuminishe uwalungama ukutelententa.’ (Ilumbo 55:22) Mu cifulo ca kusuulako fye ukuti tapali ico mwingacita, tontonkanyeni pa fyo mwaba abapaalwa pa kwishiba Yehova, ukusangwa pa kati ka bantu bakwe, no kuba ne subilo lya bumi bwabule mpela.—Yohane 3:16, 36.
Tonteni amano yenu pa fyacindama. Cila bushiku pepeni kuli Yehova, ukulomba ubukose pa kuti mushipikishe. (Abena Filipi 4:6, 7, 13) Cincintileni amatontonkanyo ayali yonse aya kulandula bonse abalemucusha. Sheni ifintu mu maboko ya kwa Yehova. (Abena Roma 12:19) Twalilileni ukufwayafwaya inshila sha kulopolwelamo ubuntu bwenu, ukulundulula imibele ya Bwina Kristu. (2 Petro 1:5-8) Tasheni fyonse ifyo bambi balemucitila, ukusanshako baeluda mu kutemwa abasakamana ifyo mukabila lwa ku mupashi. (AbaHebere 13:7, 17) Beni aba busumino kuli Lesa, kabili tonteni amenso yenu pa cilambu ca mweo, abacetekelo kuti nangu fye ni mfwa te kuti imupusule ici cilambu.—Yohane 5:28, 29; 17:3.
Nga ca kuti pali nomba muli aba bulanda nga nshi nelyo muleeshiwa ku fya kwesha fyatapata, ‘tetekeleni Yehova umutima wenu onse,’ kabili ubuseko bushaifulila mu kuya kwa nshita buli no kupyana pa bulanda no kucula. (Amapinda 3:5, 6; Yohane 16:20) Pe punda lya bulanda pali no kuba insansa lintu Lesa akamupaala nga fintu apaalile Yobo. Ukucula kwa pali ndakai takuli kantu lintu mwakulinganya ku cilambu cenu. (Linganyeniko Abena Roma 8:18.) Nga ca kuti mwashipikisha mu busumino kuti mwakoselesha bambi kabili ici kuti camwaafwa ukulundulula imibele ya Bwina Kristu iishaiwamina iishila pamo no “buntu bupya.” (Abena Efese 4:23, 24; Abena Kolose 3:10, 12-14) E co, lyene, koseleshiweni ku kupanda amano kwa mutumwa Petro ukwa kuti: “Abacula umwabelo kufwaya kwa kwa Lesa batuule imitima yabo kuli wene, kuli Kalenga wa cishinka, mu kucite cisuma.”—1 Petro 4:19.
[Icikope pe bula 23]
Beni nga Yobo. Te kwesha ukubulwe subilo
[Icikope pe bula 24]
Tetekeleni Yehova ku mutima wenu onse