17:3 Yesu alandikishe icacindama ukusunga mu muntontonkanya, nge fyo mwingamona pano muli Baibolo wenu wine. . . .’

Ukucitikako kumbi: ‘Kwalibako amabupilibulo ayengi aya Baibolo. Sosaite yesu ikoselesha ukubomfya ukulekanalekana ukwa yako mu kutila tucite ukulinganyako no kwaafwa abasambi ukwikata amano yatuntulu aya Malembo. Nga fintu pambi mwishibe, Baibolo mu kutendekelako yalembelwe mu ciHebere, Aramaiki, ne ciGreek. E co tuli aba kutasha ku cintu bakapilibula bacita mu kubika yene mu lulimi lwesu. Bupilibulo nshi bwa Baibolo mubomfya?

Ukutubulula kwalundwapo: ‘Mu kushininkisha muli bantu abatemwe Cebo ca kwa Lesa. E co ndi uwashininkisha ifyo muleba abasekelela mu kwishiba icaba cimo ica bupusano bukalamba pa kati ka Bupilibulo bwa Calo Cipya na mabupilibulo yambi. Cabimbamo ishina lya muntu wacindama wacilapo kulandwapo mu Malembo. Bushe namumwishiba?’ Lyene nakalimo lundapo ukuti: (1) ‘Bushe mwalishibo kuti ishina lya pa lwakwe lyamoneka mu Baibolo mu ciHebere ca kutendekelako imiku 7,000—ukucila pe shina ilili lyonse?’ (2) ‘Bupusano nshi cipanga nampo nga twabomfya ishina lya pa lwakwe ilya kwa Lesa nangu iyo? Cisuma, bushe mwalikwata ifibusa ifili fyonse ifyapalamisha mu cine cine abo ishina tamwalishiba? . . . Nga tulefwaya ukwampana kwa pa lwesu na Lesa, ukwishibe shina lyakwe kutampa kwacindama. Moneni cintu Yesu asosele pali Yohane 17:3, 6. (Amalu. 83:18)’

Ubusangu

Ubulondoloshi: Ubusangu kusha nelyo ukuleka ukupepa no mulimo wa kuli Lesa, mu cishinka ukupondokela Yehova Lesa. Abasangu bamo baitunga ukwishiba no kubombela Lesa lelo bakaana ifisambilisho nelyo ififwaikwa ifyaimikwa mu Cebo cakwe. Bambi batunga ukusumina muli Baibolo lelo bakaana ukuteyanya kwa kwa Yehova.

Bushe tulingile ukwenekela ukuti abasangu bakema mu kati na nkati ka cilonganino ca bwina Kristu?

1 Tim. 4:1: “Umupashi wasosa no kushikimika, ukuti mu nshita ishikakonkapo bamo bakafutukako ku citetekelo pa kwangwe mipashi ya kulufya, ne fisambilisho fya fiwa.”

2 Tes. 2:3: “Mwileka muntu amubepe nangu ni ku musango onse. Pantu te ti kube [Ubushiku bwa kwa Yehova], kano Ubusangu bwabalilapo ukwisa, no kusokololwo Muntu wa bupulumushi, Umwana wa boni.”

Ifishibilo fimo ifya kwishibilako abasangu—

Bafwayo ukulenga bambi ukuba abakonshi babo, muli ifyo ukulenga amalekano ya fyakaniko

Imil. 20:30: “Kukema aba muli imwe bene, abantu abakalalande fya kupuulula ku kukulapo abasambi babakonke.”

2 Pet. 2:1, 3: “Na muli imwe mukaba bakasambilisha wa bufi, abantu abakaletamo ku mbali ifya bucaibela fya konaula, abakaana Cibinda wabo uwabashitile, . . . kabili mu lunkumbwa lwabo bakamunonka mu fyebo fya malele.”

Pambi kuti batunga ukusumina muli Kristu lelo basunga mu kwanguka umulimo wa kushimikila no kusambilisha uo apeele ku bakonshi bakwe

Luka 6:46: “Lelo nga cinshi munjitila, Shikulu, Shikulu, no kukanacita ico nsosa?”

Mat. 28:19, 20: “E ico kabiyeni, kalengeni aba nko shonse ukuba abasambi, mulebabatishisha . . . mulebasambilisha ukubaka fyonse ifyo namwebele.”

Mat. 24:14: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”

Pambi kuti batunga ukubombela Lesa lelo bakaana abeminishi bakwe, ukuteyanya kwakwe ukumoneka

Yuda 8, 11: “Awe ifyo fine na bakaloota aba, bakowesho mubili, basuula na Bukateka, no kupontela . . . abakata. Kalanda kuli bene! pa kuti [balobela mu milandile ya kupondoka iya kwa] Kora.”

Impe. 16:1-3, 11, 19-21: “Kora . . . [aimine pamo na] . . . bakankala ba lukuta imyanda ibili na makumi yasano . . . bakuutanine Mose na Aarone, no kutila kuli bene, Nacipwa kuli imwe! pantu ulukuta lonse lwa mushilo, bonse bene, na mu kati kabo muli Yehova. . . . [Mose atile:] E mulandu iwe no lukuta lobe lonse mwakontanina pali Yehova. Kabili Aarone ni ani, apo mumuŋwinta? Ninshi Kora alilengele ulukuta lonse ukubakuutanina ku mwinshi we hema lya Kulaishanya: e lyo kwamoneke ubukata bwa kwa Yehova ku lukuta lonse. E lyo Yehova aebele Mose na Aarone, ati, Talukeni mu kati ka lukuta ulu, no kuleka mbapwishe nomba line.”

Tabasha fye icitetekelo ca cine lelo lyene “booma” aba kubishanya na bo aba kale, ukubomfya ukuilishanya kwa pa cintubwingi ne nshila shimbi ku kucilikila umulimo wabo; ukubombesha kwa abo basangu kupeeleshiwa ku kubongolola, te ku kukuula

Mat. 24:45-51: “Nga kanshi ni ani umusha wa cishinka kabili uwashilimuka, uo shikulu wakwe alaashile pa ba mu ŋanda yakwe, ku kubapeela ifya kulya mu nshita iyene?. . . Lelo umusha mubi nga mu mutima wakwe atila, Shikulu akokolo kwisa; kabili atendeko kuuma abasha banankwe, no kulya no kunwa pamo na bakolwa; shikulu wa musha ulya akesa mu nshita ashikashile na mu kashita ashiishibe, kabili akamulopola, no kumupaatwilo bwikalo pamo na ba bumbimunda.”

2 Tim. 2:16-18: “Leuka ku fya kubwabwata ifyabipa; pantu fikalundulwilo kucila ukutwala abantu mu kukanapepa, ne cebo cabo cikalya nge mpwalonda. Bamo aba muli abo ni Humenai na Filete: abantu abapusene ne Cine, pa kusoso kuti ukubuuka kwa ku bafwa kwapita kale, no kuwishe citetekelo ca bamo.”

Bushe abena Kristu ba cishinka kuti bapokelela abasangu mu kubapo kwabo, atemwa pa lwabo nelyo pa kubelenga ifitabo fyabo?

2 Yoh. 9, 10: “Onse uuleya ku ntanshi no kukanaikala mwi sambilisho lya kwa Kristu, takwete Lesa: . . . Ngo muntu aisa kuli imwe, ne sambilisho ili taliletele, mwimupokelela ku mwenu, nangu kumuposha.”

Rom. 16:17, 18: “Ndemupapata, mwe bamunyinane, lolekesheni abemyo kulekana ne fya kupunwisha, abakaanyo kusambilisha uko imwe mwasambilile, mupaatukeko. . . . Ku fyebo fya kutembatemba ne fya kutasha muli bubumbimunda bongole mitima ya bapelwa amano.”