Lekeni Imikalile Yesu Icindike Yehova—Ulubali 4
1 Kwaliba imyata iingi iishili ya bukapepa iyakuma ku malilo. Ulu lubali lumo umo tulingile ukucenjela sana pa kuti tatusaakenye ukupepa Yehova ne fibelesho fya cisenshi. Ukulingana ne fyo tucita kuti twataluka ku fibelesho fishili fya bukapepa nelyo kuti twaipalamika kuli fyene.
2 Cisuma ukushiika bwangu. Ukushiika bwangu kuti kwacilikila balupwa abashasumina ukwisa mu kucesha pa cililo. E kutila ukukanasendama ubushiku bonse ukulalinda icitumbi. Lelo takwaba umulandu abantu balingile ukucesesha, ukulaimba, ukulila kwacilamo nelyo ukunwa. Pa kutaluka ifi fintu, cisuma ukushiika bwangu, ilyo balupwa abashasumina bashilaisa abengafwaya ukukonka inshila shishili sha Bwina Kristu. Bamunyina bamo batila ku ncende bekala calyafya ukukanacesha pa cililo. Bamo balifika fye na ku kufumyapo ukulongana, ukusanshako na lintu baletandalilwa na kangalila wa muputule, pa kuti baye basangwe ku fililo ifisenda inshiku ishingi kabili kulaba ukucesha. Kuti twayafwa shani abantu bambi ukwishiba icine nga ca kutila ifwe tulenakila ifishilano fishili fya Bwina Kristu?—2 Tim. 1:7.
3 Ukutaluka ku kucesha pa cililo te kutila ninshi tatuli no bulanda. Ukulila nelyo ukulukusha ifilamba takwabindwa mu Cebo ca kwa Lesa. Lelo ici calipusana ne fyo aba ku calo baloosha, ku ca kumwenako, abanakashi bafwala ifya kufwala fyalamba, ukufulunganya umushishi wabo, ukukanafwala bwino, ukupongomoka umusowa pa kuti babomfwe, ukuifubaula, ukwimba icimbo ca malilo ilyo balelukusha ifilamba nelyo ilyo baleloosha. (Linganyeniko Amalango 14:1, 2.) Isubilo lya kubuuka lilingile ukutulenga ukukanacimfiwa no bulanda. Kuti twaba no bulanda, lelo tatucishamo ukuba no bulanda. (1 Tes. 4:13) Ubulanda bwacishamo kuti bwatulenga ukulekelesha ifya ku mupashi, ukutontonkanya fye no kuti kambale ndeke ukusangwa ku kulongana nelyo ukushimikila.—Luka 22:45; Marko 14:50; moneni Awake! uwa December 8, 1974, amabula 24-28.
4 Tatukabila ukulanga ubulanda bwesu ukupitila mu fya kufwala ifyo tufwele. Nangu ca kutila Umwina Kristu kuti asalapo ukufwala ifyafiita pa cililo, Amalembo tayasuminisha ukufwala ifyafiita pa nshita iitali kabili yalilesha ukubomfya ifishibilo ifya kulanga ubulanda pa mfwa. Nangu ca kutila Yesu alililile no kushinshimukila ilyo Lasaro afwile, takwaba apo calembwa ukuti akonkele imilooseshe yaseekele ku baYuda pali ilya nshita. (Yohane 11) Nangu cibe fyo, Abena Kristu tabafwile ukukalifya abantu pa kwangusha sana ifintu ica kuti balafwala ne fya kufwala fya pa nshita ya kukokoloka.—Yoele 2:12, 13.
5 Bambi balacishamo ilyo balepekanishisha ukushiikwa kwa mubili. Abena Egupti baleumika ifitumbi no kufifwika ifya kufwala fya mutengo, mu nshishi balebikamo ifipe ifingi ifyo baletunganya ukuti uwafwa kuti afikabila pa lwendo lwakwe. Uyu mwata wa kubika ifipe mu nshishi wafumine ku cisumino ca kuti pa mfwa umweo ulafuma mu mubili. Ilyo bamo kuti basalapo ukusamba icitumbi, imitabotabo yacilamo tailekabilwa.
6 Mu ncende shimo abantu balabombesha nga nshi ukufika fye na ku kutwala icitumbi ku cifulo cimo, ilingi line ku mpanga ya fikolwe e ko bayashiika. Nangu cibe fyo, ukucila ukwenda intamfu iitali, ilingi line cilaba bwino ukushiika icitumbi mu nshishi iyabela lwa mupepi na kuntu umuntu afwilile.
7 Nga ni mwe mushingemwe ukwangalila imishiikile, talukeni ku kukumbinkanya ifisumino, e kutila uko balesuminisha bakapepa ba cine na ba bufi ukulandapo, tutile ku nshishi. Nga batweba ukulandapo, tatwakafwaye ukulanda pa cililo apo bambi bacilakolobonda mu fishilano fishili fya Bwina Kristu nelyo ififundisho fya cina Babele. Te kuti tufwaye ukukonka imyata ya kubika amaluba nelyo ukupoosa iloba mu nshishi. Kabili takwaba ukukabila kwa kukwata “Icipao ca malilo” icibelelela mu filonganino. Ukwafwa kwa apo pene ukwa bamunyina e kukabilwa fye.
8 Limo limo balupwa abashasumina bapampamina pa myata imo ukuti icitwe pa fililo na pa kushiika. Lelo Umwina Kristu, pa kuba umwine wa ng’anda nelyo uushingemwe ukutungulula icililo, alingile ukuleka ifyo asambilila mu Baibolo ukwishibikwa. Abalekosela pa kukonka ifishilano fishili fya Bwina Kristu kuti baebwa ukuya no kuyacitila ifyo fintu kumbi. Nga ca kutila Umwina Kristu afilwa ukutungulula balupwa abashasumina, kuti acita bwino ukufumapo, pa kuti tacitileko ifintu ifyo Yehova abinda.—Mat. 10:21, 35, 36.
9 Ukusakamana Inshishi: Mu ncende shimo abantu balapoosa sana amano ku kusakamana inshishi. Kuti nalimo baimika ubushiku ubo bonse balingile ukuya ku nshishi, ukuwamya pa luputa no kucindika uwafwa. Ifikolwe fya mu Baibolo fyalecitako fimo ku kusakamana inshishi. (Ukute. 35:20) Lelo, umuntu umo na umo alingile ukuipingwila nga kuti aya ku nshishi no kutontonkanya pa lwa washiikwa kulya. Lelo bushe Umwina Kristu alakabila ukwimika inshiku sha kucite co? Ifya musango yo kuti fyacitwa ubushiku ubuli bonse. Ukutemwa uko twatemwa Yehova kulingile ukutwafwa ukucite cilungeme. Pambi kuti twapakaswa pa kukonka Yehova muli bucishinka, lelo kuti twasanga icisansamushi mu mashiwi ya pali 1 Petro 2:19, 20. Icine ico tukonka cifwile ukutupaatulako ku fishilano fishili fya Bwina Kristu pa kuti Lesa atupokelele.—Rom. 1:25; 2 Kor. 6:17.
10 Pa kutaluka ku fishilano fishili fya bukapepa pa lwa mishiikile ya bafwa tulashininkisha ukuti tatuleitumpa mu kupepa kwa bufi na mu fibelesho fya fibanda kabili tulatwalilila ukuba na bucibusa busuma na Yehova.