Mwilashimunuka!
1 Ilyo twaipekanya ukuya mu kushimikila ku ng’anda ne ng’anda, nalimo ubwafya bukalamba twingakwata bwa kufilwa fye no kwima ukufuma pa ng’anda yesu pene. Ukuimona kwati tatwafikapo kuti kwalenga twalashimunuka ukuyalanda icine ku ‘bantu bonse.’ (1 Tim. 2:4) Lelo tatufwile ukushimunuka ukubila imbila nsuma. Mulandu nshi?
2 Ni Mbila ya kwa Yehova: Yehova aeba abantu bakwe icebo cakwe muli Baibolo. Ilyo twaebako abantu iyi mbila, tulanda icebo cakwe, tatulanda icebo cesu. (Rom. 10:13-15) Ilyo bamo bakaana imbila ya Bufumu tulefwaya ukubeba, ninshi uo balekaana ni Yehova. Nalyo line, tatufuupulwa. Twalicetekela ukuti abafuluka ukumona ifintu ukwaluka pano isonde kabili abaibukila ukuti balakabila ifya ku mupashi kuti bacitapo cimo pa mbila ya Bufumu iyo tubashimikila.—Esek. 9:4; Mat. 5:3, 6.
3 Yehova Alakula Abantu: Umuntu umo uwalekaana ukumushimikila kale nalimo pali ndakai kuti asumina pa mulandu wa kuti ifintu fimo fyalyaluka pa kati apa kabili nafimulenga ukuti anasheko umutima. Ukufwaya kusuma ukwa kwa Yehova nalimo nomba kuti kwaba pali uyo muntu kabili kuti “amukula.” (Yoh. 6:44, 65) Ilyo cabe fyo, na ifwe pa kusanga abantu ba musango yo kano twaitemenwa ukubomfiwa na Yehova no kunakila ubutungulushi bwa bamalaika.—Ukus. 14:6.
4 Lesa Alatupa Umupashi Wakwe: Umupashi wa mushilo utupeela amaka ya kusosela “muli Shikulu no kushipa.” (Imil. 14:1-3) Nga tatulelaba iyi nkosho ya maka ilyo tuleshimikila, tatwakulashimunuka ukulanda icine ku bena mupalamano, abo tubomba na bo, abo tusambilila na bo ku sukulu, balupwa, nangu fye ku basambilila na ku bakankaala.
5 Yesu Alitusambilishe Ifya Kubomba: Yesu aleipusha ifipusho fya kulenga umuntu alatontonkanya, alelanda ifilangililo ifyo umuntu onse engomfwa, kabili alepelulushanya na bantu ifya mu Malembo. Aleyangusha pa kulondolola icine, ica kuti umuntu kuti atemwa ukumfwa kabili alelanda ukufuma ku mutima. Imilandile ya musango yu na lelo line kuti yabomba bwino sana. (1 Kor. 4:17) Uko tuleshimikila nalimo kuti kwapusanapusana, lelo imbila ya maka iya Bufumu yena yaba fye cimo cine.
6 Twakwata ishuko lya kubomfiwa na Yehova ukwafwa bantu mu musango waibela kabili uwacindama. Kanshi twilashimunuka! Natushipe no kuleka Yehova “atwiswileko ukwa kwingilile cebo” pa kuti tulebila imbila nsuma ku bantu.—Kol. 4:2-4.