Ukwaafwa Bambi Ukulumbanya Yehova
1 Ubukombe bwacindama bulebilwa ku bantu mwi sonde lyonse ukuti: “Tiineni Lesa, no kumupeelo mucinshi, pa kuti naiise nshita ya bupingushi bwakwe; pepeni uwacitile umuulu ne calo na bemba no tumfukumfuku twa menshi.” (Ukus. 14:6, 7) Twalikwata ishuko lya kubilako ubu bukombe. Cinshi abantu bafwile ukwishiba pali Yehova pa kuti bamutiine no kumupepa?
2 Ishina Lyakwe: Abantu bafwile ukwishiba ishina lya kwa Lesa wa cine ku kumulekanya kuli tulesa twa bufi utupepwa lelo. (Amala. 4:35; 1 Kor. 8:5, 6) Na kuba, bakalemba ba Baibolo babomfeshe ishina lyaishibikwa ilya kwa Yehova imiku ukucila 7,000. Nangu ca kuti tulabomfya umucetekanya ukukuma ku nshita twingalumbula ishina lya kwa Lesa, tatufwile ukulifisa nelyo ukutiina ukulilumbula. Lesa afwaya abantu bonse ukwishiba ishina lyakwe.—Amalu. 83:18.
3 Ubuntu Bwakwe: Pa kuti abantu balumbanye Yehova, bafwile ukwishiba ifyo aba. Tufwile ukubasambilisha pa kutemwa kwakwe ukwapulamo, amano yakwe ayafulisha, ubupingushi bwakwe ubwafikapo, na maka yakwe ayashingalinganishiwako, pamo no luse lwakwe, ukutemwa kwakwe ukwa cishinka, ne mibele imbi iisuma. (Ukufu. 34:6, 7) Kabili bafwile ukusambilila ukuba na katiina kalinga kuli Lesa, ukumucindika, ukwishiba ukuti ubumi bwabo bwashintilila pa kusenaminwa na Yehova.—Amalu. 89:7.
4 Ukupalama Kuli Lesa: Pa kuti abantu bapusushiwe ku bupingushi bwa kwa Lesa ubuleisa, bafwile ukulilila kwi shina lya kwa Yehova no kumucetekela. (Rom. 10:13, 14; 2 Tes. 1:8) Ukucite fi takukabila ukuti twaishiba fye ishina lya kwa Lesa ne mibele yakwe. Tufwile ukwaafwa abantu ukulundulula bucibusa na Yehova, ukumutetekela ne mitima yabo yonse. (Amapi. 3:5, 6) Ilyo balecita ifyo balesambilila, balepepa lyonse kuli Lesa, no kumona ifyo alebaafwa mu mikalile yabo, icitetekelo cabo cikakosa, ukubaafwa ukupalama kuli Yehova.—Amalu. 34:8.
5 Shi natupimpe ukubila ishina lya kwa Lesa no kwaafwa bambi ukumutetekela no mutima onse no kumutiina. Kuti twayafwa abantu na bambi abengi ukwishiba Yehova no kumulumbanya nga ‘Lesa we pusukilo’ lyabo.—Amalu. 25:5.