Imintapendwa Balelundwako
1 Nga filya cali mu mwanda wa myaka uwa kubalilapo e fyo cili na lelo, kuli ukulunduluka kwa cilonganino ca Bwina Kristu ukushatala akubako. (Imil. 2:41; 4:4) Umwaka wapwile, abasambi bapya 288,907 balibatishiwe, e kuti ababatishiwe cila bushiku bali mupepi na 791! Abantu mupepi na 1,000,000 balibatishiwe mu myaka itatu iyapita. Cine cine, Yehova aletwalilila ukulundako imintapendwa ya basumina.—Imil. 5:14.
2 Abapya abengi abashabelesha imikalile ya Bwina Kristu balekabila ubwafwilisho no kukansha kwa balya abakosa mu citetekelo. (Rom. 15:1) Pa Bena Kristu ba kubalilapo pali bamo abafililwe “ukulola ku bukalamba” nangu line apo babatishiwilwe palipitile imyaka iingi. (Heb. 5:12; 6:1) E co muli kalata wakwe alembele ku baHebere, Paulo akomaile pa fintu ifyo Abena Kristu balekabila pa kuti bengakula lwa ku mupashi. Fintu nshi ifi, kabili bali no kwafwiwa shani?
3 Ukukwata Imibele Isuma pa Kubelenga: (Heb. 5:13, 14). Ukulingana ne sambilisho lya kwa Paulo, ukuba umusambi musuma kusanshamo ukupoosako amano pa kusambilila, ukubwekeshapo, no kubomfya “ifya kulya fyakosa” ifipekanishiwa no kuteyanya kwa kwa Yehova. (Moneni Ulupungu lwa kwa Kalinda ulwa August 15, 1993, amabula 12-17.) Ukulanshanya ifya ku mupashi na bapya abasumina no kubebako icine cishaiwamina ico mwasanga pa mulandu wa kusokota kwenu, kuti fyabalenga ukuba ne mibele isuma pa kubelenga. Cinshi limo limo mushingetila umupya ukusangwako ilyo mulebelenga pa lwenu nelyo no lupwa lwenu, nalimo kuti mwapekanya isambililo lya Ulupungu lwa kwa Kalinda capamo?
4 Ukusangwa ku Kulongana Lyonse: Ica kumwenako cenu ukuba aba cishinka no kulanda kwenu mu kutemwa no kukoselesha fikafwa abapya mu cilonganino ukutaluka ku cintu na cimbi icisakamika ico Paulo alumbwile ukuti “umusango” uo bamo bakwata uwa kupuswa ku kulongana kwa Bwina Kristu. (Heb. 10:24, 25) Bafweni ukumfwikisha ukuti ukulongana konse kulatwafwa lwa ku mupashi ukuba mu cilonganino. Cila muntu mu cilonganino afwile ukuitendekelako ukulenga abapya ukuyumfwa abapokelelwa ku ba bwananyina. Ilyo ukulongana kushilatendeka, ukucila ukwikala fye, cinshi mushingendelako no kweba bambi mu cilonganino ishina lyenu, maka maka balya mushishibe.
5 Ukucetekela pa Kupalama Kuli Yehova: Pa kucimfya ubunake bwa ku mubili ne filubo fya buntunse, tufwile ukufwaya Yehova mwi pepo, ukumweba ifyo tuletontonkanya ne filetusakamika sana. Afweni abapya ukusambilila ukuti pa kupaapaata Yehova ukuti abafwe, nga fintu Paulo akoseleshe, tabafwile ukutendwa. (Heb. 4:15, 16; 10:22) Ukushimika ifyacitikapo kuli imwe kukakosha abapya ukucetekela ukuti Yehova alomfwa amapepo yafuma pa nshi ya mutima.
6 Ukushako Inshita ya Butumikishi: Na kabili Paulo alangile ukuti tulakoseleshiwa lwa ku mupashi nga lyonse ‘tuletuula ilambo lya malumbo kuli Lesa.’ (Heb. 13:15) Bushe mwalitontonkanyapo pa lwa kweba kasabankanya mupya ukuya na imwe mu mulimo wenu uwa mwi bala cila mulungu? Nalimo imwe babili kuti mwapekanya ifya kuyalanda nelyo kuti mwatontonkanya pa nshila imo iya kushimikilamo iyo umupya ashaeshapo.
7 Imintapendwa ya bantu abalelundwako balaleta insansa lelo balekabila ukwafwiwa. Ukubombesha kwesu mu kukansha no kukonkomesha abapya mu cilonganino kukabafwa ukulundulula icitetekelo cakosa icikabilwa ku ‘kusunga imitima yabo.’—Heb. 3:12, 13; 10:39.