Lengeni Icine Pali Yesu Cishibikwe
1 Abena Kristu basubwa, abafwilishiwa na banabo aba mu mpaanga shimbi, ‘bakwato bunte bwa kwa Yesu.’ (Ukus. 12:17) Uyu mulimo wacindama, apo ipusukilo lishila fye muli wene.—Yoh. 17:3; Imil. 4:12.
2 ‘Inshila, Icine, no Mweo’: Yesu atile: “Nine nshila ne cine no mweo: takuli uwisa kuli Tata, kano aishila muli ine.” (Yoh. 14:6) Ni muli Yesu fye, “inshila,” e mo twingapalamina kuli Lesa mwi pepo no kuba na bucibusa bwasenaminwa na wene. (Yoh. 15:16) Yesu e “cine” pantu ukusesema konse ne finshingwa fyaba mu Amalembo ya ciHebere fyaishileba ifya cine muli Wene. (Yoh. 1:17; Kol. 2:16, 17) Na kuba, ubufwayo bukalamba ubwa kusesema kwa cine bwaba kusanikila pa mulimo wakwe uukalamba mu kubomba ubufwayo bwa kwa Lesa. (Ukus. 19:10) Kabinge, Yesu e “mweo.” Pa kunonka ubupe bwa mweo wa muyayaya, bonse bafwile ukutetekela ilambo lyakwe ilya cilubula.—Yoh. 3:16, 36; Heb. 2:9.
3 Umutwe Kabili Imfumu Iteeka: Abantu bafwile no kwishiba amaka ya kutungulula ayo Yehova apeela Umwana wakwe. Yesu alibikwa ukuba Imfumu ya Bufumu bwa kwa Lesa—‘kuli wene e kwabe cumfwila ca nko sha bantu.’ (Ukute. 49:10) Kabili Yehova alimulaasa ukuba Umutwe wa cilonganino. (Efes. 1:22, 23) Tulekabila ukwafwa abasambi besu aba Baibolo ukumfwikisha ifyo Yesu atungulula icilonganino no kubomfya “umusha wa cishinka kabili uwashilimuka” ku kupekanya “ifya kulya mu nshita iyene.”—Mat. 24:45-47.
4 Shimapepo Mukalamba uwa Nkumbu: Apo Yesu aponenwe ne fya kwesha no kucula ilyo aali umuntunse, “e mo aishibilo kwafwa abeshiwa.” (Heb. 2:17, 18) Fintu cisansamusha abantunse bashapwililika ukwishiba ukuti Yesu alabalangulukila mu kunakuka kwabo no kubapaapaatilako mu cikuuku! (Rom. 8:34) Ukushintilila pe lambo lya kwa Yesu no kupitila mu milimo yakwe nga Shimapepo Mukalamba, kuti twapalama kuli Yehova “no kupama” pa kuti tusange “ukutwafwa pa nshita ya kukabila kwesu.”—Heb. 4:15, 16.
5 Shi ukubombesha kwesu mu kwishibisha bambi icine pali Yesu kubalenge ukumumfwila no kumubombela capamo na ifwe.—Yoh. 14:15, 21.