Ukutasha Lesa pa Luse Lwakwe
1 Ilyo umutumwa Paulo talaba Umwina Kristu, tatemenwe ukusanduluka kwalecitika ukwa buKristu. Lelo, apo alecite fintu mu kukanaishiba, alibelelwe uluse. Yehova alangile icikuuku ca bupe fye kabili Paulo apeelwe umulimo wa kushimikila. Paulo alicindamike uyo mulimo. (Imil. 26:9-18; 1 Tim. 1:12-14) Ukutasha Yehova pa luse lwakwe kwalengele Paulo ukuipeelesha ku kufishapo ubutumikishi bwakwe.—2 Kor. 12:15.
2 Na ifwe bene twalipeelwa ubutumikishi, pa mulandu wa luse kwa Lesa. (2 Kor. 4:1) Kuti twalanga ukutasha pa luse lwakwe mu kubombesha mu kwafwa bambi ukulunduluka lwa ku mupashi, nga filya Paulo acitile. Inshila imo twingacitilamo ico kutendeka amasambililo ya Baibolo no kuyatungulula.
3 Ukutendeka Amasambililo ya Baibolo: Inshila imo iya kutendekelamo amasambililo ya Baibolo, kukwata aba kutwalila magazini lyonse. Ilyo tulebatandalila lyonse, tukeshiba ifibasakamika. Mu kuya kwa nshita, icipande muli magazini umo kuti caba e ntendekelo ya kutampilapo isambililo lya Baibolo muli broshuwa ya Cintu Lesa Afwaya. Pa kutandala kwakonkapo, limbi kuti ukulanshanya kwatwalilila muli broshuwa ya Cintu Lesa Afwaya ilyo mwamutwalila bamagazini.
4 Ukubombesha ne Pepo E Fifwaikwa: Ipepo no mukoosha fikatulenga ukuwamyako mu mulimo wesu uwa kushimikila. Nkashi painiya uwakwete fye isambililo limo ilya Baibolo apepele kuli Yehova ukuti amwafwe ukusanga amasambililo yambi. Kabili, abombele umwabelele amapepo yakwe. Abebetele ubutumikishi bwakwe no kusanga ukuti taletambika amasambililo ya Baibolo pa fipempu fya kubwelelamo. Atendeke ukucite co kabili mu kwangufyanya alikwete amasambililo na yambi yabili.
5 Ala twalishuka pa kubombako umulimo wa kwishibisha “imbila nsuma ya cikuuku ca bupe fye ica kwa Lesa”! (Imil. 20:24) Shi ukutasha Lesa pa luse lwakwe nakutulenge ukuba aba mukoosha mu kwafwa bambi ukunonkelamo mu cikuuku ca bupe fye ica kwa Yehova.