Ukulongana kwa Muputule Ukupya
1 Shikulwifwe asobele ukuti abasambi bakwe bakacushiwa. (Mat. 24:9) Bushe tufwile ukumona shani amesho? Cinshi cikatwafwa ukushipikisha ubucushi? Ukulongana kwa muputule ukwa mwaka wa mulimo uwa 2004 kukasuka ayo mepusho. Umutwe uletila “Sekeleleni mwi Subilo. Mu Bucushi Mube Abashipikisha.”—Rom. 12:12.
2 Amalyashi ya Kukonkana Yabili: Amalyashi ya kubalilapo ayakakonkana yakaba no mutwe wa kuti “Twaleni Ifisabo mu Kushipikisha.” Yakalanda pa nshila tutwalilamo ifisabo. Bakasabankanya aba mpendwa bakepushiwa pa fyo bashimikila no kusambilisha ne pamfya. Abafyashi tabafwile ukupuswa ku lyashi likalati “Ilyo Mwasalapulwa na Yehova,” ilikalanda pa fyo abafyashi bengapelulushanya na bana babo. Kalanda wa kulekelesha muli uku kukonkana akalanda pa fyo tufwile ukucita nga tatulefwaya ukuba ne mibele ya ku calo iingatulenga ukukanatwala ifisabo.—Marko 4:19.
3 Umutwe wa malyashi yalenga bubili ayakakonkana ukalati “Butukeni Ulubilo no Kushipikisha.” Likatulanga ifyo bumi bwesu bwaba ngo lubilo lwa kucimfyanya. Mulandu nshi tufwile ukubutukila umwabela mafunde? Bushe kuti twacita shani pa kufuula conse icafina no kukanatompoka mu lubilo lwa ku bumi? Ukufunda kwa mu Malembo ukwa pa nshita yalinga kukapeelwa kabili kukatwafwa bonse ukutwalilila ukubutuka no kushipikisha.
4 Ukushipikisha Kuleta Ukusenaminwa kwa kwa Lesa: Amalyashi ayakalandwa na bakangalila benda yakakosha icitetekelo ca bomfwila no kukonka ukufunda. Ilyashi limo ilyo kangalila wa citungu akalanda lileti “Ukushipikisha Kuletako Ukusuminishiwa.” Ilyashi lya ku cintubwingi likaasuka amepusho yakalatila: Ni mwi shina lya kwa ani inko shifwile ukusubila, kabili bushe calola mwi ukusubila muli ilyo shina? Ilyashi lya kusondwelela ilikalati “Mu Kushipikisha Kwenu E mo Mukabakile Myeo Yenu,” likalanda pa calengele Yesu ukushipikisha ulufyengo ukwabula ukuumfwa icifukushi.
5 Mwikalaba ukwisa ne citabo ce Sukulu lya Butumikishi no Ulupungu lwa kwa Kalinda ulwa uyo mulungu. Lembeni ifishinka pa kuti mukapooseko sana amano na pa kuti mukalosheko inshita imbi. Ukupituluka mu kulongana kukesabako inshita imbi mu cilonganino.
6 Yehova umwine wine e upekenye uyu umutebeto wa ku mupashi. Iseni! Mulye! Nga twasangwa ku kulongana konse, tukaanga.—Esa. 65:14.