Twalipeele Lesa Wesu Ubukata

Icipande mu Ubutumikishi Bwesu Ubwa Bufumu ubwa July icaleti “Muleafwana Ukubomba Lyonse” cacincishe ifwe bonse ukupwa umwaka wa mulimo uwa 2003 “abapimpa nga nshi mu mulimo wa kwa Yehova.” Ilyo tulebebeta pa fyo icalo cesu cabombele, natumone na fintu icilonganino cesu cabombele. Ici cilingile ukutukoselesha ukutwalilila ukupeela Lesa wesu ubukata pa kwafwilisha nga nshi umulimo wa Bufumu.

Ibala lya Zambia lyakwete ubwingi bonse ubwa bakasabankanya 114,757, nga kwakanya pa myeshi yonse. Umwaka wapwile icipendo cali 110,443. Uku kuli kwingilishiwako kwa mapesenti 4. Bushe mu cilonganino cenu ukwingilishiwako kwali shani? Lelo, impendwa ya babatishiwe yalibwelele pa nshi. Umwaka wapwile yali 10,941 lelo uno mwaka yali 8,930. Lelo impendwa ya masambililo ya Baibolo yena yalininine ukufika ku mapesenti 5.

Bushe pa masambililo ya Baibolo ayatungulwilwe 172,914, na imwe mwalitungulwileko limo nelyo yabili uyu mwaka wapwile? Nga ni fyo, bushe aba basambi ba Baibolo balelunduluka ukulola ku kuipeela no lubatisho pa kuti Yehova akapeelwe ubukata na bumbi? Bushe napamo mulekabila ukuwamyako imisambilishishe yenu iya masambililo ya Baibolo aya mu ng’anda? Ukukansha abantu ukuba ababomfi ba kwa Yehova lishuko kabili mulimo wakakala. Tufwile ukubombesha sana pa kupekanishisha isambililo lya Baibolo ilya mu ng’anda no kutungulula.—1 Tim. 4:15, 16.

Ifipendo fya maawala ya butumikishi bwa mwi bala, ifipempu fya kubwelelamo, na bamagazini ne mpapulo uno mwaka fyonse fyalicilile panono pa fipendo fya mwaka wapwile. Lelo, ifilonganino ifingi fyakabile ukucinkulwako libili libili ukutuma amalipoti. Tuletasha amabumba ya baeluda ayengi ayangwako lyonse ukupoka amalipoti ya cilonganino cabo, ukuyalonganika no kuyatuma kwi ofesi lya musambo bwangu bwangu.

Fyonse ifyo imwe bakasabankanya ba busumino na bapainiya mwabombele mu kushimikila imbila nsuma mu mwaka wa mulimo uwa 2003 fyalengele lipoti ukuwama. Ilyo nomba tule-enekela ifisuma mu mwaka wa mulimo uwa 2004, shi ifwe bonse—bakasabankanya ne filonganino—natuletuma amalipoti ya mulimo tubomba lyonse. Kanshi natupambane ukubombo mulimo wesu uwa ‘kulenga abasambi,’ ukubasambilisha ‘ukutiina Lesa no kumucindika.’—Mat. 28:19; Ukus. 14:7.