Bamalaika Balatwafwa
1 “Moneni! nakulaba na imwe inshiku shonse ukufika na ku mpela ya bwikashi.” Aya mashiwi yalakoselesha nga nshi bonse abomfwila icebo ca kwa Yesu ica kuti: ‘Kabiyeni, kalengeni abasambi’! (Mat. 28:18-20) Ukwafwiwa Abena Kristu ba cine bafwiwa kuli bamalaika e nshila imo iikalamba iilanga ukuti Yesu aba nabo. (Mat. 13:36-43) Ala mwandini cilawama nga nshi ukubombela pamo ne fi fibumbwa fya ku mupashi ifya cishinka ilyo tubilisha “imbila nsuma ya muyayaya”!—Ukus. 14:6, 7.
2 Mu Mulimo Wesu Uwa Kushimikila: Baibolo isokolola ukutila bamalaika balatumwa “ku kupyungila abakapyana ipusukilo.” (Heb. 1:14) Mu mwanda wa myaka uwa kubalilapo, bamalaika baleafwa abakonshi ba kwa Yesu ukusanga abayana. (Imil. 8:26) Muno nshiku, ababomfi ba kwa Lesa batwalilila ukuimwena ifyo bamalaika babafwa. Ilingi line, abantu abengi batila balepepela ukuti babafwe pa nshita ine Nte abatandalile. Ifwe na bamalaika tulasekelela ilyo aba bantu bayankula ku bukombe bwa Bufumu!—Luka 15:10.
3 Ilyo Batukaanya: Daniele na balumendo banankwe batatu abaHebere, umutumwa Petro, na bambi abengi abaeshiwa amesho yabipisha baliimwena ubucingo bwa kwa Yehova ukupitila muli bamalaika, “impalume sha maka.” (Amalu. 103:20; Dan. 3:28; 6:21, 22; Imil. 12:11) Nangula inshita shimo kuti twayumfwa abapelelwa ilyo tule-eshiwa, kuti twakoseleshiwa nga twatontonkanya pali kalume wa kwa Elisha ilyo aishibe ukuti “abali kuli ifwe bengi ukucisha abali kuli bene.” (2 Isha. 6:15-17) Nangula twapatikishiwa ukupaatulwa kuli bamunyinefwe ba Bwina Kristu, tatulekabila ukubulwe subilo. Icebo ca kwa Lesa citulaya ukuti: “Malaika wa kwa Yehova acite nkambi ukushinguluka pa bamutiina.”—Amalu. 34:7.
4 Nomba line fye imilalo ya bamalaika ikanina pali bakabalwe ku kufumyapo bonse abakaanya ubufumu bwa kwa Kristu. (Ukus. 19:11, 14, 15) Ilyo tulelolela ubo bushiku, shi natutwalilile ukulumbanya Yehova ukwabulo mwenso, no kucetekela umupwilapo ukuti tuletungililwa ne milalo ya ku muulu iyumfwila ico Kristu asosa.—1 Pet. 3:22.