Bushe Kuti Kwabako Shani Ukwikatana kwa Cine Ukwa Bwina Kristu?

¹ Cinshi cingekatanya abantu ukucila pa mamilioni 6 aba mu fyalo 234 kabili aba ndimi mupepi na 380? Icingabekatanya fye kupepa Yehova Lesa. (Mika 2:12; 4:1-3) Ku fyo bapitamo, Inte sha kwa Yehova balishiba ukuti ukwikatana kwa cine ukwa Bwina Kristu e ko kwaba. Apo twaba “umukuni umo,” uutungululwa na “kacema umo,” twapampamina pa kukaana umupashi wa cino calo uuleta amalekano.—Yoh. 10:16; Efes. 2:2.

² Ubufwayo bwa kwa Lesa ubushifilwa bwa kuti bamalaika bonse na bantunse bekatane mu kupepa kwa cine. (Ukus. 5:13) Pa kwishiba ifyo ici cacindama, Yesu alepepelapo sana pa kwikatana kwa bakonshi bakwe. (Yoh. 17:20, 21) Bushe ifwe umo umo kuti twacita shani ku kutwala pa ntanshi ukwikatana kwa mu cilonganino ca Bwina Kristu?

³ Ifyo Twingaba Abaikatana: Ukwabula Icebo ca kwa Lesa no mupashi wakwe, te kuti kube ukwikatana kwa Bwina Kristu. Ukukonka ifyo tubelenga mu Baibolo kulenga umupashi wa kwa Lesa ukwisa mu bumi bwesu ukwabula ubwafya. Ici cilenga ‘tulebaka bu-umo bwa mupashi mu cikakilo ca kwikatanya ica mutende.’ (Efes. 4:3) Kabili citucincisha ukushipikishanya mu kutemwa. (Kol. 3:13, 14; 1 Pet. 4:8) Bushe mulatwalako pa ntanshi ukwikatana kwa Bwina Kristu pa kwetetula pa Cebo ca kwa Lesa cila bushiku?

⁴ Umulimo wesu uwa kushimikila no kupanga abasambi na o ulatwikatanya. Ilyo tulebomba na bambi mu butumikishi bwa Bwina Kristu, “abatukutila pamo ku citetekelo ca mbila nsuma,” tuba “ababomfi banabo mu cine.” (Fil. 1:27; 3 Yoh. 8) Ilyo tulecite fyo, tulakosha ifikakilo fya kutemwa mu cilonganino. Napamo kuti mwaebako umo uo papitile inshiku ishingi apo mwabombele nankwe mu butumikishi bwa mwi bala ukubomba na imwe uno mulungu.

⁵ Twalipaalwa icine cine ukuba ulubali lwa bumunyina bwa cine ubwa pa kati ka fyalo leelo! (1 Pet. 5:9) Tapakokwele apo abantu abengi sana baimwenene uku kwikatana kwa mwi sonde lyonse pa Mabungano ya pa Kati ka Nko ayaleti “Peeleni Lesa Ubukata.” Shi ifwe umo umo natuletwalako pa ntanshi uku kwikatana kwacindama pa kubelenga Icebo ca kwa Lesa cila bushiku, pa kuwikishanya mu kutemwa, na pa kushimikila imbila nsuma “no mutima umo.”—Rom. 15:6.

Ukufwaya Abayana

¹ Amashiwi ya kwa Yesu pa fya kubomba umulimo wa kushimikila yatupeela umulimo wakosa. Atile: “Mu musumba onse nelyo umushi umo mwaingila, fwayenimo uwayana.” (Mat. 10:11) Apo abantu tabalesangwa sana pa mayanda leelo, bushe kuti twabomba shani bwino uyu mulimo wa kufwaya abayana?

² Lingululeni Icifulo Mushimikilamo: Tendekeleni pa kulingulula icifulo mushimikilamo. Bushe ni nshita nshi abantu bengasangwa pa mayanda? Ni kwi bengasangwa inshita ya kasuba? Bushe kuliko ubushiku bumo mu mulungu nelyo inshita bengatemwa ukutandalilwa? Nga mwalinga ubutumikishi bwenu mu inshita ne mikalile ya bantu baba mu cifulo mushimikilamo kuti calenga mwafuma ifisabo fisuma.—1 Kor. 9:23, 26.

³ Bakasabankanya abengi balasanga abantu pa mayanda mu cungulo. Iyi e nshita abene mayanda bamo bashikwata sana incito kabili e nshita bakwata umutima wa kufwaya ukukutika. Ukushimikila mu ncende sha makwebo na mu fifulo umusangwa sana abantu e nshila na shimbi twingasangilamo abantu ba kushimikilako imbila nsuma.

⁴ Icilonganino cimo mu mweshi umo uwa mibombele yaibela, catantike ukushimikila mu cungulo kasuba pa Fibelushi na pa nshiku sha Mulungu no kushimikila icungulo bushiku pali Citatu na pali Cisano. Bateyenye no kushimikila kwa pa foni na mu ncende ya makwebo. Aya mapekanyo yalengele icilonganino ukucincimukila ubutumikishi icine cine ica kuti bapingwilepo ukutwalilila na yo.

⁵ Beni no Mukoosha wa Kubwelelako: Nga calikosa mu cifulo mushimikilamo ukusanga abantu pa mayanda ilyo mwabwelelako, esheni ukumfwanina limo na mwine ng’anda inshita no bushiku mukabwelelako ilyo mwapwisha ukutandala kwenu. Kuti mwacite fi na pa kutandala kwa kubalilapo. Lyene mwifilwa ukufisha ico mwalaya. (Mat. 5:37) Nga ca kutila abene ng’anda balikwata foni, bepusheni inambala ya foni. Ukucite ci na ko kuti kwamwafwa ukulanda no yo muntu na kabili.

⁶ Cine cine Yehova akapaala ukubombesha kwesu ukwa kufwaya abayana no kulundulula ukusekelela tusanga muli bene.—Amapi. 21:5.