Ukupeela Yehova Ifyawamisha

¹ Ifunde lya kwa Yehova ilyo apeele abena Israele lyalungatike ukuti inama ishalepeelwa kuli wene ku kuba ilambo shifwile ukuba ‘ishisuma.’ Inama iyalemana tayalepokelelwa. (Lebi 22:18-20; Mal. 1:6-9) Kabili, ilyo baninika ilambo, amafuta yonse, e kutila ifyawamisha ku nama fyaleba fya kwa Yehova. (Lebi 3:14-16) Yehova aliwaminwe ukupokelela ifyawamisha pantu aali e Shibo wa bena Israele kabili Shikulwibo.

² Filya cali mu nshita sha pa kale, na leelo line Lesa afwaya ukuti amalambo yesu yabe ayasuma. Umulimo wesu ulingile ukulanga ukuti twaliba na katiina kalinga kuli Yehova. Kwena, ifintu filapusanapusana ukulingana no muntu umo umo. Lelo, cili bwino ukuibebeta fwe bene no kumona nga tulemupeela ifyawamisha.—Efes. 5:10.

³ Umulimo wa Mweo Onse: Pa kuti umulimo wesu ucindike Yehova no kufika pa mitima ya bantu, taufwile kuba wa cikulu kubomba. Ifyo tulelanda pali Lesa wesu na pa bufwayo bwakwe fifwile ukufuma pa nshi ya mutima. (Amalu. 145:7) Ici cilekomaila fye pa bucindami bwa kutantika kusuma ukwa kuibelengela Baibolo pa lwesu no kuisambilisha fwe bene.—Amapi. 15:28.

⁴ Ilyo tulepeela Yehova ifyawamisha fyesu tufwile no kupashanya ukutemwa kwakwe uko atemwa abantu. (Efes. 5:1, 2) Ukutemwa abantu kukatulenga ukufwaya ukweba abengi nga nshi icine cipeelo mweo. (Marko 6:34) Kutulenga ukufwaisha ukwishiba bwino abantu tuleshimikila. Kutulenga ukutwalilila ukutontonkanya pali bene pa numa ya kutandala kwa kubalilapo kabili kutulenga ukubwelelako. Kutulenga ukubombesha na maka yesu yonse ukwafwa abantu ukulunduluka lwa ku mupashi.—Imil. 20:24; 26:28, 29.

⁵ “Ilambo lya Kulumbanya”: Inshila imbi tupeelelamo Yehova ifyawamisha fyesu ni pa kubombesha mu mulimo. Nga twateyanya ifintu bwino kabili twapoosa amano ku mulimo ulekabilwa ukubombwa, kuti twapwishisha ifingi mu nshita tukwete. (1 Tim. 4:10) Ukupekanya bwino kutulenga ukulanda ifileumfwika kabili ifya kushinina abantu, ne ci e cilenga ukwankulako bwino. (Amapi. 16:21) Ilyo tule-ebako bambi imbila nsuma, amashiwi yesu ayalefuma pa nshi ya mutima kuti yaitwa bwino bwino ati “ilambo lya kulumbanya.”—Heb. 13:15.

Mwe Baice—Mulebelenga Icebo ca kwa Lesa!

¹ Inshita ya bwaice ni nshita ya mafya kabili ni nshita iyo cayafya ukupingula bwino pa fintu fimo. Abengi pali imwe mwe Bena Kristu abaice cila bushiku mulapatikishiwa ukutoba amafunde ya kwa Lesa ayakaanya imyendele yabipa. Ilyo mushilatendeka ukuipingwila ifya kucita mu masomo, incito, icupo, mufwile ukuimikila intanshi amabuyo ya ku mupashi. E lyeka fye mwingapingula bwino ifyo mulefwaya ukucita mu bumi. Amabuyo yasuma aya ku mupashi yakamwafwa ukubomba bwino no kumulenga ukutunguluka. Nga mulebelenga no kwetetula pa Cebo ca kwa Lesa lyonse, cikamulenga ukwikala umwabela ukufunda kwa ciko ukwapuutwamo, kabili mukatunguluka mu kucite fyo.—Yosh. 1:8; Amalu. 1:2, 3.

² Cikamwafwa Shani? Icalo ca kwa Satana caisulamo ifintu ifingi ifibeleleka ku kucita icabipa. (1 Yoh. 2:15, 16) Napamo walishiba abo usambilila na bo nelyo fye bambi abo ulingene na bo abalecula pa mulandu wa kuti banakile ku babapatikishe ukucite icabipa. Ukuumfwila lyonse ukufunda kwa Baibolo kukakupeela amaka lwa ku mubili na lwa ku mupashi aya kukaana ulubembu. Kabili, ukufunda kwa Cebo ca kwa Lesa kuti kwakwafwa ukutaluka ku fiteyo fya kwa Satana. (2 Kor. 2:11; Heb. 5:14) Ukwendela mu nshila sha kwa Lesa kukakuletela insansa sha cine cine, e kutila ukasekelamo mu mikalile yobe.—Amalu. 119:1, 9, 11.

³ Ifishinte fya mu Cebo ca kwa Lesa ifishaluka fyalicila amano ya bantunse. (Amalu. 119:98-100) Ukwishiba bwino ifishinte fya mu Baibolo no kwetetula pa kufwaya kwa kwa Yehova uko atusokolwela pamo pene no kupepa amapepo aya pa nshi ya mutima kuti yakwafwa ukuba na bucibusa na Yehova Lesa umwine wa Baibolo uwapulamo ku mano. Alayo kuti: “Ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.”—Amalu. 32:8.

⁴ Paatuleniko Inshita iya Kubelenga Baibolo: Umwina Kristu umo umukashana aimike ubuyo bwa kubelenga Baibolo onse, kabili apwishishe ukuibelenga mu mwaka fye umo. Yamwafwile shani? Ebukisho kuti: “Nasambilile ifingi nga nshi pali Yehova ifyampalamike kuli wene no kunengo kufwaya ukuba na katiina kuli wene ubumi bwandi bonse.” (Yako. 4:8) Bushe mwalibelenga Baibolo yonse? Nga tamwaibelenga, twamukoselesha ukwimika ubuyo bwa kubelenga. Cine cine Yehova akapaala ukubombesha kwenu, kabili mukalobolola amapaalo ayengi.