Ukulanda Ifyebo Fya Kushinina Ifya Cishinka

ILYO mwalanda cimo, tapali icilubene kuli bakomfwa wenu ukwipusha ati: “Mulandu nshi ico cibelele ica cine? Kuti twashininkisha shani ukuti ifyo kalanda alesosa fifwile ukucetekelwa?” Imwe nga kasambilisha, mulimo wenu ukwasuka amepusho ya musango yo nelyo ukwafwa bakomfwa wenu ukwasuka. Nga ca kuti ico e cishinka cikalamba sana mu fyebo mulelanda, shininkisheni ukuti mwalanda ubushininkisho bwine bwine ubwa kuti bakomfwa bacetekela. Ici na co cikalenga ilyashi lyenu ukuba ilya kunashanasha.

Umutumwa Paulo alenashanasha. Alefwaya abo alelandako ukwaluka kabili aleesha ukucite ci ukupitila mu kulanda ifyebo fyaleshinina, ukupelulula bwino, no kupaapaata sana. Aacitile icintu cisuma ukupashanya. (Imil. 18:4; 19:8) Kwena, injishikweba shimo shilanashanasha ku kulufya bantu. (Mat. 27:20; Imil. 14:19; Kol. 2:4) Kuti shatendeka ukutunganya kwalubana, ukubomfya ubunte bwaumina kumo, ne fishinka fishafikapo, ukusuula ifishinka fishilingene ne fyo balefwaya, nelyo ukukunta sana imitima ya bantu ukucila ukupelulushanya na bo. Tufwile ukuibaka ku nshila sha musango yo shonse.

Ukushintilila Sana pa Cebo ca kwa Lesa. Ifyo tusambilisha tafifwile ukufuma kuli fwe bene. Tufwaya ukushimikilako bambi ifyo twasambilila muli Baibolo. Muli uyu mulimo, twalyafwiwa nga nshi ku mpapulo she bumba lya musha wa cishinka kabili uwashilimuka. Ishi mpapulo shitukoselesha ukubebetesha Amalembo. Na ifwe tufwaya ukutwala bambi kuli Baibolo, te ku kubashinina ati natulungika, lelo pa kuba abaicefya tufwaya fye abene baimwena ifyo isosa. Tulasuminishanya na Yesu Kristu, uwasosele mwi pepo kuli Wishi ati: “Icebo cenu e cine.” (Yoh. 17:17) Takwaba uwa kuputula ifikansa uwacila pali Yehova Lesa, Kabumba wa muulu ne calo. Pa kuti ifyebo fyesu fibe ifya cishinka kano fyashintilila pa Cebo cakwe.

Inshita shimo kuti mwalanda na bantu abashaishiba ifyaba mu Baibolo nelyo abashasumina ukuti Baibolo Cebo ca kwa Lesa. Mufwile ukucenjela pa kuletamo amalembo ya mu Baibolo ne fya kuyaletamo mu kulanshanya. Lelo mufwile ukwesha ukubatwala bwangu bwangu kuli ci citabo ca maka icabamo ifyebo.

Bushe mulingile ukutontonkanya ati ukwambula fye ilembo likumine ku fyo mulelanda ninshi e bushininkisho bwa kapeleko? Te sana. Napamo kuti mwalanda na pa mashiwi yashingulwikeko pali co cikomo ku kushininkisha ukuti cine cine ilyo lembo lileshininkisha ico mulesosa. Nga ca kuti pali ilyo ilembo mulefumyapo fye icishinte kabili ilembo talilelanda pa mulandu mulelandapo, ubushininkisho na bumbi kuti bwafwaikwa. Kuti mwabomfya amalembo yambi ayakumine kuli uyo mulandu pa kuti ibumba lyenu lishininkishe ukuti ifyo mulesosa cine cine fyashintilila fye pa Malembo.

Mwikukumya ico ilembo lilelandapo. Bikeniko amano pa kulibelenga. Napamo ilembo kuti lilelanda pa mulandu mulelanshanyapo. Lelo pa kuti ifishinka fyenu fibe ifya kunashanasha, komfwa wenu afwile ukumona pali lyo ilembo ico cine cishinka muleti e co lileshininkisha.

Ukutungililwa no Bushininkisho Bulingeneko. Inshita shimo, kuti camwafwa nga mwabomfya ubushininkisho bumbi ubwacetekelwa ubushili bwa mu Baibolo ku kwafwa abantu ukumfwikisha ukuti ilyo Ilembo lilimo amano.

Ku ca kumwenako, kuti mwalanda pa fyabumbwa fyonse amuti bushininkisho bwa kuti Kabumba e ko aba. Kuti mwalanda pa mafunde yaba mu fyabumbwa, pamo nga maka yatinta, no kupelulushanya no muntu ukuti apo kwaliba amafunde ya musango yo, kanshi kufwile kwaliba Uwa kupeela ayo mafunde. Ukupelulula kwenu kukaba ukwalungama nga kulingene ne fyaba mu Cebo ca kwa Lesa. (Yobo 38:31-33; Amalu. 19:1; 104:24; Rom. 1:20) Ubushininkisho bwa musango yo bulaafwa pantu bulanga ukuti ifyo Baibolo isosa fyalilingana ne fintu fyaishibikwa.

Bushe muletukuta ukwafwa umo ukwishiba ukuti Baibolo cine cine Cebo ca kwa Lesa? Kuti mwalandapo fimo ifyo abasoma basosa ku kushininkishe co, lelo bushe ninshi e bushininkisho ubo bwine? Ukulanda pali fyo kwafwa fye abantu abacindika abo bene basoma abafilandile. Bushe kuti mwabomfya ifya sayansi ku kushininkisha ukuti Baibolo ya cine? Nga mwalanda pa fisosa basayantisti bashapwililika ukuti e bushininkisho, ishintililo lya fyebo fyenu talyakakose. Lelo nga mwabalilapo ukulanda pa fya mu Cebo ca kwa Lesa e lyo mwalondolola ifyo basayantisti basanga ifilangilila ukuti Baibolo yalilungika, ifyebo fyenu fikashimpwa pe shintililo lyakosa.

Conse ico mulefwaya ukushininkisha, landenipo ubushininkisho ubwingi. Icikapima ubwingi bwa bushininkisho mukakabila bantu mulelandako. Tutile mulelanda pa nshiku sha kulekelesha nga fintu shalondololwa pali 2 Timote 3:1-5, kuti mwaeba abo mulelandako lipoti imo iyaishibikwa bwino iilelanga ukuti abantu bali “abaumalala.” Ico ica kumwenako cimo kuti cashininkisha ukuti ulu lubali lwa cishibilo ca nshiku sha kulekelesha lulefishiwapo.

Ukulinganya ifintu fibili ifyapalana kuti kwayafwa. Ukulinganya ifintu te kushininkisha icintu ukuti ca cine; bucine bwa uko kulinganya bufwile ukweshiwa nga nabulingana na cintu Baibolo isosa. Lelo ukulinganya kuti kwayafwa umuntu ukumona ukuti ifyo mulesosa fya mano. Ku ca kumwenako, ukulinganya kwa musango yo kuti kwabomba pa kulondolola ukuti Ubufumu bwa kwa Lesa buteko. Kuti mwalondolola ukuti filya fine fyaba amabuteko ya bantunse, Ubufumu bwa kwa Lesa na bo bwalikwata bakateka, abatekwa, amafunde, ne filye, ne fya masomo.

Ifyo abantu bapitamo mu bumi kuti fyabomfiwa ku kulangilila ukuti ca mano ukubomfya ukufunda kwaba mu Baibolo. Kuti mwalanda na pa fyo mwe bene mwapitamo ku kutungilila ifyo mulesosa. Ku ca kumwenako, ilyo mulelondolwela umuntu ubucindami bwa kubelenga no kusambilila Baibolo, kuti mwamulondolwela fintu ukucite fyo kwawamyako imikalile yenu. Pa kukoselesha aba bwananyina, umutumwa Petro alandile pa kwaluka kwa kwa Yesu, uko aimwenene na menso. (2 Pet. 1:16-18) Paulo na o alandile pa fyo aculileko. (2 Kor. 1:8-10; 12:7-9) Lelo tamulingile ukucishamo ukulanda pa fyamucitikila epali abantu batampa fye ukupoosesha amano kuli imwe.

Ubushininkisho bwashinina umo te kuti bushinine umbi pantu abantu balipusanapusana mu nkulilo na mu kutontonkanya. E ico tontonkanyeni pa fitontonkanya bakomfwa wenu ilyo mulesala ifyebo fya kushinina mwingasosa ne nshila ya kufisoselamo. Amapinda 16:23 yatila: “Umutima wa wa mano ulenga akanwa kakwe ukwangwa, no kulundako ukukolopeka ku milomo yakwe.”