Abashipikisha Balalambulwa

¹ “Mu kushipikisha kwenu e mo mukabakile myeo yenu.” (Luka 21:19) Aya mashiwi, ayaba mu fyebo Yesu alandile mu kusesema kwakwe pa lwa “mpela ya bwikashi,” yalanga bwino bwino ukuti pa kuba aba bucishinka tufwile ukuipekanya ukupita mu mesho ayengi. Lelo, ku maka ya kwa Yehova, ifwe bonse umo umo kuti ‘twashipikisha ukufika na ku mpela’ no “kupusuka.”—Mat. 24:3, 13; Fil. 4:13.

² Ukupakaswa, amalwele, ukukanakwata indalama, na malangulusha kuti fyalenga cila bushiku twalaba ne fya kwesha. Lelo tatufwile kulaba ukuti, Satana ale-esha ukonaula bucishinka bwesu kuli Yehova. Ubushiku bonse ubo twatwalilila aba busumino kuli Shifwe ninshi ubo bushiku twapeela Lesa ifya kwasuka uutwishika bucishinka bwesu. Ala cilawama ukwishiba ukuti “ifilamba” tulukusha ilyo tuleeshiwa tafilabwa! Fyalicindama kuli Yehova, kabili bucishinka bwesu bulenga umutima wakwe ukusamwa!—Amalu. 56:8; Amapi. 27:11.

³ Ukulopololwa ku Mesho: Amacushi yalasokolola icitetekelo canaka nelyo imibele iishawama, pamo nga icilumba nelyo ukukanatekanya. Ukucila ukweshaesha ukutaluka nelyo ukupwisha amesho pa kucita ifishumfwana na Malembo, tufwile ukuumfwila ukufunda kwaba mu Cebo ca kwa Lesa ukutila “lekeni ukushipikisha kupwishe umulimo wa kuko.” Cinshi twingacitile co? Pantu ukushipikisha ubwesho mu busumino kulatwafwa ukuba “abafikapo kabili abatuntulu muli fyonse.” (Yako. 1:2-4) Ukushipikisha kuti kwatwafwa ukulundulula imibele yawamisha pamo nga ukunakilila, ukulangulukilako, no luse.—Rom. 12:15.

⁴ Ukweshiwa kwa Citetekelo: Nga twashipikisha amesho, tukwata icitetekelo icaeshiwa ica mutengo sana mu menso ya kwa Lesa. (1 Pet. 1:6, 7) Icitetekelo ca musango yo cikatwafwa ukutwalilila ukushangila nga twaeshiwa ku ntanshi. Na kabili tukeshiba ukuti Lesa natusenamina, ne ci cilakosha isubilo lyesu, ukulenga lyaba ilya cine cine.—Rom. 5:3-5.

⁵ Icilambu cikalamba icifuma mu kushipikisha calilandwapo pali Yakobo 1:12, apatila: “Wa nsansa umuntu uushipikisha ica kwesha, pantu nga aba uwasuminishiwa akapokelela icilongwe ca bumi.” E ico, shi natutwalilile ukushangila mu kuipeela kwesu kuli Yehova, tucetekele ukuti “abatwalilila ukumutemwa” akabapaala apakalamba.

Ulubali 2—Ukutungulula Amasambililo ya Baibolo Ayalunduluka

Ukupekanishisha Libela Ukutungulula Isambililo

¹ Pa kuti tufunde bwino umusambi pe sambililo, icikabilwa te kulanda fye pa fyebo no kubelenga amalembo. Tufwile ukutungulula isambililo ica kuti twafika umusambi pa mutima. Pa kucite ci, kano twapekanya bwino uku ninshi tuletontonkanya pa fingafwa umusambi.—Amapi.15:28.

² Ifya Kupekanya: Intanshi pepeleni uyo muntu kuli Yehova e lyo no kupepela ifyo alekabila. Lombeni Yehova ukuti amwafwe ukufika umusambi pa mutima. (Kol. 1:9, 10) Pa kuti mumfwikishe icilelandwapo sana mwi sambililo, taleni bebeteni umutwe wa cipande nelyo sambililo, bebeteni no tumitwe tunono, ne fikope fyonse ifilimo. Ipusheni mwe bene ati, ‘Cinshi ili sambililo lilelandapo sana?’ Ici cikamwafwa ukukomaila pa fishinka fikalamba ilyo muletungulula isambililo.

³ Pitulukeni bwino bwino muli paragrafu umo na umo. Fwayeni ifyasuko ku fipusho fili mu cipande, no kushila fye pa fishinka. Moneni ifyo amalembo yalimo yampene ne cishinka cimo na cimo icili muli paragrafu, kabili saleni amalembo ya kuyabelenga pe sambililo. Kuti camwafwa ukulemba ifyebo finono mu mbali ye pepala mu citabo. Umusambi afwile ukumona bwino bwino ukuti ifyo alesambilila filefuma mu Cebo ca kwa Lesa.—1 Tes. 2:13.

⁴ Tungululeni Isambililo Ukulingana no Kukabila kwa Musambi: Icakonkapo, tontonkanyeni pa fyo isambililo lingafwa umusambi. Esheni ukwelenganya amepusho engepusha e lyo ne fingamukosela ukuumfwa nelyo ukusumina. Ipusheni mwe bene amuti: ‘Finshi afwile ukwishiba nelyo ukubombelapo pa kulunduluka lwa ku mupashi? Kuti namufika shani pa mutima?’ Lyene musambilisheni ukulingana ne fyo fine. Limo kuti mwamona ukuti mufwile ukupekanye cilangililo, ukulondolola fimo, nelyo ukwipushe ifipusho fimo pa kuti mwafwe umusambi ukuumfwikisha umulolele icishinka cimo nelyo ilembo. (Nehe. 8:8) Lelo mwibikamo ifyebo ifishileumfwana ne cilelandwapo sana mwi sambililo. Ukupitulukamo panono pa numa ye sambililo kukamwafwa ukwibukisha ifishinka fikalamba.

⁵ Ala tulatemwa abapya nga batwala ifisabo fya bulungami ifiteemuna Yehova! (Fil. 1:11) Pa kubafwa ukutwale fi fisabo, pekanyeni bwino cila nshita ilyo tamulatungulula isambililo.