Ukutendeka Amasambililo ya Baibolo pa Minshi na Pali Lamya

1, 2. Bushe kuti twayalula shani isambililo lya Baibolo ilyo tuleyafwa abantu bapamfiwa?

¹ Abantu lelo balipamfiwa. Nomba, abengi balitemwa ifya ku mupashi. Bushe kuti twabaafwa shani ukwishiba ifya ku mupashi? (Mat. 5:3) Bakasabankanya abengi balasambilila Baibolo na bantu pa minshi nelyo pali lamya. Bushe na imwe kuti mwashimikila muli iyi ine nshila?

² Nga tulefwaya ukutendeka amasambililo ya Baibolo, kano twaishiba ifya kulangilila ifyo tucita pa kusambilila Baibolo. Kuti twalangilila shani kabili ni kwi ici cingabomba?

3. Mulandu nshi cawamina ukulangilila ifyo isambililo lya Baibolo lingatungululwa pa kutandala kwa kubalilapo fye, kabili kuti mwalangilila shani?

³ Pa Mwinshi: Nga ca kuti mwakumanya umuntu uulefwaya ukulanshanya nankwe Baibolo, kupukuleni apali ponse apo mupekenye, nalimo mwi sambililo lya kubalilapo muli broshuwa wa Cintu Lesa Afwaya muli paragrafu wa kubalilapo kabili tendekeni ukusambilila. Belengeni paragrafu, ipusheni icipusho, no kulanshanya ilembo limo nelyo yabili ayo bashambwile. Ilingi line, kuti mwalanshanya pa mwinshi mu maminiti 5 ukufika kuli 10. Nga ca kuti umuntu mulelanshanya nankwe atemwa, mwebeni ukuti umuku mukabwela mukalanshanya paragrafu ikonkelepo imo nelyo yabili.—Ifyebo na fimbi ifilelanda pa kutendeka amasambililo na bantu apo pene fye kuti fyasangwa mu Ubutumikishi Bwesu Ubwa Bufumu ubwa January 2002, ibu. 6.

4. Bushe kuti twatendeka shani isambililo lya Baibolo pa mwinshi ku fipempu fya kubwelelamo?

⁴ Kuti mwabomfya inshila imo ine pa kutendeka amasambililo ya Baibolo ku fipempu fya kubwelelamo. Ku ca kumwenako, nalimo kuti mwalangilila muli broshuwa wa Cintu Lesa Afwaya no kulondolola ishina lya kwa Lesa, pe sambililo 2, amaparagrafu 1 na 2. Ilyo mukabwelelako, kuti mwayalanshanya ifyo Baibolo ilanda pa mibele ya kwa Yehova mu maparagrafu 3 na 4. Ukulanshanya kukonkelepo, kuti mwalanda pa maparagrafu 5 na 6 ne cikope cili pe bula 5 icilelangilila ifyo isambililo lya Baibolo lingatwaafwa ukwishiba Yehova. Ukulanshanya konse uku kuti kwacitwa ubwiminine pa mwinshi.

5, 6. (a) Mulandu nshi abantu bamo bengatemenwa ukusambilila Baibolo pali lamya? (b) Finshi twingasosa nga tulefwaya ukusambilila no muntu pali lamya?

⁵ Pali Lamya: Abantu bamo kuti batemwa ukusambilila Baibolo pali lamya ukucila ukubakonkela. Moneni ico nkashi akumenye: Ilyo aleshimikila ku ng’anda ne ng’anda, asangile umukashana uwakwata abana kabili uubomba incito iyishimushiilako inshita. Ilyo nkashi afililwe ukumusanga pa mwakwe, amutumine lamya. Umukashana alondolwele ukuti takwete inshita ya kulanshanya nankwe Baibolo. Nkashi amwebele ukuti: “Kuti wasambililako cimo icipya mu maminiti 10 nelyo 15, nangu fye ni pali lamya.” Umukashana atile: “Kwena nga ni pali lamya pena, cili fye bwino!” Tapakokwele, isambililo lyaletungululwa pali lamya.

⁶ Bushe pabo mushimikilako paliba abengatemwa ukusambilila pali lamya? Kuti mwaesha iyi nshila twafuma mu kulandapo nelyo kuti mwatila: “Nga kuti mwatemwa, kuti twalanshanya nenu Baibolo pali lamya. Bushe ico kuti camwangukila?” Nga twayalula imibombele yesu iya kutungulwilamo isambililo lya Baibolo, kuti twabaafwa ‘ukusanga ukwishiba Lesa.’—Amapi. 2:5; 1 Kor. 9:23.

Ifya Kulanda Pali Bamagazini

Ulupungu lwa kwa Kalinda Aug. 15

“Ilyo kwapone mfwa, abengi balafwaya ukwishiba icicitika umuntu nga afwa. Bushe muletontonkanya ukuti kuti twaishiba icicitika pa mfwa? [Lekeni basuke.] Iyi magazini ilelondolola ico Baibolo ilanda pa fyo abafwa baba. Na kabili ilelanda na pa bulayo Lesa alaya ubwa kubuusha abatemwikwa besu abafwa.” Belengeni Yohane 5:28, 29.

Loleni July–Sept.

“Bonse nga twalwala tulailishanya pa bulwele tulwele nelyo ubwafya tuli na bo. Bushe kuti cacitika ukusekako ilyo umo alwele? [Lekeni basuke.] Pa myaka yonse iyi iyapita abengi balishiba ukuti ukuseka kulaafwa abalwele ukukanasakamana.” Belengeni Amapinda 17:22.

Ulupungu lwa kwa Kalinda Sept. 1

“Mu calo lelo, abengi balicindamika bucishinka lelo tababa aba cishinka. Bushe te kuti ciwame nga ca kuti abantu abengi baba nge cibusa calondololwa pano? [Belengeni Amapinda 17:17. E lyo muleke basuke.] Magazini iyi ilelanda pa fisuma twingaba na fyo nga twaba aba cishinka ku lupwa lwesu ne fibusa.”

Loleni July–Sept.

“Ukutula fye na ku kale, kwaba abantu abafwaisha ukucindama, abakwata ififulo fya pa muulu, ifyuma kabili abalumbuka. Nomba abantu bakwete icitetekelo cakosa bena balefwaya ukuba abaicefya. Bushe kuti mwaishiba icalengele? [Lekeni basuke. Lyena belengeni Luka 14:11.] Iyi magazini ilelondolola ifyo Abrahamu, Solomone nelyo fye ni Yesu bakaanine uko kulumbuka.”