Ulubali 3—Ukutungulula Amasambililo ya Baibolo Ayalunduluka

Ukubomfya Bwino Amalembo

1. Mulandu nshi tulingile ukubomfesha Amalembo ilyo tuletungulula amasambililo ya Baibolo?

¹ Umulandu uukalamba uo tutungulwila amasambililo ya Baibolo ‘kupanga abasambi’ no kwafwa abantu ukumfwikisha e lyo no kusumina amasambililo yaba mu Cebo ca kwa Lesa no kulacita filya fine yalanda mu mikalile yabo. (Mat. 28:19, 20; 1 Tes. 2:13) E ico ilyo tuletungulula isambililo, tulekabila ukubomfya Amalembo. Pa kubala kuti cawama ukulanga abasambi ifyo bengafwaya amalembo mu maBaibolo yabo. Lelo bushe, kuti twabomfya shani Amalembo ku kwafwa abalelunduluka lwa ku mupashi?

2. Bushe tusala shani Amalembo ya mu Baibolo ayo tufwile ukubelenga no kulandapo?

² Saleni Amalembo ya Kubelenga: Ilyo mulepekanya, ishibeni amalembo yonse ayali mwi sambililo ne fyo yampene ne cishinka mulelanshanyapo, kabili saleni amalembo mukabelenga no kulanshanyapo ilyo mulesambilila. Caliwama ukubelenga Amalembo yalya yalondolola ifishinka twasuminamo ifya mu Malembo. Amalembo ayalimo kabili ayaleafwilisha fye icishinka nakalimo te kuti tuyabelenge. Tontonkanyeni pa fyo umusambi umo umo alekabila ukwishiba kabili ishibeni ne mibele abelamo.

3. Busuma nshi bwaba mu kubomfesha amepusho, kabili kuti twayabomfya shani?

³ Bomfyeni Amepusho: Mu nshita ya kuti imwe ni mwe mulondolole Amalembo ku musambi, lekeni wena amulondolwele. Kuti mwamwafwa ukucita ico pa kubomfya amepusho mano mano. Nga ca kuti ilembo lilelanda fye mu kulungatika pa cishinka, kuti mwaipusha fye umusambi ifyo ilembo liletungilila ifishinka fili muli iyo paragrafu. Limo limo, ukwipusha amepusho ya kulungatika kuti kwatungulula umusambi ku kumfwikisha ifyo mulelandapo. Nga ca kuti mulefwaya ukulondolola, kuti mwalondolola ilyo umusambi apwisha ukwasuka.

4. Ilyo twabelenga amalembo bulondoloshi bwa musango nshi tulingile ukulandapo?

⁴ Angusheni: Fundi uwacenjela abomfya fye umufwi umo ku kulasa inama. E cimo na kasambilisha wacenjela takabila kusosa ifyebo ifingi pa kuti icishinka cumfwike. Kuti alondolola ifyebo mu nshila iyayanguka bwino bwino, kabili iya cine. Limo limo kuti mwakabila ukusokota mu mpapulo sha Bena Kristu pa kuti mumfwikishe ilembo no kulilondolola bwino bwino. (2 Tim. 2:15) Lelo mwilalondolola ifyebo fyonse ifili mu malembo yonse ayali mwi sambililo. Landeni fye pa filekabilwa pa kuti icishinka cumfwike.

5, 6. Bushe kuti twayafwa shani abasambi ukucita ifyo Icebo ca kwa Lesa cisosa mu mikalile yabo, lelo cinshi ico tushifwile ukucita?

⁵ Ukucita Ifyo Balesambilila: Nga kuti calinga afweni umusambi ukumona ifyo engabomfya amalembo ya mu Baibolo. Tutile ilyo mulelanshanya pa AbaHebere 10:24, 25 no musambi uushilatendeka ukusangwa ku kulongana kwa Bena Kristu, kuti mwalanshanya pa kulongana kumo kabili kuti mwamweba ukusangwako. Lelo mwileka umusambi amone kwati mulemupatikisha. Shi lekeni Icebo ca kwa Lesa cicincishe umusambi ukucitapo cimo mu kusekesha Yehova.—Heb. 4:12.

⁶ Ilyo tulebomba umulimo twapeelwa uwa kupanga abasambi, shi natucincile ku “kuleta icumfwila ku citetekelo” ilyo tulebomfya bwino Amalembo.—Rom. 16:26.

Ifya Kulanda Pali Bamagazini

Ulupungu lwa kwa Kalinda Nov. 15

“Abantu abengi balafwaya ukuba no mutende e lyo no kwikala imyaka iingi. Bushe na imwe kuti mwatemwa ukwikala umuyayaya nga ca kuti mwalikwete ilyo shuko? [Lekeni basuke. Lyene belengeni Yohane 17:3.] Uyu magazini alelanda pa bulayo bwaba mu Baibolo ubwa bumi bwa muyayaya. Kabili alelanda na pa fyo ubwikalo bukaba ilyo ubo bulayo bukafikilishiwa.”

Loleni Oct.–Dec.

“Abana pali ino nshita balacushiwa kabili balabomfiwa bubi bubi, ne ci calenga abantu bamo bamo ukulatontonkanya ukuti Lesa alibalekelesha. Bushe na imwe e fyo mutontonkanya? [Lekeni basuke] Moneni pano ifyo Yesu Kristu alangilile ukuti Lesa alitemwa abana. [Belengeni Marko 10:16] Ici cipande cilelangilila ifyo ukufwaya kwa kwa Lesa kukacita ku kupwisha ubwafya bwa kucululusha abana.”

Ulupungu lwa kwa Kalinda Dec. 1

Icintu cimo icilekanya abantu ku nama kwishiba icalungama ne cabipa. Ku ca bulanda abantu abengi balacita ifyabipa. Bushe mwalishiba icilenga? [Lekeni basuke. Lyena belengeni Yeremia 17:9 nelyo Ukusokolola 12:9.] Uyu magazini alelanda pa fingatwafwa Ukwishiba e lyo no kucita icalungama.”

Loleni Oct.–Dec.

“Imisepela abengi batontonkanya ukuti ukulaalana ilyo tabalaupwa nelyo ukuupa, kusuma—no kuti e co bafwile fye ukucita. Bambi na bo batontonkanya ukuti e ko beshibila ukutila nomba nabakula. Bushe cinshi abacaice balekabila ukucita pa kuleka e lyo no kuicingilila kuli aya mafya? [Lekeni basuke] Baibolo ilangilila ifyo ukuba ne ifibusa fisuma kuti kwabafwa ukuba ne mibele isuma. Belengeni Amapinda 13:20.”