Ukushimikila Kulatwafwa Ukushipikisha

¹ Icebo ca kwa Lesa citweba ukuti “tubutuke no kushipikisha ulubilo ulwabikwa pa ntanshi yesu.” (Heb. 12:1) Nga filya fine uubutuka ulubilo alingile ukushipikisha pa kuti acimfye, na ifwe tufwile ukushipikisha pa kuti tukapoke icilambu ca mweo wa muyayaya. (Heb. 10:36) Bushe umulimo twapeelwa fwe Bena Kristu utwafwa shani ukushipikisha ukufika ku mpela?—Mat. 24:13.

² Tulaba Abakosa ku Mupashi: Ukweba abantu ukuti Baibolo yalilaya ukutila kukaba icalo icalungama kulenga icitetekelo cesu ukukosa. (1 Tes. 5:8) Nga ca kutila lyonse tulebomba umulimo wa kushimikila, tulakwata ishuko lya kwafwa abantu ukwishiba icine ico twasambilila mu Baibolo. Iba ni nshita ya kulondolola ifyo twasumina, ne ci cilenga twaba bakapepa bakosa.

³ Pa kuti tusambilishe bambi bwino, tufwile intanshi twaishiba icine ca mu Baibolo. Tufwile ukusokota no kutontonkanya pa fyebo twasanga. Nga tulesokota tuleshiba ifintu ifingi, tulakosha icitetekelo cesu, no kukosa mu kupepa. (Amapi. 2:3-5) E ico, ilyo tuleafwilisha bambi, ninshi na fwe bene tuleikosha.—1 Tim. 4:15, 16.

⁴ Ukucincila mu mulimo cikankaala cimo icaba pa fya kufwala “fya bulwi fyakumanina ifya kwa Lesa,” ifyo tufwile ukufwala pa kuti tukose ukulwisha Kaseebanya ne fibanda. (Efes. 6:10-13, 15) Ukubomba imilimo Lesa atupeela kulatwafwa ukubika amano pa fikuulilila e lyo no kukanasendwa ku calo ca kwa Satana. (Kol. 3:2) Ilyo tulesambilisha abantu ifyo Yehova afwaya bena ukuba, tulaicinkulako na fwe bene ukuti tufwile ukuba ne myendele isuma.—1 Pet. 2:12.

⁵ Lesa Alatukosha: Ica kulekelesha, umulimo wa kubila imbila nsuma ulatusambilisha ukucetekela Yehova. (2 Kor. 4:1, 7) Ili lipaalo icine cine! Ukucetekela Yehova kulatwafwa ukubomba umulimo twapeelwa e lyo no kushipikisha te mulandu ne catucitikila. (Fil. 4:11-13) Ca cine, ukusambilila ukucetekela Yehova e cikatwafwa ukushipikisha. (Amalu. 55:22) Ukushimikila kulatwafwa ukushipikisha mu fingi fye.

Ulubali 10—Ukutungulula Amasambililo ya Baibolo Ayalunduluka

Ukusambilisha Abasambi Ukushimikila Abantu ku Ng’anda ne Ng’anda

¹ Baeluda nga bamona ukuti umusambi wa Baibolo nalinga ukuba kasabankanya ushabatishiwa, e lyo umusambi atendeka ukushimikila abantu pamo ne cilonganino. (Moneni icitabo ca Abaiteyanya Ukucita Ukufwaya kwa kwa Yehova, amabu. 79-81.) Kuti twayafwilisha shani umusambi pa kuti aleshimikila abantu ku ng’anda ne ng’anda?

² Ukupekanya Pamo Nankwe: Ukupekanya kwalicindama sana. Langeni umusambi uko engasanga ifyebo mu Ubutumikishi Bwesu Ubwa Bufumu na mu citabo ca Ukupelulula ifyo engalanda pa kutendeka ukushimikila. Kabili mwafweni ukusala ifyebo finganguka ukulanda kabili ifingalinga mu cifulo mushimikilamo. Ukutula fye pa kutendeka, mulemukoselesha ukubomfya Baibolo ilyo ali mu mulimo.—2 Tim. 4:2.

³ Ukupituluka mu fyo mwalayalanda kulawama sana kuli kasabankanya umupya. Ilyo umusambi alepituluka mu fyo alayalanda, mulangeni ifya kwankula bwino ku fyo abantu abengi mu cifulo mubombelamo basosa. (Kol. 4:6) Lekeni eshibe ukuti te kutila Abena Kristu bonse ababomfi bafwile ukwishiba icasuko ku cipusho conse ico mwine ng’anda aipusha. Ilingi cilawama ukulanda ukuti mukayafwailisha no kwisalanshanya na fimbi pa cipusho baipusha nga mwabwela.—Amapi. 15:28.

⁴ Ukushimikila Capamo:Ilyo umusambi aya na imwe mu kushimikila abantu ku ng’anda ne ng’anda pa muku wa kubalilapo, lekeni intanshi amone ifyo mwalalanda ifyebo mwacipekanya pamo. Lyene lekeni na o alandepo. Limo cilawama ukweba kasabankanya mupya ukubelengako fye ilembo no kulondolola umo lilolele. Kuti mwamona mwe bene icifyalilwa cakwe ne fyo engakumanisha ukucita. (Fil. 4:5) Mulemutasha ilyo mulemusambilisha inshila shalekanalekana isha kubombelamo umulimo wa kushimikila.

⁵ Cikankaala ukwafwa kasabankanya mupya ukupekanya bwino pa kuti lyonse alebombako umulimo wa kushimikila, nga cingacitika alebombako cila mulungu. (Fil. 3:16) Panganeni ukuti mulebomba nankwe mu mulimo, kabili mukoselesheni ukulabomba na bantu bambi abacincila. Imibombele yabo no kuba nankwe fikamwafwa ukwishiba ifya kubomba bwino kabili akatemwa ukushimikila abantu ku ng’anda ne ng’anda.