Imisha Twakwatila Abantu Bambi

¹ Umutumwa Paulo alibikile umutima ku kushimikila abantu. Alishibe ukuti Yehova alilenga abantu bonse ukupusuka ukupitila mu mulopa wacindamisha uwa Mwana Wakwe. (1 Tim. 2:3-6) E ico Paulo atile: “Ku baGriki na ku bashili baGriki pamo, ku ba mano na ku bapelwa amano pamo, ndi wa misha.” Alicincile kabili alebombesha ukulipila imisha ku bantu banankwe ukupitila mu kubashimikila imbila nsuma.—Rom. 1:14, 15.

² Nga filya Paulo alecita, Abena Kristu pali lelo nabo balashimikila abantu banabo imbila nsuma lyonse. Apo “ubucushi bukalamba” bulepalamina, tufwile ukubombesha ukufwaya abafumacumi. Kanshi lekeni ukutemwa kwa cine kulenge tulebombesha uyu mulimo we pusukilo.—Mat. 24:21; Esek. 33:8.

³ Ukulipila Imisha Yesu: Inshila ikalamba iyo tulandilamo na bantu kushimikila ku ng’anda ne ng’anda. Mu fifulo umo abantu abengi bashisangwa pa mayanda, ukulemba ukuti tatubasangile e lyo no kubwelelako pa nshita imbi kukatwafwa ukulanda na bantu abengi. (1 Kor. 10:33) Inshila na imbi twingalandilamo na bantu, kushimikila abasangwa mu fifulo fya makwebo, mu misebo, mu maparka, mulya bemika bamotoka, e lyo no kubatumina lamya. Kuti twayipusha atuti, ‘Bushe ndeesha inshila shonse isha kushimikilamo pa kuti ndeebako bambi ubukombe ubuleta umweo?’—Mat. 10:11.

⁴ Painiya umo alyangilwe sana ku kushimikila abantu bonse mu cifulo cakwe. Pa ng’anda imo, lyonse amawindo yaleba ayaisalika, kabili tapalesangwa bantu. Lelo, bushiku bumo ilyo painiya ashali mu mulimo, amwene motoka pa ntanshi ya ng’anda apashisangwa bantu. Apo talefwaya ukupanya ili shuko, akonkonseshe pa ng’anda. Umwaume e wayaswike, kabili kulya kulanshanya kwalengele nkashi no mwina mwakwe ukubwelelako imiku ingi. No yu mwaume asukile asumina ukusambilila Baibolo, kabili nomba ni munyina uwabatishiwa. Alatasha ukuti ulya nkashi alyangilwe ku kulipila imisha akwete iya kushimikila bambi.

⁵ Apo inshita ilepwa bwangu bwangu, tulingile ukwangwa ku kulipila imisha twakwatila abantu banensu. Kuti twacite ci nga tulebombesha ukushimikila abantu.—2 Kor. 6:1, 2.

Ulubali 11—Ukutungulula Amasambililo ya Baibolo Ayalunduluka

Ukwafwa Bakasabankanya Abapya Ukubwelela ku Bakutike

¹ Ilyo umusambi wa Baibolo atendeka ukushimikila abantu, akulasanga abantu abafwaya ukumfwa imbila nsuma. Kuti twaafwa shani kasabankanya mupya ukubomba bwino ilyo abwelela ku bakutike e lyo no kubaafwa ukutwalilila ukumfwa imbila nsuma?

² Pa kupekanya icipempu ca kubwelelamo tufwile ukutendekela pa cipempu ca kubalilapo. Koselesheni umusambi ukwangwa sana ku bo alelanshanya nabo. (Fil. 2:4) Mulemusambilisha ukuti aleeba mwine ng’anda ukulanda ifyo aletontonkanya, alekutika ifyo alelanda, no kumona ifyo mwine ng’anda afwaya ukwishiba. Umuntu nga asekelela, lekeni kasabankanya alembe fyonse ifingamwafwa pa fyo bacilanshanya umuku wa kubalilapo. Bomfyeni ifyo acilemba pa kumwafwa ukupekanya ukubwelelako.

³ Ukupekanya Ukubwelelako: Pitulukeni mu kulanshanya kwa pa kubala, kabili langeni umusambi ifya kusala Ifyebo filelanda pa Bufumu ifyo umwine wa ng’anda engatemwa ukumfwa. (1 Kor. 9:19-23) Pekanishisheni pamo ifyebo ifinono umwingaba ukubelenga ilembo lya mu Baibolo na paragrafu imo mu lupapulo lwa kusambililamo. Kabili pekanyeni icipusho ica kwipusha umwine wa ng’anda pa mpela ya kulanshanya pa kuti mukwate apo mukatendekela ukulanshanya nga mwabwelelako. Langeni kasabankanya mupya ifyo engafwa umusambi ukwishibilapo na fimbi mu Cebo ca kwa Lesa cila nshita nga amutandalila.

⁴ Kabili cilaba bwino ukusambilisha umusambi amashiwi yanono aya kutendekelapo ukulanda ilyo abwelelako. Ilyo aposha umwine wa ng’anda kuti atila: “Naliipakishe sana ukulanshanya na imwe ilyo naishile, kabili nabwela pa kuti tulanshanyeko na fimbi ifyo Baibolo ilanda pa [landeni ilyashi mwalalandapo].” Cilawama ukulanga kasabankanya mupya ne fya kucita nga asanga umuntu umbi pa ng’anda.

⁵ Angweni Ku Kubwelelako: Koselesheni umusambi ukulabwelelako bwangu kuli bonse abasekelele. Pa kuti tusange abantu pa mayanda, limo kano tulebwelelako libili libili. Sambilisheni umusambi ifyo engalanda pa kuti akabweleleko, kabili mwafweni ukwishiba ukuti calicindama ukubwelelako nga alaya. (Mat. 5:37) Sambilisheni kasabankanya mupya ukuba uwa cikuuku, uulangulukilako, kabili uwa mucinshi ilyo alefwayafwaya abapale mpaanga no kulenga batwalilile ukusekelela.—Tito 3:2.