Ibumba Lyakoseleshiwa no Kukoshiwa

ABABOMFI ba kwa Lesa balingile ukukoseleshiwa mu cilonganino ca Bwina Kristu te mulandu na mafya baba na yo. Pa kuti cibe fyo, baeluda maka maka bafwile ukushininkisha ukuti amalyashi yabo no kufunda fyaba fya kukoselesha. Baeluda bafwile ukuba “ngo mwa kufisama ku mwela, ngo mwa kubelama ku kupongoloka kwa mfula, nge mimana ya menshi apaumisha, nge cintelelwe ca cilibwe cikalamba mu calo icatembuka.”—Esa. 32:2.

Nga ni mwe baeluda, bushe amalyashi yenu yalapembesula no kusansamusha? Bushe yalacincimuna abaleesha ukubombela Yehova mu busumino? Bushe yalapeela abantu inkosho ya kukoselela mu kucita ukufwaya kwa kwa Lesa te mulandu ne misuula ya bantu nelyo ukukaanya? Ni shani nga ca kuti bamo mwi bumba balipopomenwa, babusu icibi, nelyo balilwala ubulwele ubushakwata umuti? Kuti ‘mwalenga bamunyinenwe ukutalila ku kanwa kenu.’—Yobo 16:5.

Bomfyeni akashita mukwete aka kulanda ku kwafwa bamunyinenwe ukuba ne subilo no bukose ukufuma kuli Yehova na ku fintu atupeela.—Rom. 15:13; Efes. 6:10.

Ibulwileni Ibumba Ifyo Yehova Aacita. Inshila yacindama iya kukoseshamo bambi yaba kubalanga ifyo Yehova ayafwile abantu bakwe kale mu mafya.—Rom. 15:4.

Yehova aebele Mose ‘ukukoselesha’ Yoshua no ‘kumulenga ukutalila’ ilyo abena Israele bashilaingila mu Calo Calaiwe, ico pali yo nshita caleikalwamo ne nko ishilwani. Mose acitile shani fyo? Mose acinkwileko uluko lonse fintu Yehova abacitiile ilyo balefuma mu Egupti, kabili Yoshua e po aali alekutika. (Amala. 3:28; 7:18) Mose apitulwike na mu fintu Yehova abafwile ukucimfya abena Amore. Lyene Mose acincishe Yoshua ati: “Kosa kabili talila.” (Amala. 31:1-8) Ilyo mulefwaya ukukoselesha bamunyinenwe, bushe mulabaafwa ukusanga ubukose pa kwibukisha ifyo Yehova aabacitila kale?

Inshita shimo abantu balacula sana ku mafya bakwata ica kuti balatwishika nga bakatala abapokelela amapaalo ya Bufumu. Bacinkuleniko ukuti amalayo ya kwa Yehova yalafishiwapo lyonse.—Yosh. 23:14.

Mu fyalo fimo kwaliba ifipope fya buteko ifyalesha bamunyinefwe ukushimikila imbila nsuma. Nga cabe fyo, baeluda ba kutemwa kuti bayafwa abasumina banabo ukukoshiwa ku fyapitilemo abatumwa ba kwa Yesu Kristu. (Imil. 4:1–5:42) Kabili ukukomaila pa nshila Lesa mano mano alengele ifintu ukwendelamo nga fintu calembwa mwi buuku lya kwa Estere cine cine kukalenga bamunyina ukuba no bukose.

Inshita shimo kwaba abasangwa ku kulongana lelo abashilunduluka. Kuti baletila Lesa takatale abalekelela pantu ifyo baalecita kale fyalibipisha. Napamo kuti mwashimika ifyo Yehova alekelele Imfumu Manase. (2 Imila. 33:1-16) Atemwa kuti mwashimika pa bena Korinti ba ku kale abalekele imisango yabo no kuba Abena Kristu, kabili balilungamikwe kuli Lesa.—1 Kor. 6:9-11.

Bushe bamo batila amafya bakwata cishibilo ca kuti Lesa talebasenamina? Kuti mwabacinkulako ifyacitikile Yobo na fintu apaalilwe apakalamba pa mulandu wa kuti alikatishe bumpomfu bwakwe kuli Yehova. (Yobo 1:1-22; 10:1; 42:12, 13; Amalu. 34:19) Bakasansamusha ba kwa Yobo aba bufi balemutunganya ati afwile alibembwike. (Yobo 4:7, 8; 8:5, 6) Capusana ne fyasosele Paulo na Barnaba ilyo balekosha abasambi no ‘kubakonkomesha ukwikalilila mu citetekelo,’ pantu bena baebele abasambi ati: “Tuli no kwingilila mu bufumu bwa kwa Lesa mu bucushi ubwingi.” (Imil. 14:21, 22) Ne lelo line kuti mwakosha abalecushiwa pa kubalondolwela ukuti ukushipikisha kulakabilwa ku Bena Kristu bonse ilyo balecula kabili kwalicindama icine cine mu menso ya kwa Lesa.—Amapi. 27:11; Mat. 24:13; Rom. 5:3, 4; 2 Tim. 3:12.

Koselesheni bakomfwa wenu ukutontonkanya pa nshila Yehova afikilisha amalayo yakwe mu mikalile yabo. Ilyo mulebacinkulako, kuti bamona ifyo Yehova aabacitila kale, nga fintu fye alaile. Pa Amalumbo 32:8, tubelenga ati: “Ndekushilimuna, kabili ndekulange nshila iyo ufwile ukwendamo; ndekupanda amano na menso yandi pali iwe.” Pa kwafwa bakomfwa wenu ukwibukisha ifyo Yehova abatungulula nelyo ukubakosha, mukabaafwa ukuti bamone ifyo Yehova abaafwa sana pa lwabo no kuti ali no kubafwa mu mesho ayali yonse bengaba na yo ino nshita.—Esa. 41:10, 13; 1 Pet. 5:7.

Bekelweni mu fyo Lesa Alecita Nomba. Pa kufwaya ukukoselesha bamunyinenwe, landeni pa fintu Yehova alecita ino ine nshita. Nga mulelanda pali fi fintu mu nshila ilelanga ukuti mulabekelwa muli fyene, na bakomfwa wenu na bo bakabekelwamo.

Tontonkanyeni pa fyo Yehova atwafwa ukushipikisha ilyo tulecula mu mikalile yesu. Atulanga imikalile yawamisha. (Esa. 30:21) Alitweba umulandu kwabela bumpulamafunde, ulufyengo, ubupiina, ukulwala, ne mfwa kabili atweba ifyo akapwisha ifi fyonse. Alitupeela aba bwananyina batutemwa. Alitupeela ubupe bwawamisha ubwa kupepa kuli wene. Alituseekesha ishuko lya kuba Inte shakwe. Alitusokolwela ukuti Kristu alitampa kale ukuteka mu myulu no kuti inshiku sha kulekelesha isha buno bwikashi bukote shilepalamina ku kupwa bwangu bwangu.—Ukus. 12:1-12.

Ukulunda kuli ifyo fisuma fyonse, kwaba no kulongana kwa cilonganino, no kulongana kukalamba. Ilyo mwalanda pali fi fintu mu nshila ilelanga ukuti mulatasha nga nshi, muli no kukosha bambi ukuti bekaleka ukulongana na bamunyinabo.—Heb. 10:23-25.

Amalipoti yalanda pa fintu fishininkisha ukuti Yehova alapaala imibombele yesu mu butumikishi bwa mwi bala na yo yalakosha. Mu mwanda wa myaka uwa kubalilapo ilyo Paulo na Barnaba baleya ku Yerusalemu, ‘balelengo kusekelela kukalamba ku ba bwananyina bonse’ ilyo balebashimikila pa fya kupilibuka kwa bena fyalo. (Imil. 15:3) Na imwe bene kuti mwalenga bamunyinenwe ukusekelela nga mulebashimikilako ifya kukumanya fikoselesha.

Nga mwayafwa abantu ukumona ubucindami bwa fintu balecita na co cikabakoselesha. Batasheni pa fyo babombako ubutumikishi bwa Bwina Kristu. Tasheni abafilwa ukubombesha ku mulandu wa bukote nelyo ukulwalilila lelo abashipikisha mu busumino. Bacinkuleniko ukuti Yehova talaba ukutemwa balanga kwi shina lyakwe. (Heb. 6:10) Icitetekelo icaeshiwa cikwatwa caumo mutengo. (1 Pet. 1:6, 7) Bamunyinefwe bakabila ukucinkulwako ulwa ici.

Cincimukeni Ilyo Mulelanda pe Subilo lya ku Ntanshi. Amalayo yapuutwamo aya fili no kwisa ku ntanshi e cintu cikalamba icikoselesha bonse abatemwa Lesa. Napamo abengi mwi bumba lyenu balyumfwapo amalyashi yalanda pali fi. Lelo nga bamona ifyo mutasha ilyo mulelanda pali aya malayo, bakamona aya mapaalo ukuti ya cine cine, bakacetekela ukuti yakafishiwapo, ne ci cikalenga imitima yabo ukutasha nga nshi. Icingamwafwa ukucite fyo kubomfya fintu mwasambilila mwi Sukulu lya Butumikishi Ilya Bulesa.

Yehova umwine e Kakoselesha Mukalamba kabili Kapeela wa bukose ku bantu bakwe. Lelo, kuti mwabombela pamo nankwe mu kukoselesha no kukosha bambi. Ilyo mulelanda ku cilonganino, shukileni ako kashita ku kukoselesha no kukosha bambi.