Mwaiseni kwi Sukulu lya Butumikishi Ilya Bulesa

MWI sonde lyonse, mu fyalo ukucila pali 200, imintapendwa ya basambi balenonkelamo cila mulungu mu masambililo ya Isukulu lya Butumikishi Ilya Bulesa. Bamo bapya. Bambi kale sana baingile muli ili sukulu. Ili sukulu lilacitwa mu fifulo ifingi nga nshi. Konse fye uko mwikala pano isonde, kuti mwasambililako ili isukulu na imwe. Abantu ba mishinku yapusanapusana, imikowa, nampo nga balipwisha amasukulu nelyo iyo, bonse bene balefundwa aya masambililo ya bulesa, apa fye.

Lintu ili sukulu lyatendeke mu filonganino fya Nte sha kwa Yehova mu 1943, ubufwayo bwa liko bwalondolwelwe muli aya mashiwi: Lipangilwe “ku kupekanya ‘abaume ba busumino’ bonse, abaumfwa Icebo ca kwa Lesa no kushininkisha ukuti balicitetekela, ukubapekanishisha ukuti ‘babe na maka ya kusambilisha bambi’ . . . ku kulenga umo umo uwa muli bene . . . ukuba uwaipangasha bwino ukulanda ku bantu pa lwe subilo lyaba muli wene.” (Course in Theocratic Ministry, ibu. 4) Ubufwayo bwa ili sukulu e fyo bwaba ukufika na lelo.

Na kuba, ni nshila nshi yawamisha ifwe bonse twingabomfeshamo ubupe Lesa atupeela ubwa kusosa? Baibolo yasuka aiti: “Lekeni icipema conse citashe Yehova. Aleluya!” (Amalu. 150:6) Nga twacite fyo, tulalenga umutima wa kwa Shifwe wa mu muulu ukusamwa. Tulanga wene ukuti imitima yesu iletasha pa busuma bwakwe no kutemwa. E mulandu wine kanshi Abena Kristu bakoseleshiwa lyonse “[ukutuula] ilambo lya malumbo kuli Lesa, e kutila, icisabo ca milomo iitootele shina lyakwe”! (Heb. 13:15) Mu kufwaya ukumwafwa ukuwamya amaka yenu aya kubomfya ifya bupe mwapeelwa na Lesa ku kulumbanya Yehova, twamusengela pamo ngo musambi mwi Sukulu lya Butumikishi Ilya Bulesa.

Nangu ca kuti icisambililwa sana mu sukulu kubelenga kwa ku cintubwingi no kulamuka kwa kulanda no kusambilisha, ubunonshi bwa masambililo ye Sukulu lya Butumikishi Ilya Bulesa tabwaba bwa milandile fye. Ilyo mulesambilila, mukafwiwa ukwishiba ukubelenga pa lwenu, ukukutika no kwibukisha, ukusambilila, ukusapika, ukupitulukamo no kuteyanya ifyebo, ukulanshanya, ukwasuka amepusho, ne fya kulemba ifyo muletontonkanya. Apakashimpwa ifya kusambilila ne fikalalandwapo e lyo no kulangililwa mu sukulu ni pali Baibolo na pa mpapulo shilanda pa fya mu Baibolo. Ilyo muleisusha mu muntontonkanya wenu icine caumo mutengo icisangwa mu Cebo ca kwa Lesa, muli no kusambilila ukutontonkanya nge fyo Lesa atontonkanya. Fintu ico cingatunonsha muli fyonse tucita mu mikalile yesu! Pa bucindami bwa Cebo ca kwa Lesa, Kasambilisha wa pa yuniversiti, uwa mu mwanda wa myaka uwalenga 20 William Lyon Phelps alembele ati: “Uwaishiba sana Baibolo e muntu twingatila cine cine alisoma. . . . Ine nasumina ukuti ukwishiba Baibolo ukwabula ukusambililapo ifya ku koleji kwalicindama nga nshi ukucila ukusambilila ifya ku koleji ukwabula ukwishiba Baibolo.”

Ifya Kucita pa Kunonkelamo Sana

Lelo kwena, pa kunonkelamo sana mu masambililo ya mwi Sukulu lya Butumikishi Ilya Bulesa, imwe bene, mwe basambi, mufwile ukuibikilishako. Umutumwa Paulo aebele Umwina Kristu umunankwe Timote ati: “Ube no mute ku fintu ifi, ikala muli ifyo, ukuti ukulunduluka kobe kumoneke kuli bonse.” (1 Tim. 4:15) Ni mu nshila nshi mwingaibikilishako mwe bene?

Nga kuti mwakumanisha, sangweni kwi Sukulu lya Butumikishi Ilya Bulesa cila mulungu. Bomfyeni bwino cino citabo ca kusambililamo icileti Nonkelenimo mu Masambililo ya Isukulu lya Butumikishi Ilya Bulesa. Lembeni ishina lyenu pa ncende ili palya pali umutwe wa citabo. Lyonse mulecisenda ilyo mulesangwa kwi sukulu. Ici citabo kuti mwalembanamo. Ilyo mwabelenga ifishinka fyacindama ifyo mulemona ukuti kuti fyamwafwa, shileni. Bomfyeni incende ikalamba iili ku mbali ya mabuula ku kulemba ifishinka mwasambilila mu sukulu ifyo mwingabomfya.

Mukalapeelwa ukutantika kwa mwi Sukulu lya Butumikishi Ilya Bulesa. Uku kutantika kukalangilila na fintu isukulu lili no kutungululwa. Kuti cawama ukusungila uku kutantika muli cino citabo, pa kuti cileyanguka ukukubomfya.

Ilyo mulepekanishisha isukulu lya cila mulungu, muleibukisha ukuti icitabo cikalamba ica kusambililamo ni Baibolo. Ukubelenga iciputulwa conse ica Baibolo icili no kubelengwa uyo mulungu e ko mufwile ukwangwa sana. Nga mwingabelengela kabela ne fyebo fimbi ifya muli programu wa uyo mulungu, na co kuti camunonsha.

Mu nshita ye sukulu, kuti kwaba no kwasukapo. Bomfyeni bwino iyi nshita. Nga muleasukapo na imwe mu kulanshanya kwa musango yo cikamwafwa sana ukwibukisha ifyo mumfwa no kumona ifyo mwingafibomfya mu mikalile ya pa lwenu.

Kwena, abasambi bonse bakakwata inshita sha kulandako amalyashi nelyo ukucita ifilangililo pa ntanshi ya cilonganino. Bomfyeni iyo nshita no kwesha ukubomba bwino. Ibikilisheniko na maka ukuwamyako ico bamwebele ukubombelapo. Muli no kufundwa pa kuti mutwalilile ukulunduluka. Mwisuula uko kwafwa. Lembeni mu citabo cenu imitubululo imo iya fintu mwingacita pa lwenu pa kuti mukawamyeko. Apo calyafya ku muntu ukuimona ifyo bambi bamumona, imitubululo no kufunda kwabamo ukutemwa, ukwashimpwa pali Baibolo kuti fyamwafwa sana ukulunduluka. Ico cilabomba nampo nga muli bakokole muli ili sukulu nelyo iyo.—Amapi. 1:5.

Bushe kuti mwatemwa ukulunduluka bwangu bwangu? Nga mwalishiba ukuitendekelako, kuti mwalunduluka bwangu bwangu. Pekanishisheni kabela ifyebo ifili no kulandwapo mu lyashi lya musambi limo na limo. Nga ca kuti kulekabilwa kalanda wa kuba mwi punda lya ushilipo, mukaba namuipekanya ukuitemenwa ukupyanapo, kabili ico cikalenga mukacishepo ukubelesha. Lintu bambi balelanda amalyashi, kutikisheni ifyo balelondolola ifyebo fyabo. Tusambilishanya fye.

Kabinge, nge fintu fili fye bwino, kuti mwalundako umusenselo wa kulunduluka kwenu ukupitila mu kupekanishisha kabela muli cino citabo ca kusambililamo. Pa numa ya kusambilila bwino bwino ifili mu masambililo yakonkelepo 15, kuti mwatwalilila ukusambilila mu “Programu wa Kwafwa Ukuba Kalanda Kabili Kasambilisha Musuma,” ukutampila pe bula 78. Intanshi, sambilileni isambililo limo na limo no kwesha ukucita ifili pa kamutwe kaleti Ifya Kucita akali ku mpela ya ilyo isambililo. Bomfyeni ifyo mulesambilila mu butumikishi bwenu. Ici kuti cayafwilisha sana ukulunduluka kwenu pamo nga kalanda kabili kasambilisha wa Cebo ca kwa Lesa.

Amasambililo yenu aya Isukulu lya Butumikishi Ilya Bulesa yali no kumupekanishisha ku fyacindama icine cine mu mikalile. Apo twaba aba mweo ku mulandu wa kufwaya kwa kwa Lesa, ukumulumbanya e kwiluka ubufwayo bwine twabelapo. Yehova Lesa awamina ukulumbanya kwapulishamo. (Ukus. 4:11) Amasambililo tusambilila mu sukulu e nshila ya kucitilamo ici pa kuti tuletontonkanya bwino, ukubomba mano mano, no kwishiba ifya kwebako bambi pa lwa cine cishaiwamina ica mu Cebo capuutwamo ica kwa Lesa.