Ukubilisha

◼ Impapulo sha kutambika mu June: Tambikeni icitabo ca Ukwishiba nelyo broshuwa wa Cintu Lesa Afwaya. Nga ca kuti abene mayanda balikwata ishi mpapulo, bomfyeni broshuwa umbi uulingile uo icilonganino cikwete. July na August: Broshuwa uuli onse uwa mabula 32 pali aba kuti abomfiwa: Bushe Lesa mu Cituntulu Alatusakamana?, Bushe Ulingile Ukusumina Muli Bulesa Butatu?, Cinshi Caba Imifwaile ya Bumi?—Ni Shani Fintu Wingaisanga?, Cinshi Cicitika Nga Twafwa?, Ilyo Untu Watemwa Afwa, Imipashi ya Bafwa—Bushe Kuti Yakwafwa Nelyo Ukukucena? Bushe mu Cituntulu Eko Yaba?, Ipakishe Ubumi pe Sonde Kuli Pe na Pe!, Ishina lya Bulesa Ilikatwalilila Kuli Pe na Pe, Kamfulumende Iikaleta Paradise, Kuti Mwaba Cibusa wa kwa Lesa!, na “Moneni! Ifintu Fyonse Nafilenge Fipya.” September: Tambikeni ifitabo fya kale ifyo icilonganino cikwete.

◼ Ilyo muli mu butumikishi, napamo kuti mwakumanya nkomamatwi. Nga ca kuti uko mwaba kwaba icilonganino cakwata ababomfya ululimi lwa fishibilo ulwa kumfwaninamo na bankomamatwi, kuti mwacita ifyalandwa muli kalata wa March 20, 2000, ku filonganino fyonse. Uyu kalata atila: “Formu wa kutila ‘Balondoleni’ akulabomfiwa ku kulemba ifyebo pa lwa bantu abalanda indimi shimbi kumo fye na babomfya ululimi lwa fishibilo, te mulandu bekala mu cifulo icilonganino cenu cibombela nelyo bekala mu fifulo fimbi. Ilingi line, abantu abalanda indimi shimbi na babomfya ululimi lwa fishibilo bafwile ukulembwa pa formu nangu fye tatwishibe bwino nga balefwaya ubukombe bwa Bufumu nelyo iyo. . . . Nga mwaisushisha formu wa kutila ‘Balondoleni,’ mufwile ukupeela kalemba wa mu cilonganino nelyo kuti mwapoosa mu kabokoshi kalya mupoosamo amalipoti ya mulimo wa mwi bala ku Ng’anda ya Bufumu.” Nga ca kuti kasabankanya umo na umo apempwila ukukonka ifi, ifilonganino fyakwata ababomfya ululimi lwa fishibilo ulwa kumfwaninamo na bankomamatwi fikaba na maka ya kupanga umutande wa bankomamatwi ababa mu cifulo cabo.

◼ Pa kutwafwa ukupekanya no kwimbako inyimbo shonse uno mwaka pe Bungano lya Citungu ilya “Peeleni Lesa Ubukata,” ishi e nyimbo shisalilwe ukwimbwa: 4, 12, 18, 59, 63, 79, 92, 96, 111, 113, 157, 160, 164, 175, 193, 201, 202, na 212. Baeluda balingile ukuteyanya bwino pa kuti icilonganino citendekeko ukupituluka mu nyimbo. Lekeni ifwe bonse tulepituluka muli ishi nyimbo ilyo inshita ye bungano ishilafika pa kuti tukembe na maka kabili mu kucincimuka, inyimbo sha kulumbanya Yehova.

Abalemana—Lelo Abatwale Fisabo

¹ Nga ca kuti na imwe muli bamo pa Nte sha kwa Yehova bamo abalemana, ubutumikishi bwenu na imwe kuti bwatwale fisabo. Na kuba, iyo mibele yenu kuti yalenga mwaba na mashuko yaibela aya kushimikila no kukoselesha bambi.

² Ukushimikila Ubunte: Abengi abalemana balabombako sana ubutumikishi. Ku ca kumwenako, nkashi umo uwalemene no kuleka ukulanda bwino pa numa ya opareshoni, asangile ukuti kuti abombako umulimo wa magazini nga ca kuti umulume wakwe aimika motoka lwa mupepi na papita sana abantu. Inshita imo, ashalike bamagazini 80 mu maawala fye yabili! Pa mulandu wa mibele yenu iyaibela kuti mwakumana na bantu abo cishayanguka ukukumanya. Nga ni fyo, mulebamona nge bala lyenu ilyaibela.

³ Ukushimikila kwenu kuti kwatunguluka nga nshi! Ilyo bambi balemona umupampamina wenu ne fyo icine ca mu Baibolo calenga imikalile yenu ukuba bwino, kuti bafwaya ukuumfwako ubukombe bwa Bufumu. Kabinge, ilyo mwakumanya abantu abacululuka, ifyo mupitamo mu bumi kuti fyamwafwa ukubapeela icisansamushi ca mu Cebo ca kwa Lesa.—2 Kor. 1:4.

⁴ Kosheniko Bambi: Bushe tamwakoseleshiwe ku lyashi lyalandile pa bumi bwa baLaurel Nisbet, abakulikwe kuli mashini wa kubaafwako ukupeema pa myaka 37, lelo abayafwile abantu 17 ukwishiba bwino icine ca mu Baibolo? Ica kumwenako cenu na imwe kuti cakoselesha abasumina banenu ukuti balepilikita mu mulimo wa kwa Yehova.—g93 1/22 amabu. 18-21.

⁵ Nangu ca kuti imibele mwabamo ilelenga mulefilwa ukuya mu butumikishi imiku mwingafwaya ukuya, na lyo line kuti mwakoselesha bambi. Munyina umo atile: “Nimona ukuti nangu fye muntu uwalemana icabipisha kuti ayafwa sana bambi. Ine no mukashi wandi tuli nkosho ku bengi mu cilonganino. Pa mulandu wa mibele twabamo, lyonse tulasangwako.” Lelo, natwishiba ukuti napamo teti mubombe ukulingana no kupimpa kwenu pa mulandu wa bulema. Na lyo line, ilyo kwaba ukwafwilisha nalimo kuti mwacincila mu kubombako ubutumikishi. E ico, nga mulefwayako ubwafwilisho, mwishingashinga ukweba baeluda nelyo bambi mu cilonganino abengamwafwa.

⁶ Yehova alamona fyonse ifyo mucita pa kuti mumubombele, kabili alasekela mu mulimo mu mubombela no mweo onse. (Amalu. 139:1-4) Nga mwashintilila pali wene, akamupeela amaka pa kuti ubutumikishi bwenu buletwale fisabo no kuba ubusandulula.—2 Kor. 12:7-10.