calinga cingapayanishiwa icingacilengo kucitikako ku kulubulwa ukufuma ku lubembu ne mfwa kuli ifwe.—1 Tim. 2:5, 6; lyene nakalimo Yohane 3:16.’

Nelyo kuti wasosa ukuti: ‘Ee, twalisumina. Twalisumina icili conse ico Amalembo Yashila yasosa pa lwa wene, kabili mu kushininkisha yasosa ukuti aali nacisungu lintu afyele Yesu. Nsanga na kabili ifintu fimbi ifya kukafyo mutima ifyo yatweba pa lwa kwa Maria na masambililo twingasambilila ukufuma kuli wene. (Bomfya ifyebo pa mabula 229, 230.)’

‘Tamwasumina muli Nacisungu Maria’

Pambi kuti wayasuko kuti: ‘Nalishiba ukuti kwaliba abantu abashasumina ukuti aali nacisungu uwafyele Umwana wa kwa Lesa. Lelo twalisumina ico. (Isula cimo ica fitabo fyesu ku ciputulwa icilanda pa mulandu no kulanga mwine ŋanda.)’ Lyene nakalimo lundapo ukuti: ‘Lelo bushe kwalibako icili conse icacilapo icikabilwa nga tuli no kunonka ipusukilo? . . . Mona cintu Yesu asosele mwi pepo kuli Wishi. (Yoh. 17:3)’

Mukanyakristu

Ubulondoloshi: Mukanyakristu apilibula ukulwisha nelyo ukuba mu cifulo ca kwa Kristu. Ishiwi libomba kuli bonse abakaana cintu Baibolo isosa pa lwa kwa Yesu Kristu, bonse abakaanya Ubufumu bwakwe, na bonse abasunga abakonshi bakwe bubi bubi. Na kabili lisanshamo abantu umo umo, amateyanyo, ne nko abo bufi bufi batunga ukwimininako Kristu nelyo abo mu kukanalinga baipeela abene ulubali lwa kwa Mesia.

Bushe Baibolo ilosha kuli mukanyakristu umo fye?

1 Yoh. 2:18: “Mwe twana, ino ni nshita ya kulekelesha. Kabili, ifyo mwaumfwile ukuti Mukanyakristu aleisa, na nomba babako bamukanyakristu abengi; e mo twaishibilo kuti ni nshita ya kulekelesha.”

2 Yoh. 7: “Bacindufyanya abengi nabafumina pano isonde, abashisumina ukwisa kwa kwa Yesu Kristu mu mubili. Uyu e cindufyanya, kabili mukanyakristu.” (Mona ukuti “bamukanyakristu abengi” aba pali 1 Yohane 2:18 pano baloshiwako capamo pamo nga “mukanyakristu.”)

Bushe ukwisa kwa kwa mukanyakristu kwabakilwe inshita imo iya ku ntanshi?

1 Yoh. 4:3: “Umupashi onse uushisumina Yesu te wa kwa Lesa iyo. Kabili uyu e wa bumukanyakristu untu mwaumfwa ukuti uleisa; na nomba e po uli pano isonde.” (Ico calembelwe mupepi na pa kupwa kwa mwanda wa myaka uwa kubalilapo C.E.)

1 Yoh. 2:18: “Na nomba babako bamukanyakristu abengi; e mo twaishibilo kuti ni nshita ya kulekelesha.” (Ku “nshita ya kulekelesha” Yohane mu kumonekesha apilibwile iciputulwa ca nshita ica batumwa. Abatumwa bambi balifwile, na Yohane umwine wine aali umukoloci nga nshi.)

Bamo aba abo beshibikwa nga mukanyakristu—

Abantu abakaana ukuti Yesu te Mesia wa cine cine

1 Yoh. 2:22: “Uwa bufi ni ani, kano uukaana, ati, Yesu te Kristu [nelyo, Mesia, uwasubwa]? Uyu e Mukanyakristu.”

Bonse abakaana ukuti Yesu te Mwana wa kwa Lesa uwaibela

1 Yoh, 2:22: “Uyu e Mukanyakristu, uukaana Wishi no Mwana.”

Linganyako Yohane 10:36; Luka 9:35.

Abasangu

1 Yoh. 2:18, 19: “Babako bamukanyakristu abengi . . . Bafumine muli ifwe, lelo tabali bena mwesu.”

Abo bakaanya abakonshi ba cine aba kwa Kristu

Yoh. 15:20, 21: “Nga bapakese ine, bakapakasa na imwe . . . Lelo fyonse ifi bakacitila kuli imwe pa mulandu we shina lyandi.”

Abantu umo umo ne nko abakaanya Kristu nge Mfumu nelyo abo abene bene mu bufi baitunga mu cifulo ca kwa Mesia

Amalu. 2:2: “Imfumu sha pano isonde shaibikako, na bakankala batekela akabungwe pali Yehova na pa wasubwa wakwe [Kristu, nelyo Mesia].”

Mona na kabili Ukusokolola 17:3, 12-14; 19:11-21.