Mwileka Ukutemwa Uko Mwakwete pa Kutendeka Kupwe
1 Yesu uuli nomba mu bukata mu muulu, afundile icilonganino ca mu mwanda wa myaka uwa kubalilapo ica mu Efese ukuti: “Ndi ne ci ica kukushinina, ukuti nuleka ukutemwa uko wakwete pa kubala.” (Ukus. 2:4) Nalimo abengi pali ilya nshita tabatemenwe Yehova nga filya bamutemenwe pa kutendeka. Ilyo twalesambilila icine, twalitemenwe sana Lesa na bantu banensu, kabili ici calengele ukuti tucincile ukulaebako bambi icine twasambilile. Finshi fikatwafwa pa kuti twikaleka ukutemwa uko twakwete pa kutendeka ukupwa no kukanaleka ukucincila mu mulimo wa kushimikila?
2 Isambililo lya pa Lwesu no Kulaya ku Kulongana: Cinshi calengele ukutila tutemwe Lesa na bantu banensu ilyo fye twasambilile icine? Bushe icalengele te fintu twasambilile pali Yehova mwi sambililo lyesu ilya mu Baibolo? (1 Yoh. 4:16, 19) E ico, pa kutila ukutemwa kwesu “kufule nga nshi,” tatulingile ukuleka ukusambilila ukwishiba kwine kwine e lyo no kulaimba mu “fyashika fya kwa Lesa.”—Fil. 1:9-11; 1 Kor. 2:10.
3 Ukulakonka lyonse programu yesu iye sambililo lya pa lwesu kuti kwayafya muli shino nshiku sha kulekelesha umwaba ifitusakamika sana ne fya kutupumfyanya ifingi. (2 Tim. 3:1) Tulingile ukutantika inshita ya kulya ica kulya ca ku mupashi. Ukulaya ku kulongana kwa cilonganino nako kwalicindama, maka maka ilyo ‘tulemona ubushiku bulya bulepalama.’—Heb. 10:24, 25.
4 Ukubila Imbila Nsuma: Ukucincila mu kubila imbila nsuma kulatwafwa ukutwalilila ukutemwa Lesa nga filya twamutemenwe pa kutendeka. Ilyo tulebila imbila nsuma, tulaicinkulako fwe bene pa malayo yasuma aya kwa Yehova, kabili kulatwafwa lyonse ukulaibukisha isubilo ilyo twakwata kabili kulalenga twatwalila ukutemwa Lesa. Ilyo tulesambilisha bambi icine ca mu Baibolo tulingile ukubelengelapo ifyebo na fimbi pa kuti tumfwikishe ifyo balelandapo, kabili ukucite fi kulalenga icitetekelo cesu ukukosa.—1 Tim. 4:15, 16.
5 Tulingile ukupeela Yehova fyonse ifyo afwaya. (Ukus. 4:11) Mwileka ukutemwa kwenu kupwe. Lekeni ukutemwa kwenu kutwalilile ukupitila mwi sambililo lya pa lwenu, ukusangwa ku kulongana lyonse, no kucincila ukweba bambi imbila nsuma iyo imwe mwaishiba.—Rom. 10:10.