balungama na bashalungama.” (Imilimo 24:15) Pali ilya nshita, pa mulandu we lambo lya cilubula, Yehova akapeela bonse abamumfwila ubumi bwa muyayaya. (Yohane 3:36) Yesu umwine atile: “Lesa atemenwe aba pano calo ukutemwa kwa kuti apeele Umwana wakwe uwafyalwa eka, ukuti onse uumutetekela eonaika lelo abe no bumi bwa muyayaya.” (Yohane 3:16) Ilambo lya cilubula ilyo Lesa apekanya, e likalenga abantu bakapokelele aya mapaalo.

Icalenga icilubula ukucindama sana, busuma ubo caleta kwi shina lya kwa Yehova, te busuma ubo caleta kuli ifwe. Icilubula cilanga ukuti Yehova ni Lesa wa bulungi bwapwililika, uwingapanga icibusa na bantu ababembu no kutwalilila uwasanguluka kabili uwa mushilo. Lesa akaana kutupeela icilubula, nga takwali umwana wa kwa Adamu nelyo umo, nangu fye ni Enoke, Noa, na Abrahamu, uwali no kwenda na Yehova nelyo ukuba cibusa wakwe. Kemba wa malumbo alishibe ici kabili alembele ukuti: “Amampuulu nga mwayamwensekesha, mwe Yehova, mwe Shikulu, nani uwingeminina?” (Amalumbo 130:3) Fintu tufwile ukutasha kuli Yehova pa kutuma Umwana wakwe uwatemwikwa ukwisa pano calo, na kuli Yesu pa kuitemenwa ukupeela ubumi bwakwe ukuba icilubula cesu!—Marko 10:45.

Imibele Isuma Ilalenga na Bambi Baba Abasuma

KU KACISHI kabela lwa ku kapinda ka ku kulyo aka calo ca Japan, umufyashi umo umwanakashi na bana bakwe batatu abaice batendeke ukusambilila Baibolo ne Nte sha kwa Yehova. Ilyo abena mupalamano babo bamwene fyo, balifulilwe no kuleka ukuposha ulya mufyashi ilyo bakumana nankwe. Ne calengele, ni co abantu ba kuli ilya ncende balakonka sana intambi sha ku mwabo. Ulya mufyashi atila, “Icalenkalipa sana ukucila na pa kukanamposha ca kuti abena mupalamano besu bapatile kumo na bena mwandi na bana.” Nangu cali ifyo, aebele abana bakwe ati: “Tufwile ukutwalilila ukuposha abena mupalamano besu bonse pantu e fyo Yehova afwaya.”—Mateo 5:47, 48.

Ulya nyina alesambilisha abana ukuba aba mucinshi ku bantu nangu ca kutila bena balibapatile. Ilingi line, ilyo bali mu motoka baleya ku kamfukumfuku akafumya amenshi ayakaba akabela kuli ilya ncende, abana balepituluka mu fya kuposha. Ilyo baingila fye mu cikuulwa baleikalamo, abana baletendeka ukuposha abantu ne nsansa abati, “Konnichiwa!” e kutila, “Mwapoleni mukwai!” Abana lyonse baleposha bonse abo balekumanya, nangu ca kutila abena mupalamano babo bena tabalemoneka ukuti balefwaya ukulanda na bo. Na lyo line, abantu balemona imibele isuma iya bana ba pali ilya ng’anda.

Awe umuye nshiku, bamo bamo pali cilya cipanda, na bo batendeke ukwankulako abati, “Konnichiwa.” Ilyo papitile imyaka ibili, abengi sana abekala pali ilya ncende batendeke ukwasuka ilyo aba pali ilya ng’anda babaposha. Na kabili, abengi baleposhanya ilyo bakumana na banabo kabili bucibusa bwalemoneka sana pali bena. Uwa cibili pa cifulo ca bumeya kuli ilya ncende, atile alapeela balya bana icilambu pa fyo balengele ukuti abantu babe sana na bucibusa kuli ilya ncende. Lelo banyina kwa bana baebele ulya muntu ukuti abana bakwe balecita fye ifyo Abena Kristu bafwile ukucita. Inshita imbi, ilyo kwali ukucimfyanya kwa bana be sukulu kumo pali cilya cishi, umwana wakwe umwaume alandile pa fyo banyina babasambilishe ukuposha abantu mucinshi mucinshi nangu ca kutila bena tabali na bucibusa. Ilyashi lyakwe e lyo batile e lyaweme sana ukucila pa malyashi ya banankwe bonse kabili lyalembelwe na mu nyunshipepala ya muli lilye tauni. Ukufika na nomba, aba pali ilya ng’anda baliba aba nsansa pantu balishiba ukuti ukukonka ifishinte fya mafunde ya Bwina Kristu e kwalengele ukuti abantu babe aba bucibusa kuli bena. No kushimikila imbila nsuma kwine, kulanguka abantu nga bali aba bucibusa.