Muleba Aba Mushilo mu Fintu Fyonse Ifyo Mucita
1. Cinshi cacindamina ukuba aba mushilo mu fintu fyonse ifyo tucita?
1 Fwe babomfi ba kwa Lesa wa mushilo, Yehova, tulesha na maka ukuba aba mushilo mu fintu fyonse ifyo tucita. (1 Pet. 1:15, 16) E kutila muli fyonse ifyo tubomba tulesha ukucita ifyo Yehova afwaya. Ukulongana kwa citungu ukwa uno mwaka kukatupeela ishuko ilya kulanga ukuti twaba aba mushilo.
2. Kuti twacita shani pa kuti apa kulonganina paba apa busaka?
2 Apa Kulonganina Pafwile Ukuba apa Busaka: Bamunyinefwe na bankashi balabombesha ukupekanya apa kulonganina no kupawamya ilyo ukulongana kushilatendeka. Kanshi fyonse ifyo twaisa na fyo ku kulongana, nampo nga mapulashitiki nelyo mabotolo, tufwile ukufisenda. Filya fine twacifisenda pa kwisa ku kulongana ninshi muli ifya kulya ne fya kunwa, e fyo twingasenda na pa kuya pantu ninshi no kwanguka nafyanguka.
3. Finshi fingalenga ubusali kabili kuti twawamya shani pa cifulo apo tulelonganina?
3 Ku ncende shimo pa kulongana kwa citungu, indupwa shiliila ifya kulya mu cibansa ciine umo balelonganina kabili ici cilawama nga nshi. Lelo tatufwile ukusha ifisoso palya pene twikele mpaka ubushiku bwa kulekelesha e lyo twawamya. Cila lupwa lufwile ukukusa ifisoso fyonse ifili apo baliila. Shininkisheni ukuti ilyo ukulongana kwa cungulo kuletendeka ninshi namutoola no kukusa amabotolo, utupendo, ifya kulya fiponaile nangu ukulonganya bwino ifya kulya ifishelepo, amapulashitiki, amapepala ayali yonse nangu fye maprogramu ya kulongana. Nga mulefwaya kuti mwaisa na pulastiki umo ulupwa lwenu lwingalabika ifisoso no kusendelamo pa kuya mu kupoosa mu ng’ungulu nelyo mu cilindi batile e mukanda wa kubomfya ilyo tulelongana. Mwilabika nelyo ukuleka amabotolo ya fya kunwa fyatalala nelyo ayashilimo ifintu yabe fye apali ponse, kuti yalenga ubusanso kabili tayamoneka fye na bwino. Nga ca kuti twalikwata ing’anda pa cifulo pene apa kulonganina, tulingile ukushininkisha ukutila ulubansa lwesu luli ulwa busaka. Tulingile ukusambilisha abana ukupyanga no kukusa ifisoso ukuyapoosa uko fifwile ukupooswa.
4. Mafunde nshi mu Israele ayalelenga ukuba no bumi busuma, kabili cinshi abantu ba kwa Yehova aba leelo bengasambilila kuli ci?
4 Bushe mwalimona ifyo ilingi line bamo basha ifimbusu ifya busali ica kuti abanabo bafilwa no kufibomfya pantu tafili bwino? Ukusha ifimbusu ifya busaka ilyo twafibomfya bushininkisho na bumbi ubwa kuti “tubombe cisuma kuli bonse.” (Gal. 6:10) Ifunde Lesa apeele Abena Israele ulwa fya kupoosa ubusali bwa bantu talyapita na mu mbali kabili lyalyanguka ukulikonka. Icitabo ca Insansa sha Lupwa citila: “Ifunde limo ilya musango yo lyakumine ku kupoosa ubusali bwalefuma mu bantunse, ubwali no kushiikwa bwino ukutaluka ku nkambi pa kuti incende ukwaleikala abantu taisafiwe.” (Belengeni Amalango 23:12, 13) Ili funde lya kale lilabomba na muno nshiku kabili kuti twaba no bumi busuma nga twaumfwila ifishinte fya liko. Ukumfwila amafunde ya kwa Yehova pa lwa busaka lyonse kulaleta amapaalo kabili kulatulenga ukupusanako na bantu bambi.—Amala. 28:9, 10.
5, 6. Bushe ukutemwa kuti kwatulenga shani ukuba aba busaka?
5 Ukutemwa aba bwananyina kukatulenga ukubalangulukilako. “Ukutemwa . . . takucita icishiyene, takuifwaila ifya kuko.” (1 Kor. 13:4, 5) Te mucinshi ukusha nelyo ukuleka ifisoso apo twikele pantu abanensu bekele fye mupepi. Te mucinshi ukusha ifimbusu ifya busali pantu abanensu na bo balefwaya ukufibomfya. E ico, tulecita ifilanga ukutila twalitemwa abantu banensu.—Yoh. 13:35.
6 Tulomfwilapo icilumba pa fifulo fyesu ifya kupepelapo kabili tulatashiwa pantu cila nshita tuya tulecita bwino mu kusunga ifi fifulo ifya busaka. Shi ifwe bonse natutwalilile ukubombesha ‘ukuisangulula kuli fyonse ifikowesha umubili no mupashi, tube abafishapo bumushilo mu kutiina Lesa.’ (2 Kor. 7:1) Muleba no busaka pa ng’anda pa mwenu kabili mulesambilisha na bana ukucita cimo cine. Belesheni ukuba no busaka pa Mayanda ya Bufumu, ne ci cikalenga ukuti ilyo twalongana pa kulongana kukalamba tukafwaisha ukuba ne misango isuma iya kwa Lesa wesu uwa Mushilo Yehova.—Esa. 60:2.
7. Bushe imisango yesu ilyo tuli pa kulongana kwa citungu icindika shani Lesa?
7 Imisango yesu ilatulenga ukupusanako na bantu bambi kabili ilacindika Lesa wesu. (1 Pet. 2:12) Abantu bambi bakalamona ifyo Inte sha kwa Yehova bakalacita ilyo bakalalongana ukulongana kwa citungu. E ico, bombesheni ukuba aba busaka, sungeni icifulo cesu ica busaka kabili beni aba mushilo mu fintu fyonse ifyo mucita.
[Akabokoshi pe bula 5]
Mukabe Aba Mushilo Muli Fyonse
◼ Mukabe no Busaka
◼ Mukalesopa abana benu
◼ Mukalelangulukilako bambi