Ififulo Fyesu Ifya Mushilo Apo Tupepela

1. Nani uo tulingile ukutasha pa Mayanda ya Bufumu ayasuma ayakuulwa?

¹ Mu 1999 Amayanda ya Bufumu nalimo 1,500 e yalefwaikwa mu Zambia. Pali ino nshita ayakuulwa yalicila pali 1,300. Konse uko mwingaya icalo fye conse kuti mwaimwena na menso yenu ukuti cine cine Yehova alepaala bakapepa bakwe pa mulandu wa mayanda ayasuma aya kumupepelamo. Ala aya mayanda yaleleta ilumbo kwi shina lya kwa Yehova! Ilingi line tulomfwa uko bantu balanda ukuti Inte sha kwa Yehova ‘balikuula Amayanda ya Bufumu icalo fye conse.’ Ifilonganino ifingi, kale fyaleka ukulonganina pa nse, mu masukulu, nangu mu fiyanda ifimoneka ukuti tamwalinga na kulinga ukupepelamo Lesa wesu. Te kuti tutwishike ‘ukuti uyu mulimo ubombelwa ku maka ya kwa Lesa.’—Nehe. 6:16; Seka. 4:6.

2. Finshi twingasambilila ku fyacitikile Esau pa kucindamika ifintu fya ku mupashi?

² Ukulatasha: Bonse fwe bapepa Yehova tulingile ukulacindamika ifintu fya ku mupashi. Twalishiba ku fyacitikile Esau ukuti nga tatuletasha, Yehova kuti atupoka ipaalo lyakwe. Finshi twingasambilila ku mibele yabipa iya kwa Esau? Tufwile ukulatasha Yehova lyonse pa fifulo fyesu ifya kumupepelapo.

3, 4. Kuti twalangilila shani ukuti tulatasha pali programu ya Kukuula Amayanda ya Bufumu (a) ifwe ngo muntu umo umo? (b) nge cilonganino?

³ Inshila imo iyo twingalangilamo ukutasha kulasangwilako sana ku mulimo wa Kukuula Amayanda ya Bufumu. (2 Kor. 9:6, 7) Ilyo Amayanda ya Bufumu tayalakuulwa, ifilonganino filalaya ukuti fili no kulatuma indalama sha kuti na sha kuti cila mweshi ku makuule ya Mayanda ya Bufumu (Umusangulo wa Bukuule bwa Ng’anda ya Bufumu). Nga tuletuma lyonse indalama ukulingana ne fyo twalaile, ninshi tuletasha Yehova pa kutupeela Ing’anda ya Bufumu iipya. (Yako. 5:12) Iyi imisangulo lyena ilabomfiwa ukukuulilamo bambi abashakwata Amayanda ya Bufumu.—2 Kor. 8:14.

⁴ Apo ifilonganino ifingi ifyo baafwa ukukuula Amayanda ya Bufumu te kuti fiyikuulile ifine, umusha wa cishinka amwene ukutila kuti cawama ukwafwa ifyo filonganino ifishakwata ndalama. Ifyo filonganino filaitemenwa ifine ukulatuma imisangulo ku ofeshi cila mweshi, iyi misangulo fye iya makuule ya Mayanda ya Bufumu, te kubwesha indalama baashime pa kukuula. Kabili nga mwatuma iyi misangulo iofeshi lilatasha nga nshi ica kuti lyalemba ne fyebo fya kutasha ku cilonganino muli sitetimenti ya cila mweshi.

5. Ni nshila nshi imbi iyo twingalangilamo ukuti tulatasha pa kukwata icifulo cesu ica kupepelamo? (b) Mulandu nshi uukalamba uo tulingile ukulasungila bwino Ing’anda ya Bufumu?

⁵ Ico Cacindamina Ukulasunga Bwino Amayanda Yesu aya Bufumu: Inshila na imbi iyo tulangilamo ukuti tuletasha kulasunga bwino Amayanda yesu aya Bufumu. Apo pa Mayanda ya Bufumu palilembwa ishina lya kuti Yehova, kanshi tufwile ukubikako amano ukulayasunga bwino. Aya mayanda tuyamona ukuti ya kwa Yehova, te yesu iyo! Fwe cilonganino, nalimo twalifililwe ukuikuulila fwe bene umwa kupepela pa mulandu wa kubulwa indalama. Lelo pa mulandu wa luse lwa kwa Yehova, nalimo twalikwata Ing’anda ya Bufumu iipya. Bushe kwena teti tuletasha no mutima onse no kulasunga bwino ici cifulo ca mushilo ico tupepelapo? Nga tatulesunga bwino Ing’anda yesu iya Bufumu kuti twaseebanya ishina lya kwa Yehova.—Nehe. 1:3; 2:17.

6. Finshi ifyo iofeshi lyaumfwa?

⁶ Ifilonganino ifingi kwena filesunga bwino Amayanda yabo aya Bufumu. Nomba ifilonganino fimo, awe nakalya fyalilekelesha Amayanda yabo aya Bufumu. Iofeshi lyalyumfwa ukuti Amayanda ya Bufumu ayakuulilwe fye nomba line tayalesungwa bwino. Yamo yalikwata imilale, ifibumba fyalilamba kale, ifipuna fyalyonaika, uko basungila ifipe kwalilamba, amawindo yalitobeka, pa lubansa tapamoneka apa busaka, e lyo ne fimbusu na fyo fya fiko no konaika nako fyalyonaika. Ifi e fimo fimo fye ifyo twaumfwa. Bushe ifi twatantawila e fyo ne Ng’anda yenu iya Bufumu yaba?

7. Mulandu nshi umbi uo tulingile ukusungila bwino Ing’anda ya Bufumu?

⁷ Nga fintu tulandilepo kale, umulandu uukalamba uo tusungila bwino Amayanda ya Bufumu wa kuti palilembwa ishina lya kuti Yehova. Umulandu na umbi wa kuti pa kukuula Ing’anda ya Bufumu palaya icuma icingi. Pali ino nshita, mu Zambia pa kukuula Ing’anda ya Bufumu imo iinono fye indalama shiyapo shitampila pali K40,000,000 ukufika kuli K50,000,000. Kanshi tulingile ukulasunga bwino Amayanda yesu aya Bufumu, pantu kwena indalama bakulila Amayanda ya Bufumu, sha kubomfya fye ku mulimo wa mushilo te ku fintu fimbi. E lyo kabili indalama shine ishi abasangula ni bakasabankanya, bafumya fye pa sho balingile ukulabomfya ukwikalilamo, tabatila fye isha shalapo esho basangula. (Marko 12:41-44) Nga tuleibukisha ifi fishinka kuti twalasunga bwino amayanda yesu aya Bufumu.

8. Ni bani bafwile ukuwamya ifintu nga fyaonaika ku Ng’anda ya Bufumu?

⁸ Nangu ca kuti iofeshi, ukulingana ne funde lya calo, e line lya Mayanda ya Bufumu ayengi, lelo kwena ya kwa Yehova. E ico kanshi icilonganino cimo na cimo e cakwata umulimo wa kusunga bwino ing’anda ya kwa Lesa. Limo ifilonganino filalembela iofeshi amakalata ya kulomba ubwafwilisho bwa kufwailako ifiibi fimbi nangu amafulemu ya fiibi nga fyaliiwa ku bubenshi nangu nga fyaonaika pa mulandu wa mfula na kasuba, ukucilika utumilale, nangu ukushitilapo amalata ayanono ayonaike. Abene ba uyu mulimo cilonganino, e cilingile ukubomba.—Nehe. 10:39.

9. Cinshi icifwaikwa pa kusunga bwino Amayanda ya Bufumu?

⁹ Nga mwamona ubwafya, mulingile ukubombelapo bwangu bwangu ilyo ubo bwafya tabulakula. Nalimo no kumona twalimona ukuti utumilale nga tamutucilike bwangu tulakula twaba imilale iikalamba. Amalata nga yanenuka nga tamuyapampamine bwangu bwangu kuti yasendwa ku mwela no konaika yaonaika. Ukuceeceeta icikuulwa no kuwamya ifyonaikeko bwangu kuti kwamwafwa ukukanapoosa indalama ishingi ukucila ukulolela ubwafya bwakula. E ico kanshi ifilonganino filingile ukulasungako akandalama cila mweshi aka kushitamo ifya kubomfya pa kusunga bwino Amayanda ya Bufumu. (1 Kor. 16:2) Lelo kwena nga kwaba ubwafya bwa kupumikisha ubukalamba, iofeshi kuti lyamwafwilisha, kuti lyabomfya kulya kupekanya kwabako ukwa Kingdom Hall Assistance Arrangement.

10. Mulandu nshi cingawamina ukwitako bamunyinefwe abaishiba imilimo ilyo mulewamya ifyonaike ku Ng’anda ya Bufumu?

¹⁰ Ilyo mulewamya Ing’anda ya Bufumu, kuti cawama nga mwaitako bamunyinefwe abaishiba imilimo e babombelapo. (Ukufu. 35:30-35) Nga twacite ifi ninshi umulimo ukabombwa bwino, kabili kuti twacefyanyako na mafya ayengeesa pa mulandu na masanso.

11. Ni bani batungulula mu mulimo wa kuwamya Ing’anda ya Bufumu, kabili nani uo balingile ukulapashanya?

¹¹ Mulewamyako Ing’anda Yenu iya Bufumu: Ala cilawama nga nshi nga ca kuti baeluda na babomfi batumikila e baleba pa ntanshi mu kuwamya Ing’anda ya Bufumu no kuisunga ubusaka! Nehemia e o twingapashanya. Alipuseneko na bakangalila abamutangilile, ena Nehemia talecusha abantu ba kwa Lesa nangu kubapatikisha ukubombako. Talefwaya ukuti abantu balemupo mucinshi waibela. Lelo alebombako no mutima onse uyu mulimo. E mulandu wine kanshi alandile ukuti: “Lelo ine nshacite fi; pa mulandu wa katiina ka kuli Lesa. Na kabili nakoselele mu mulimo we linga ili.” (Nehe. 5:15, 16) Kanshi e wali pa ntanshi mu kuwamya ifibumba fya musumba.

12. Ni bani bengabombako umulimo wa kusunga bwino Ing’anda ya Bufumu?

¹² Pali Nehemia 3:12 tubelengapo umuntu na umbi umukankaala, ishina lyakwe Shalumu. Ena na bana bakwe abanakashi tabaleimona ukuba abacindama aba kukanabombako umulimo. Na ifwe bonse tufwile ukuba nga Nehemia, Shalumu, na ba mu ng’anda yakwe ukulasunga bwino Amayanda yesu aya Bufumu. Bushe kwena te paalo ukubombako umulimo wa kusunga bwino Ing’anda ya Bufumu?

13. Cinshi tufwile ukupanga mu mitima yesu pa Mayanda yesu aya Bufumu?

¹³ Te ca Kwesha Ukulekelesha Ing’anda ya kwa Lesa Wenu: Bushe ifi twalandapo abengafikonka fye bantu bakwata Amayanda ya Bufumu ayo iofeshi lyabafwile ukukuula? Iyo. Ne filonganino fye fyonse ifilonganina mu cikuulwa icili fye conse ico batila ni Ng’anda ya Bufumu, balingile ukusunga ico cikuulwa bwino pa kuti cilinge ukulaitilwa kwi shina lya kuti Ing’anda ya Bufumu iya Nte sha kwa Yehova. Ico cikuulwa cifwile ukuba icaibela pa fikuulwa fyonse ifyaba kuli iyo ncende, cifwile ukuba ica busaka kabili icasungwa bwino pantu cifulo cikalamba apa kupepela Lesa wa cine. Shi natupange mu mitima yesu ukuti twakulatasha no mutima fye onse pa fifulo fyesu ifya mushilo apo tupepela Lesa, kabili shi twikatala ‘atulekelesha ing’anda ya kwa Lesa wesu.’—Nehe. 10:39.