Watchtower LAIBRARE YA PA INTANETI

“Pa Kutumwa no Mupashi wa Mushilo”

Ukulabila Sana pa Bufumu bwa kwa Lesa
- ICIPANDE 4 • IMILIMO 13:1–14:28
  
  “Pa Kutumwa no Mupashi wa Mushilo”
  
  IMILIMO 13:4
  
  Muli cino cipande, twalakonka umutumwa Paulo pa bulendo bwakwe ubwa kubalilapo ubwa bumishonari. Mu mishi yonse umo umutumwa Paulo aleya, balemucusha. Lelo apo aletungululwa no mupashi wa mushilo, alitwalilile ukubila no kupanga ifilonganino ifipya. Ukwabula no kutwishika, ili lyashi ilya kucincimusha lyalatulenga ukuba abacincila nga nshi mu mulimo wa kushimikila.

“Balisekelele Nga Nshi no Kwisulamo Umupashi wa Mushilo”

Ukulabila Sana pa Bufumu bwa kwa Lesa
- AMAFYA BALEKWATA PA BULENDO
  
  Kale ukwenda pa makasa kwalesenda inshita sana, kabili kwalenasha nga nshi, nalimo balepoosa ne ndalama ishingi ukucila ukwenda na mato. Lelo pa kufika ku fifulo ifingi, bale-enda fye pa makasa.
  
  Umuntu kuti aenda nalimo amakilomita 30 mu bushiku bumo. Akasuba kaleboca, imfula yalebaloka, kabili balecula ku kukaba ne mpepo, e lyo balebebila na ku fipondo. Umutumwa Paulo alandile ukuti “inshita ishingi naleba pa lwendo, naleponena mu masanso pa mimana, nalesanswa ku fipondo.”—2 Kor. 11:26.
  
  Mu misumba umo aba Roma baleteka mwali imisebo iingi iyo bapangile na konkili. Mu mbali ya misebo iikalamba e mo abalendo balesanga amayanda umwa kufikila abeni, kabili pa kusanga ing’anda imbi bale-enda ubushiku bumo ubutuntulu. Nomba ilyo bashilasanga ing’anda imbi iya kufikilamo abeni balesanga na mayanda yambi umo baleshita ifyo balekabila. Abalembele amalyashi pa fyalecitika pali ilya nshita, balondolola ifyo amayanda ya kufikilamo abeni e lyo na mayanda umo abeni baleshita ifintu yali, ukuti mwaleba ifiko sana, mwaleba na cinkupiti wa bantu, tamwaleba no mwela kabili mwaleba ne fiipu. Muli ifi fikulwa mwaleisa sana abantu ababipa nga nshi. Abalesakamana abeni ilingi line baleibila abalendo, kabili pa milimo balebabombela paleba no kubapeela bacilende.
  
  Ukwabula no kutwishika Abena Kristu balesengauka sana ukuya ku fifulo fya musango yu. Lelo nga baleya ku fifulo uko bashakwete balupwa nelyo ifibusa takwaleba ifyo bali no kucita, bali no kulaala fye mu fifulo fya musango yu.