Lesa afwaya tukekale umuyayaya mu mutende ne nsansa mu paradaise pe sonde!

Nalimo kuti mwapapa amuti, ‘Bushe ici cikacitika?’ Baibolo itila Ubufumu bwa kwa Lesa bukalenga ici cikacitike, kabili Lesa afwaya abantu bonse baishiba Ubufumu bwakwe ne fyo afwaya balecita.—Amalumbo 37:11, 29; Esaya 9:7.

Lesa afwaya ukuti tuleba ne nsansa.

Nga filya fine wishi uwatemwa abana bakwe afwaya baba ne nsansa, na Shifwe wa ku muulu Yehova afwaya tuleba ne nsansa lyonse. (Esaya 48:17, 18) Alilaya ukuti: “Uucita ukufwaya kwa kwa Lesa akekalilila umuyayaya.”—1 Yohane 2: 17.

Lesa afwaya tule-enda mu nshila shakwe.

Baibolo itila Kabumba wesu afwaya ‘ukutusambilisha imibele yakwe’ pa kuti ‘tule-enda mu nshila shakwe.’ (Esaya 2:2, 3) Aliteyanya “abantu abe shina lyakwe” abalenga ukufwaya kwakwe ukwishibikwa isonde lyonse.—Imilimo 15:14.

Lesa afwaya twaba abaikatana pa kumupepa.

Ukupepa kwa cine takulekanya bakapepa, lelo kulenga batemwana sana no kwikatana. (Yohane 13:35) Ni bani basambilisha abantu isonde lyonse ukwikatana ilyo balebombela Lesa? Mwalasanga icasuko ilyo mulebelenga ino broshuwa.

Ni Nte sha kwa Yehova banga mwaishiba? Bamo bena mupalamano benu, bambi nalimo mubomba nabo, nelyo ukusambilila nabo. Nalimo twalilanshanyapo na imwe Baibolo. Bushe ni fwe bani kabili mulandu nshi twebelako bambi ifyo twasuminamo?

Twaba fye nga bantu bambi. Twakulila ukwapusanapusana, ne mikalile yesu yalipusanapusana. Ilyo tatulaba Inte, bamo twalepepa kumbi e lyo bambi tatwasumiine muli Lesa. Lelo ifwe bonse twabalile twasambilila no kumfwikisha ifyaba mu Baibolo. (Imilimo 17:11) Twalisumiine ifyo twasambilile kabili twalipingwilepo fwe bene ukulapepa Yehova Lesa.

Ifyo tusambilila mu Baibolo filatwafwa. Nga filya fine ciba kuli bonse, tulakwata amafya e lyo no kulufyanya tulalufyanya. Na lyo line ukwesha ukukonka ifyo Baibolo isambilisha cila bushiku, kulalenga imikalile yesu ukuwaminako. (Amalumbo 128:1, 2) Uyu e mulandu umo twebelako bambi ifisuma ifyo twasambilila mu Baibolo.

Tulakonka ifyo Lesa atusambilisha. Ifyo twasambilila mu Baibolo filatwafwa ukuba abantu abasuma, ukulacindika abantu bambi, no kuba no bufumacumi ne cikuuku. Filalenga twakwata umutima uusuma, twalayafwa na bantu banensu, no kulaumfwana mu lupwa e lyo no kukwata imibele isuma. Apo twalicetekela ukuti ‘Lesa taba na kapaatulula,’ tumona bamunyinefwe mwi sonde lyonse ukuti lupwa lwesu no kuti ifwe bonse tuli ba bwananyina. Tatupata aba mitundu imbi na ba ku fyalo fimbi. Nangu ca kuti twaba fye nga bantu bambi, icilonganino cesu cali-ibela.—Imilimo 4:13; 10:34, 35.

• Cinshi twingalandila ukuti Inte sha kwa Yehova baba fye nga bantu bambi?

• Fisuma nshi ba Nte basambilila muli Baibolo?

Abantu abengi batontonkanya ukuti imipepele ya Nte sha kwa Yehova, mipepele yaisabako fye mu myaka ya nomba line. Lelo ukucila pa myaka 2,700 iyapita ababomfi ba kwa Lesa wa cine baleitwa ukuti “inte.” (Esaya 43:10-12) Ilyo umwaka wa 1931 taulafika, twaleitwa ukuti Abasambi ba Baibolo. Mulandu nshi twasaliile ukulaitwa inshina lya kuti Inte sha kwa Yehova? Pantu:

Lilalenga Lesa wesu ukwishibikwa. Ukulingana ne fimfungwa fya kale, ishina lya kuti Yehova lilasangwa amakana ayengi mu Baibolo. Mu maBaibolo ayengi balifumyamo ishina lyakwe no kupyanikapo amalumbo pamo nga Shikulu nelyo Lesa. Lelo Lesa wa cine ailondolwele kuli Mose ukuti ishina lyakwe ni Yehova, ilyo atile: “Ili e shina lyandi umuyayaya.” (Ukufuma 3:15) Ili ishina lyalimupusenyeko kuli tu lesa tumbi. Tulomfwa icilumba ukwitilwa kwi shina lya mushilo ilya kwa Lesa.

Lilalondolola umulimo twakwata. Ukutampila pali Abele umulungami, abantu ba ku kale abengi balilangile ukuti bali ne citetekelo muli Yehova. Mu kupita kwa nshita, Noa, Abrahamu, Sara, Mose, Davidi, na bambi, bailundile kwi “bumba lya nte” ilikalamba. (AbaHebere 11:4–12:1) Filya fine umo engalandilako umuntu uushilufyenye mu cilye ca milandu, na ifwe twaiminina pa kulenga icine pali Lesa ukwishibikwa.

Tupashanya Yesu. Baibolo ita Yesu ukuti “inte ya cishinka kabili iya cine.” (Ukusokolola 3:14) Yesu umwine atile, alengele ‘ishina lya kwa Lesa ukwishibikwa’ kabili atwalilile ukuba ‘inte ku cine’ pali Lesa. (Yohane 17:26; 18:37) Kanshi abasambi ba kwa Kristu aba cine, bafwile ukwitilwa kwi shina lya kwa Yehova no kulilenga ukwishibikwa. Ifi e fyo Inte sha kwa Yehova bafwaya ukucita.

• Mulandu nshi Abasambi ba Baibolo basalilepo ishina lya kuti Inte sha kwa Yehova?

• Ni lilali Yehova atampile ukukwata inte pa calo?

• Nani Inte ya kwa Yehova iyacila pali bonse?