‘Balitentemwike’

“Amatenga yalibafimbile; batentemukile mwi tenga kwati libwe.”

AYA e mashiwi yali mu lwimbo ulo Mose na bena Israele baimbile lintu balesekelela pa kupusuka bapuswike ilyo bapitile muli Bemba wa Kashika na pa konaulwa kwa bena Egupti, abalwani babo, abalebasupila, e kutila Farao no mulalo wakwe.—Ukufuma 15:4, 5, NW.

Onse uwaletamba uko ici cipesha amano calecitika, alisambilileko cimo. Takuli nangu umo uwingacimfya Yehova nelyo ukukanya amaka yakwe no kuba no mweo. Nalyo line, pashipita fye imyeshi iinono, bashimucindikwa ba mu Israele, e kutila Kora, Datani, Abiramu, na bantu babo abali 250, basuushishe pa lwalala abalashi ba kwa Lesa, Mose na Aarone.—Impendwa 16:1-3.

Yehova asokele abena Israele muli Mose ukufuma mu mahema ya balya bacipondoka. Datani na Abiramu, abaletungililwa na ba mu ndupwa shabo, bakene ukumfwila ukusoka. Lyene Mose abilishe ukuti Yehova Umwine ali no kulenga cishibwe ukuti aba bantu [“basaalwile Yehova,” NW]. Pali ilya ine nshita, Yehova alepwile umushili uwali pe samba lya makasa yabo. “Awe batentemukile aba mweo ku Mbo, bene na babo bonse: ne calo caliisele pa muulu pali bene.” Nga Kora na aba bambi bacipondoka? “Umulilo wafumine kuli Yehova no koca abo bantu imyanda ibili na makumi yasano abapalamike ifya cushi ce fungo.”—Impendwa 16:23-35; 26:10.

Farao no mulalo wakwe, e lyo na balya bacipondoka bali mu matololo, bonse balifwile pa mulandu wa kufilwa ukucindika abalashi ba kwa Yehova no kufilwa ukwishiba ukuti alangwa ku filecitikila abantu bakwe. Kanshi bonse abalefwaya ukucingililwa na Yehova muli shino nshiku shayafya tabafwile ukukokola ukusambilila no kumfwilo “Wapulamo” kabili “Uwa maka yonse,” Yehova. Nga bacite fyo, kuti bacetekela ukulaya kwa kwa Yehova ukwa kuti: “Abe kana limo kuti bawila ku mbali yobe, na makana ikumi ku kwa kulyo kobe; kuli iwe te kuti cipalame. Ici fye, mu menso yobe ukalolesha, no kumona ababifi balepeelwa iciyene. Apo iwe wati, Yehova e cubo candi, Wapulamo e o wacito kubo bwikalo bobe.”—Amalumbo 91:1, 7-9.

Bushe Kuti Mwatemwa Ukutandalilwa?

Nelyo fye ni muli ici calo ca macushi, kuti mwasanga insansa nga mwaishiba bwino bwino fintu Baibolo isosa pa lwa kwa Lesa, Ubufumu bwakwe, no bufwayo bwakwe ubwawamisha ubo akwatila abantunse. Nga mwingatemwa ukwishiba na fimbi nelyo nga mwingafwaya umuntu umo ukwisasambilila na imwe Baibolo apa fye pa ng’anda pa mwenu, mukwai lembeleni ku Nte sha kwa Yehova, Box 33459, Lusaka 10101, nelyo ku keyala kalinga ukufuma pe bula 2.