Ifingatwafwa Ukulashimikila Bwino—Ukushimikila ku Cintubwingi mu Cifulo Cesu Ica Kushimikilamo

Ico Cacindamina: Abantu balipamfiwa kabili tabasangwa pa mayanda. Ifilonganino fyalikoseleshiwa ukulashimikila ku cintubwingi ukubomfya amatebulo nelyo utwakubikapo impapulo utwamawilo pa kuti abapita nshila balemonapo. Kuti mwaorda utwakubikapo impapulo kwi ofeshi lya musambo. Icilonganino kuti cakopolola ifikope pa JW.ORG ifyo basuminisha ukubomfya ifyaba mu ndimi ishalekanalekana. Bushe mulaipakisha ukushimikila ukubomfya iyi nshila?

Ifyo Mwingacita:

Ukulingana ne fyo komiti ya mulimo yalanda, amatebulo nelyo utwakubikapo impapulo utwakwata amawilo kuti mwatubika pa ncende apapita sana abantu mu cifulo cenu ica kushimikilamo.
Cilawama ukubika pa cifulo cimo cine, pa nshiku shimo shine, kabili pa nshita imo ine cila mulungu. Ici cilalenga abantu bakabeleshe ukumona apo tutantika impapulo na mu kupita kwa nshita kuti calabangukila ukuyapo no kwipusha amepusho bakwata nelyo ukusendapo impapulo.
Muleba aba bucibusa, kabili mulemwentula. Umuntu uulepita nga alolekesha apo mutantike impapulo, kasabankanya umo kuti atendeka ukulanshanya nankwe, nalimo kuti aipusha uyo muntu ukuti, “Bushe mwalitala amutontonkanyapo pa fyo Baibolo ilanda pali ifi?” Kasabankanya umbi nelyo bakasabankanya babili kuti balecita ubunte bwa mu lyashi lwa mupepi na pali impapulo.
Abalefwaya ukumfwilapo na fimbi kuti mwabeba ukumipeela adresi yabo. Lembeni ifyebo pali uyo muntu pali formu ya S-43 pa kuti bakamufwaile aba kulanshanya nankwe.
Mulafuma ifisuma mu kushimikila muli iyi nshila. Mu cikuulwa cimo umwaba amashopu ayengi ku Lusaka, abaupana abena Croatia bamwene ako babikapo impapulo akamawilo, kabili balombele ukuti bakakope. Haggai uwalesakamana shilya mpapulo pali ilya ncende atile, aba baupana “balefwaya ukwishiba ifingi pa mpapulo shesu. Apo tabaishibe ukulanda bwino iciNgeleshi, twabomfeshe akatabo ka Good News for All Nations. Batile balilanshenyepo ne Nte sha kwa Yehova ku Croatia. E ico twabalangile Webu Saiti yesu kabili twabapeele ne citabo citila Bushe Cinshi Baibolo Isambilisha? mu ciNgeleshi. Balitemenwe sana. Lyene twalibapeele amanambala yesu aya foni nabo balitupeele ayabo kabili twabakoseleshe ukuti nga baya ku Bulaya bakayelanshanya ne Nte sha kwa Yehova.”

Esheniko Ukucita Ifi Uno Mweshi:

Ilyo muli pa mapepo ya lupwa landeni pa ncende iyabela uko mwikalila apo mwingashimikila ku cintubwingi. Citeni icilangililo pa fyo mwingashimikila kabili saleni ilyashi ilyo abantu aba ku ncende yenu bengatemwa ukumfwa.