America

Abana ba Nshiwa Batampa Ukulongana

Bushiku bumo, ba Angela aba ku Suriname baile mu kushimikila uko basungila abana ba nshiwa mupepi no kwabela ing’anda yabo. Umukalamba wa ici cikuulwa ali ni nkashi uwalekele ukulongana no kushimikila, kanshi alisuminishe ba Angela ukushimikila abana ba nshiwa. Ba Angela balishimikile abana 85 kabili balibatambishe amavidio ya pa jw.org. Ne ci calengele batendeke ukulasambilisha Baibolo abana abengi. Bapainiya babili nabo balitampile ukulasambilisha abana Baibolo kabili cila muntu alikwete ibumba ilyo alesambilisha. Uyu nkashi uwanaka atile alisambilishe abana inyimbo sha mu citabo cesu ica nyimbo kabili alebabelengelako amalyashi ya mu Baibolo ubushiku. Kwena, alefwaya ukulongana, lelo calyafishe pantu te kuti ashe abana ba nshiwa 85 beka. E ico balipekenye ukuti bonse batendeke ukulaya ku Ng’anda ya Bufumu. Apo ing’anda baleikalamo yali fye mupepi ne Ng’anda ya Bufumu, bamunyinefwe balebashindika pa numa ya kulongana. Pali ino nshita, uyu nkashi pamo na bana bonse 85 balalongana lyonse.

Gabriel Alyafwilishe Bashikulu Wakwe

Ilyo Gabriel uwa myaka 6 alebwela ku kulongana kwa citungu ku Paraguay, aletontonkanya pa fyo umulimo wa kushimikila pa Bufumu wacindama. E co alibukishe ukuti kwali umuntu uwacindama uo alefwaya ukuba nankwe mu Paradaise, no yu muntu, ni bashikulu wakwe. Lelo bashikulu wakwe tabalefwaya ukusambilila icine kabili balekaanya na bena mwabo na bana babo abali ba Nte.

Ubushiku bulya bwine, Gabriel alombele abafyashi bakwe ukuti alandeko na bashikulu wakwe pa intaneti abekala ku Argentina. Gabriel alilondolwelele bashikulu wakwe ico cacindamina ukusambilila Baibolo kabili alibepwishe ukwabula no kupita mu mbali ukuti, “Shikulu, bushe mulefwaya ukulasambilila Baibolo na ine?” Bashikulu wakwe balisumine. Lyena Gabriel abebele ukutila bakulasambilila muli broshuwa iitila, Mulekutika Kuli Lesa pa Kuti Mukekale Umuyayaya. Mu myeshi yakonkelepo balesambilila muli iyi yine broshuwa. Apo bonse babili tabaishibishe ukubelenga, balepitulukilamo kabela. Lyonse nga balesambilila, Gabriel alepekanya bwino isambililo kabili alefwala ishati, abikapo na tai.

Pa numa, banakulu na bawishikulu balitandalile Gabriel na bafyashi bakwe pa milungu iinono. Pa milungu yonse, bawishikulu baleya ku kulongana na Gabriel na bafyashi bakwe. Ilyo bawishikulu babwelele ku Argentina, balikonkenyepo ukusambilila Baibolo na munyinefwe umo kabili balilundulwike ukufika na ku kuba kasabankanya uushabatishiwa. Pali lelo, bawishikulu na banakulu balapepela pamo cila bushiku. Gabriel na o alilunduluka pantu ni kasabankanya uushabatishiwa. Bawishikulu balilangile ukuti balafwaya ukuipeela kuli Yehova kabili balibatishiwa.

“Bulya Bushiku Tabwali fye Nkuma”

Bushiku bumo ilyo ba Jennifer aba ku Brazil balepeela abantu trakiti ya Bushe Cine Cine Abafwa Kuti Baba aba Mweo na Kabili? baile pa ng’anda ya mwanakashi umo uwaleya ku kuloosha umunankwe uwafwile. Ba Jennifer bamwebele abati, cali fye nkuma ukuti nabo balefwaya ukumupeela trakiti iilanda pe subilo lya kumonana na bantu besu abafwa. Uyu mwanakashi alitulumwike ilyo abelengele umutwe wa iyi trakiti, na lyo line alipokele. Ilyo ba Jennifer bamwipwishe nga kuti asendako na yambi aya kuyapeelako abafwililwe, alisumine kabili alisendele ayali 9.

Ubushiku bumbi, ba Jennifer balibwelele kuli uyu mwanakashi, kabili abebele ukuti: “Ilyo twamonene pa muku wa kubalilapo, nalilwike ukuti bulya bushiku tabwali fye nkuma. Ni Lesa wamutumine ku kunsansamusha.” Alipeele abantu amatrakiti yonse ayo asendele. Lupwa wa baleloosha, uwapepeshe na pa cililo, alibelengele trakiti yonse ninshi naikatisha ne shiwi. Bonse abalekutika balitemenwe kabili balimutashishe pa mashiwi ya cisansamushi ayo ababelengele. Uyu mwanakashi alisumine ukusambilila Baibolo.

Ukushimikila Muli Basi

Ababomfi ba pa Bethel ya ku Haiti batatu baninine muli basi yabalabata iyo beta abati tap-taps. Pa lwendo lwabo ulwa maawala yabili na hafu, balelanshanya na bantu pe subilo lya Bufumu, kabili balipeele abantu magazini 50 na matrakiti 30. Gurvitch, munyinefwe umo pali aba batatu alibelengeele uo baninine nankwe basi amashiwi yamo ukufuma muli Loleni! Umulumendo umo, ishina lyakwe Pépé, alekutika kabili alitendeke ukupoosapo. Alilombele ukumusambilisha Baibolo, kabili cali fye nkuma ukuti na o aleikala mu cifulo umo munyinefwe Gurvitch aleshimikila. Ukutula mu January 2014 ilyo Pépé bamushimikile pa muku wa kubalilapo, tapuswa ku kulongana kwa pa cilonganino no kukalamba. Alashimikilako bambi pa cine ico asanga kabili alafwaisha ukuba kasabankanya uushabatishiwa.