“Endeleni mu Kutetekela, te mu Kumona”

Ilyo kwashele fye inshita iinono pa kuti umusumba wa Yerusalemu bausanse no kuonaula, umutumwa Paulo alembele ukuti apo Abena Kristu bashilika abasuma aba kwa Kristu, bafwile ukwenekela amafya kabili tabafwile ukubika amano ku kwikala bwino na ku kucita ifya kuisekesha. (2 Tim. 2: 3, 4) Ilyo cino calo cili mupepi no konaulwa, tufwile ukuba ne citetekelo icakosa pa kuti tutwalilile ukubika amano ku fya kwa Lesa. (2 Kor. 4: 18; 5:7) Mukatambe vidio iileti “Walk by Faith, Not by Sight.” (Kabiyeni pa jw.org, moneni apaleti PUBLICATIONS › VIDEOS.) Ilyo muletamba, moneni ifyo ukutemwisha ifyuma kwaletelele Nahamu na Abitali. Lyena kuti mwapituluka muli ifi fipusho.

(1) Bushe ‘ica bunani icali mu ncende ya mushilo’ mu nshita ya batumwa cali ni cinshi, kabili finshi Abena Kristu abaleikala mu Yerusalemu balingile ukucita? (Mat. 24:15, 16) (2) Mulandu nshi Abena Kristu balingile ukuba ne citetekelo pa kuti bafulumuke? (3) Finshi baali no kusha mu musumba pa kuti bafulumuke? (4) Cinshi calengele ukuti Nahamu na Abitali bashingashinge pa kufulumuka? (Mat. 24:17, 18) (5) Bwafya nshi na bumbi ubwaeseshe icitetekelo ca kwa Rakele ilyo balefulumuka mu Yerusalemu? (Mat. 10:34-37; Marko 10:29, 30) (6) Finshi twingasambilila ku fyo Etani acitile ifilanga ukuti alitetekele sana Yehova? (7) Mafya nshi Abena Kristu bakwete ilyo bafikile mu Pela? (8) Cinshi calengele icitetekelo ca kwa Nahamu na Abitali ukunaka? (9) Bushe Yehova asakamene shani Abena Kristu abaleikala mu Pela? (Mat. 6:33; 1 Tim. 6:6-8) (10) Apo tuleikala mu nshiku sha kulekelesha, kuti twapashanya shani Abrahamu na Sara? (Heb. 11:8-10) (11) Cinshi calengele ukuti Nahamu na Abitali babwelele ku Yerusalemu, kabili mulandu nshi ifyo bacitile fishabelele bwino? (Luka 21:21) (12) Ilyo Nahamu na Abitali babwelelemo ku Yerusalemu, finshi basangile ifyalecitika muli ulya musumba? (13) Cinshi tufwilile ukukosesha icitetekelo cesu ino ine inshita ilyo impela ya cino calo ishilaisa?—Luka 17:31, 32; 21:34-36.

Ukwendela mu kutetekela calola mu kuti tufwile (1) ukutetekela ifyo Yehova atutungulula, (2) ukulakonka ifyo atutungulula, kabili (3) tufwile ukulanga ukuti twalitemwa sana ifya kwa Lesa ukucila ifyuma. E co natuleenda mu kutetekela kabili twilatwishika ukuti ‘icalo cileya pamo no lunkumbwa lwa ciko, lelo uucita ukufwaya kwa kwa Lesa akekalilila umuyayaya.’—1 Yoh. 2:17