Ni Mbila Nsuma Nshi Iyakuma Amacalici?

1. Bushe amacalici yonse yaliba fye bwino?

Mu macalici yonse mwaliba abantu bamo abafwaya ukupepa Lesa ukulingana ne fyo umwine afwaya. Lesa alamona e lyo alibikako amano ku bantu ba musango yu kabili iyi ni mbila iisuma icine cine. Lelo icabipa ca kuti abantu balacita ifyabipa pantu uko bapepa balasuminisha ukucita ifya musango yo. (2 Abena Korinti 4:3, 4; 11:13-15) Tulomfwa pa milabasa uko aba mu mipepele imo bepaya abantu pantu ba mutundu umbi, uko balwa inkondo, ukusendama na bana abanono. Abafwaya ukupepa Lesa mu cine balomfwa ububi pa fya musango yu!—Belengeni Mateo 24:3-5, 11, 12.

Ababa mu kupepa kwa cine balacindika Lesa, lelo ababa kupepa kwa bufi balamukalifya. Aba mu kupepa kwa bufi basambilisha ifishaba mu Baibolo. Ku ca kumwenako, basambilisha ifya bufi pali Lesa na pa bafwa. Lelo Yehova afwaya abantu ukwishiba icine pali ena.—Belengeni Esekiele 18:4; 1 Timote 2:3-5.

2. Ni mbila nsuma nshi iyakuma amacalici?

Lesa tabepwa ku batila balimutemwa, lelo abacita ifya mu calo ca kwa Satana. (Yakobo 4:4) Icebo ca kwa Lesa citila ukupepa kwa bufi konse ni “Babiloni Mukalamba.” Babiloni wali musumba wa ku kale umwatampiile ukupepa kwa bufi pa numa ya Lyeshi lyaliko mu nshiku sha kwa Noa. Nomba line, Lesa ali no konaula ukupepa kwa bufi ukucusha abantu no kubasambilisha ifya bufi.—Belengeni Ukusokolola 17:1, 2, 5, 16, 17; 18:8.

Imbila nsuma na imbi ya kuti Yehova talabako ku bantu ababa mu kupepa kwa bufi abamona kwati bapepa Lesa wa cine. Alelenga ababa mu kupepa kwa bufi ukufumamo ilyo alebasambilisha icine no kutendeka ukulamupepela bonse pamo.—Belengeni Mika 4:2, 5.

3. Finshi ababa mu kupepa kwa bufi bafwile ukucita?

Yehova alibika amano ku bantu abatemwa icine kabili abacita ifisuma. Alabakoselesha ukufuma mu kupepa kwa bufi. Abatemwa Lesa balaleka ukucita ifyabipa no kutampa ukucita ifyo Lesa atemwa.—Belengeni Ukusokolola 18:4.

Kale, ilyo abantu baumfwile imbila nsuma ku batumwa, balitemenwe sana. Yehova alibasambilishe inshila iisuma, iyabalengele ukuba ne nsansa, no kukwata isubilo. Na ifwe bene tufwile ukubapashanya, pantu ilyo baumfwile imbila nsuma batampile ukukonka amafunde ya kwa Lesa muli fyonse ifyo balecita.—Belengeni 1 Abena Tesalonika 1:8, 9; 2:13.

Yehova alapokelela bonse abafuma mu kupepa kwa bufi no kubengisha mu cilonganino cakwe. Nga mwasumina ubwite bwa kwa Yehova, mukaba icibusa cakwe, mukaba mu cilonganino cakwe umwaba abantu abatemwana, kabili mukesakwata no mweo wa muyayaya.—Belengeni Marko 10:29, 30; 2 Abena Korinti 6:17, 18.

4. Bushe Lesa akalenga shani abantu bonse pa calo ukusekelela?

Lesa ali no kapingula ukupepa kwa bufi, iyi ni mbila nsuma. E fyo Lesa akafumyapo umutitikisha uwaba mu calo. Abantu tabakalebasambilisha ifya bufi nangu ukubapatukanya pantu ukupepa kwa bufi kukapwa. Bonse pa calo bakalapepa fye Lesa umo uwa cine.—Belengeni Ukusokolola 18:20, 21; 21:3, 4.