Icilubula—E Calenga Ukuti Kukabe Ukubuuka

Icibukisho cilalenga twalatontonkanya pa mapaalo tukaipakisha ku ntanshi pa mulandu wa cilubula pamo nga ukubuuka kwa bafwa. Yehova tabumbile abantu ukuti balefwa. E mulandu wine citukalipila uo twatemwa nga afwa kabili tulaba sana no bulanda. (1 Kor. 15:26) Yesu alyumfwile sana ubulanda ilyo amwene abasambi bakwe balelosha ilyo Lazaro afwile. (Yoh. 11:33-35) Apo Yesu alapashanya Wishi, te kuti tutwishike ukuti Yehova nao alomfwa sana ubulanda nga atumona tulelosha umutemwikwa wesu. (Yoh. 14:7) Yehova alafwaisha ukuti inshita ikafike iya kubuusha ababomfi bakwe abafwa, na ifwe bene e nshita tulolela.—Yobo 14:14, 15.

Apo Yehova te Lesa wa cimfulunganya, te kuti tutwishike ukuti ilyo abafwa bakalabuuka takwakaleba icimfulunganya. (1 Kor. 14:33, 40) Mu nshita ya kulaikala pamo tuleloosha, nalimo tukalaba fye pamo ku kulasengela abatemwikwa besu ababuuka ku bafwa. Bushe mulatontonkanyapo pa kubuuka kwa bafwa, maka maka ilyo muli ne cililo? (2 Kor. 4:17, 18) Bushe mulatasha Yehova pa kupeekanya icilubula no kutusokolwela mu Malembo ukuti abafwa bakabuuka?—Kol. 3:15.

• Ni bani pa fibusa fyenu na balupwa abo mufwaisha ukwisamona na kabili?

• Ni bani pa balembwa mu Baibolo abo mufwaisha ukwisamona no kulandapo nabo?